Kapas Eis Seni Chón Állea
Pwata a sókkóló pwóróusen manawen Jesus me lekúkkúnún lón puken Mateus seni met a mak lón puken Lukas?
Minne Mateus a makkeei usun án Jesus uputiw me mámmááritá, a sókkóló seni minne Lukas a makkeei pokiten Mateus a nefotofot wóón Josef nge Lukas a nefotofot wóón Maria.
Mateus a apwóróusa met Josef a féri atun a silei pwe Maria a pwopwo, an ttana án ewe chónláng áweweei minne a fis me an álleasochisi án ewe chónláng kapasen emmwen. (Mateus 1:19-25) A pwal áweweei án ewe chónláng éúréúra Josef lón an ttan pwe epwe súló Isip fán an we famili me an álleasochisi ena chónláng. Mwirin, Mateus a apwóróusa usun pwal eú án Josef ttan atun ewe chónláng a ereni pwe repwe liwiniti Israel, iwe ra liwin me filatá ar repwe nónnóm me an we famili lón Nasaret. (Mateus 2:13, 14, 19-23) Lón ewe puken Mateus Kapas Allim sópwun eú me ruu, iten Josef a mak fán 12, nge Maria fán 7 chék.
Iwe nge, Lukas a áweweei án ewe chónláng Kapriel chuuri Maria, án Maria lo chuuri márárin we Elisapet, me án Maria kapasen mwareiti Jiowa. (Lukas 1:26-56) A pwal áweweei met Simeon a ereni Maria usun ekkewe riáfféú Jesus epwe kúna. Iwe Lukas a pwal áweweei ewe fansoun Jesus a fiti an we famili le ló lón ewe imwenfel atun a 12 ierin. Pwal mwo lón ena atun, Lukas a aloni alon Maria kewe, nge esap alon Josef kewe, me a pwal apwóróusa pwe a fókkun chúng letipen Maria ren ekkena mettóch a fis. (Lukas 2:19, 34, 35, 48, 51) Lón ewe puken Lukas Kapas Allim sópwun eú me ruu, iten Maria a mak fán 19, nge Josef fán 6 chék. Ina minne, Mateus a apwóróusakich usun ekiekin me féfférún Josef. Nge Lukas, a menlapei ekiekin me pwóróusen Maria.
A pwal sókkofesen tettelin familien Jesus lón ekkeei ruu puken Kapas Allim. Mateus a átettelaatiw familien Josef me affata pwe Jesus néún Josef we mumu, a wor an pwúúng me ren pwúngún allúk pwe epwe wisen king usun Tafit. Pwata? Pún Josef, i mwirimwirin King Tafit lón tettelin Salomon néún Tafit we. (Mateus 1:6, 16) Iwe nge, Lukas a átettelaatiw familien Maria me affata pwe mi pwúkún wor án Jesus pwúúng an epwe wisen king pún a uputiw “lon tettelin eman mwirimwirin Tafit.” (Rom 1:3) Pwata? Pún Maria i mwirimwirin King Tafit lón tettelin Natan néún Tafit we. (Lukas 3:31) Nge pwata Lukas ese makkeetiw pwe Maria, i néún Eli? Pún ewe mwú a kan makkeetiw iten ekkewe chék mwán lón famili. Iwe atun Lukas a makkeei usun tettelin Josef me apasa pwe Josef i néún Eli, aramas ra kan weweiti pwe Josef, i pwúlúwen néún Eli we nengngin.—Lukas 3:23.
Tettelin familien Jesus lón án Mateus me Lukas puken Kapas Allim, ra pwáraatá pwe Jesus i ewe Messaia, ewe Kot a pwoneetiw. Aramas ra fókkun silei pwe Jesus, mwirimwirin King Tafit, iwe pwal mwo nge ekkewe Farisi me Satusi rese tongeni erá pwe ese pwúng ena. Án Mateus me Lukas áwewe usun tettelin familien Jesus, a apéchékkúla ach lúkú me a álisikich pwe sipwe lúkúlúk pwe lusun án Kot kewe pwon repwe pwal pwénútá.