Ämi Kana Säräfö, Met Kopwe Föri lon Manauom?
1 Ika en emön säräfö, ese mwääl ka fen ekieki met kopwe föri lon mwach kan. Än Salomon Fos 21:5 (Ewe Kapasen God) a erä: “Kopwe akkom otaöchu met ka ekieki pwe kopwe föri, iwe kopwe angei chommong mettoch.” Kopwe feiöch ika kopwe akkota met kopwe achocho ngeni lon manauom. Lupwen ka föri om kokkot, ekieki ika en mi tongeni fiti ewe angangen pioneer. Pwata?
2 Eisini ekkoch mi watte ra pin pioneer le säräföör ussun ewe angang, iwe meinisin repwe eäni eü chök memmeef repwe erä: “Ikkana ekkewe fansoun mi mürinnö seni meinisin lon manauei!” Emön brother a fen küna pwapwaan pioneer seni le alüwölun nge iei a fen mwukolo a erä: “Lupwen ua nnesefälli le aluwöli a mmen alollool ai meefi menemenöch pun ua apwonueta ewe pesepes mi tipatchem: ‘Lealüalum kopwe chechemeni ewe mi föruk.’” (SalAf. 12:1) Iei mwo a lamot pwe, en, semom me inom, ämi oupwe otaöchü met kopwe föri lon manauom pwe kopwe küna ewe pwapwa mi alolloon atun om säräfö.
3 Ämi Kana Säräfö, Akkomwa ewe Angangen Pioneer: Esor popun oupwe pwal ekieki ifa ussun napanapen ewe angangen pioneer. Ka tongeni sotuni le auxiliary pioneer ineet chök a öch ngonuk atun om sukul are fansoun asösöön sukul. Iwe, kopwe küna a ifa apwapwaan ewe angangen pioneer! Ka tongeni auxiliary pioneer lefilen iei me lesopwoloon ewe summer?
4 Ika en emön brother säräfö lon än Jiowa mwicheich, kopwe pwal ekieki om kopwe tufich le eäni ewe wis ministerial servant. (1 Tim. 3:8-10, 12) Pwal och, ekieki ika en mi tongeni angang lon Bethel are fiti ewe Ministerial Training School, ika ka tori ewe ükükün ier emön epwe tongeni eäni ewe angang. Om fiti ei angangen pioneer epwe äiti ngonuk chommong lesen mi aüchea, ussun choweän, akkotaöchü om fansoun me apwönüetä ena kokkot, angangfengen me chiechiöch ngeni ekkewe ekkoch, me alamotaöchü ekkewe wis ka eäni. Meinisin ekkeei mettoch epwe ammolokotä le eäni pwal ekkoch wis watte lon mwachkkan.
5 Eü kki pwe kopwe sopwöch lon ei angang, ina om kopwe tinikken. Ewe aposel Paul a apöchökküla ena napanap me menlapei ekkewe feiöch: “Meinisin mine oua föri, oupwe angang ngeni ren unusen letipemi usun itä nge oua angang ngeni ach Samol, . . . pwe ach Samol epwe ngenikemi liwinimi.” (Kol. 3:23, 24) Amwo Jiowa epwe efeiöchuk ren watteen pwapwa lon om angang ngeni I!