“Ka Tongeni Wiliti Emön Pioneer mi Mürinnö!”
1. Ifa meefien emön sister usun an we angangen pioneer?
1 “Esor eü angang ua küna pwe a fokkun apwapwa me atoto ngeniei feiöch watte lon pekin lükü.” Iei alon Kathe B. Palm. A fen pioneer ren fite fite ier lon Chile, South America me pwal ekkoch fönü. Om ekieki ekkewe feiöch ekkewe pioneer ra küna, eli a fen wor emön a erenuk: “Ka tongeni wiliti emön pioneer mi mürinnö!”
2. Äweweei pwata sia küna pwapwa mi alollool lupwen sia föri angangen Kot.
2 Manau mi Apwapwa: Jises, ach leenien äppirü, a küna pwapwa mi enlet lupwen a föri letipen Seman we. (Jon 4:34) Ina popun, a tongeni ereni nöün kewe chon käeö pwe pwapwa mi enlet a pop seni ar fiti ekkewe angang mi weneiti ar fel ngeni Jiowa. Sia meefi pwapwa lupwen sia äeä unusen manauach le föri ekkewe angang mi apwapwaai Kot. Pwal och, ach pwapwa a lapolo lupwen sia fangolo ach fansoun, pöchökkül me pisekich le älisi ekkewe ekkoch.—Fof. 20:31, 35.
3. Ifa ewe pwapwa sipwe küna lupwen sia alapalo ach angangen afalafal?
3 Ach alapalo ach fiti ewe angangen afalafal, pwal ina lapoloon ach sipwe tongeni poputä le käeö ngeni aramas ewe Paipel. Pwal mwo nge lon ekkewe leeni sia ekieki pwe aramas rese lien etiwakich, iei sia fen küna pwe a uwaöch ach angang pokiten a wattelo sileach me tufichich lon ewe angangen afalafal. Ekkewe pioneer ra tongeni apwönüetä met ra käeö lon ewe Sukulen Pioneer, ewe sukul ra fiti mwirin ar pioneer eü ier. (2 Tim. 2:15) Lupwen sia likiitü lon ei angang, eli sia fen fotuki pwikilin ewe enlet nge epwap uwa mwirin.—SalAf. 11:6.
4. Met ekkewe säräfö repwele sochungio repwe ekieki?
4 Säräfö: Lupwen kopwele sochungio me high school, ka fen ekieki usun met kopwe föri mwirin? Lon mwo ei atun, lap ngeni om fansoun ka chök äeä lon sukul. Nge met kopwe fför ngeni ena fansoun lupwen ka sochungio? Lap seni om kopwe kütta angangen moni full time, pwata kese iotek ngeni Jiowa me achocho le pioneer? A chommong mettoch kopwe käeö epwe efeiöchü unusen manauom, äwewe chök, ka afalafal ngeni sokkopaten aramas, pwäkini ekkewe minen eppet, pwisin emirituk me lipwäköchülo lon om asukula aramas.
5. Ifa usun ekkewe sam me in me ewe mwichefel ra tongeni apöchökkülatä ewe angangen pioneer?
5 Ämi kana sam me in, oua kan älisi nöümi kewe ar repwe achocho le pioneer? Ämi kapasen öüröür me leenien äppirü a tongeni älisiir ar repwe akkomwa än Kot we Mwu lon manauer. (Mt. 6:33) Iei alon Ray, i a poputä le pioneer wesin an sochungio: “Mama a meefi pwe ewe angangen pioneer, ina ewe angang mi apwapwa seni meinisin lon manauach.” Chon ewe mwichefel meinisin ra tongeni apöchökkülatä ewe angangen pioneer ren ar kapas me älillis. Iei alon Jose seni Spain: “Ai we mwichefel a mirititi pwe ewe angangen pioneer ina ewe angang mi lamot seni meinisin fän iten ekkewe säräfö. Ar aücheani ei angang, kapasen pesepes me älillis a ämecheresi ai upwe poputä le pioneer.”
6. Met sipwe föri ika sise mochen pioneer iei?
6 Pwäkini Ekkewe Minen Eppet: Ika ka erä: ‘Use mochen pioneer.’ Iwe, pwär ngeni Jiowa meefiom lon iotek me ereni, “use silei ika mi öch ai upwe pioneer, nge ngang uwa mochen föri met epwe apwapwaok.’ (Kölf. 62:8; SalF. 23:26) Mwirin, kütta emmwen seni an we kapas me an mwicheich. Chommong regular pioneer ra akkomw “neni” ewe angang ren ar auxiliary pioneer, me ewe pwapwa ra küna a amwökütüür ar repwe pioneer.—Kölf. 34:8.
7. Ifa usun sipwe pwäkini ach tipemwaramwar ika sipwe tongeni tikeri ewe 70 awa?
7 Ifa usun ika ka tipemwaramwar om kopwe tongeni tikeri ewe 70 awa iteiten maram? Pwata kese eisini ekkewe pioneer mi chök löllö nonnomun manauemi? (SalF. 15:22) Mwirin, makketiw fitu schedule ka ekieki. Ika ka likitalo ekkoch angang ese kon lamot pwe kopwe afalafal, iwe eli kopwe küna pwe ese kon lien weires om kopwe tikeri ewe awa.—Ef. 5:15, 16.
8. Pwata a lamot sipwe etittinasefäli nonnomuch fän ekkoch?
8 Etittinasefänni Nonnomum: Iteitan nonnomun manauach a sissiwil. Mi öch sipwe etittina nonnomuch fän ekkoch. Äwewe chök, kopwele retire seni om angang? Iei alon Randy, a retire nge esaamwo tori ierin retire: “Pokiten ua retire, ua tongeni fiti pwülüwei we lon ewe angangen pioneer, me aua tongeni mwöküt ngeni ewe leeni a osupwangen chon afalafal ie. Ua küna chommong feiöch ren met ua filatä, nge ewe feiöch mi watte seni meinisin, a limelimöch mwelien letipei.”
9. Met ekkewe pwüpwülü repwe ekieki?
9 Lupwen ekkoch pean pwüpwülü ra etittina nonnomur, ra küna pwe ese lamot ar repwe angang full time me rüüemön. Pwüngün, eli epwe lamot ar repwe pennüküolo ekkoch mettoch lon manauer nge repwe küna watte feiöch. Iei alon John, pwülüwan we a towu seni an angang pwe epwe alapalo an angangen afalafal: “Ua fokkun meefi kinamwe pun ua silei pwe a watte än pwülüwei we fansoun le angang ngeni Kot.”
10. Met a amwökütü Chon Kraist ar repwe ekieki usun ewe angangen pioneer?
10 Pwäratään Tong me Lükü: Jiowa a fen awisa ngenikich ewe angangen afalafal mi lamot seni meinisin. Ekiselo chök ei otot minen loom epwe talo, nge ekkewe chök mi köri iten Jiowa repwe küna manau. (Rom 10:13) Ika letipach a ur ren tong me kilisou ren met a fen föri fän itach, epwe amwökütükich le föri ewe angangen afalafal fän tinikken, Nöün we a awisach ngenikich. (Mt. 28:19, 20; 1 Jon 5:3) Pwal och, ika sia lükü pwe sia nonnom lon ekkewe ränin le sopwoloon, iwe, sipwe fiti ewe angangen afalafal ükükün ach tufich lon ei atun mi chüen suuk lap seni ach sipwe unusen äeä ei fönüfan.—1 Kor. 7:29-31.
11. Epwe itä ifa ekiekich ika emön a erenikich pwe sia tongeni wiliti emön pioneer mi mürinnö?
11 Ach regular pioneer esap chök wewe ngeni ach älisatä angangen än Jiowa we mwicheich, nge fen ina ewe minen pwäratä pwe sia tongei Kot. Ina popun, ika emön a fen erenuk pwe ka tongeni wiliti emön pioneer mi mürinnö, kopwe fen ekieki pwe a apwüngak. Me ekiekifichi fän iotek ika kopwe tongeni fiti chokkewe mi föri ei angang mi apwapwa.
[Pwóór lón pekin taropwe 4]
Sam me in kana, oua kan äkkälisi nöümi kewe ar repwe ekieki usun ewe angangen regular pioneer?
[Pwóór lón pekin taropwe 5]
Jiowa a fen awisa ngenikich ewe angangen afalafal mi lamot seni meinisin.