Ka fen Ammanga?
Ka fen ammanga om amasoua ewe DPA (durable power of attorney) card? Ewe card mi kawor fän iten ekkewe Chon Pwäratä Jiowa mi papatais. Pokiten “ouse mo sinei usun leesor,” a mmen lamot pwe kopwe filatä me mwan me makketiw lon taropwe ekkewe minen älillis lon pioing kopwe etiwa ika ka feiengaw watte. (Jem. 4:14; Fof. 15:28, 29) Ren an epwe älisuk, a kawor ewe cassette Transfusion-Alternative Health Care—Meeting Patient Needs and Rights (Ekkewe Minen Älillis Seni Pioing me Lükün IV Chcha mi Ataweei Osupwangen Ekkewe mi Semwen). Kopwe katol ewe cassette, iwe fiti iotek kopwe enniwili met ka käeö ren älillisin ekkewe kapas eis mi tettelitiw fan.—Chechchemeni: Sam me in repwe ekieki ika nöür kewe semirit repwe katol pokiten epwe fich än ekkewe tokter rei aramas.
(1) Met popun ekkoch tokter ra ekieksefäl usun IV chcha? (2) Apasa ülüngät sokkun reirei ekkewe tokter ra tongeni föri nge resap äeä chcha. (3) Fitemön tokter woon unusen fönüfan ra apasa pwe repwe älisi ekkewe mi semwen nge resap äeä chcha? Met popun? (4) Met ekkewe käeö usun pioing ra pwäratä usun äeään chcha? (5) Ikkefa ekkewe feiengaw seni IV chcha? (6) Met ekiekin chommong sou sile usun feiöchün än emön etiwa pwal ekkoch minen älillis lükün IV chcha? (7) Met a efisatä nafangawen chcha [anemia]? Ifa ükükün ewe nafangawen chcha ren emön nge esap mwo feiengaw ren? Met epwe älisi emön ika a nafangawen chcha? (8) Ifa usun ekkewe tokter ra tongeni alapalo ekkewe cell mi par lon inisin ewe mi semwen? (9) Met tokter ra tongeni föri pwe esap kon watte ewe chcha a towu seni emön atun an reirei? (10) Mei wor minen älillis fän iten semirit are fän iten aramas mi feiengaw watte lükün IV chcha? (11) Ifa eü allük mi lamot fän iten ekkewe tokter lupwen ra älisi aramas? (12) Met popun a lamot pwe chon Kraist repwe mwittir filatä menni älillis repwe etiwa lükün ewe IV chcha? Ifa usun sipwe föri ena?
Pokiten minne emön a käeö seni Paipel, iwe, mwelien letipan epwe pwisin filatä ika epwe etiwa ekkewe minen älillis a fich lon ei cassette. Ka fen filatä met sokkun älillis en me chon om famili oupwe etiwa, nge ka pwal amasoua ewe DPA card? Kopwe nengeniöchü ewe insert “Epwe Met Filiei Ussun Kinikisitiuen Ekkewe Kifetin Chcha me Ekkewe Minen Älillis lon Pioing Mi Äeä Chchai?” lon Ach Angangen Afalafala Ewe Mwu, minen November 2006. Iwe, kopwe chekiöchü pwe minne ka filatä kopwe makkeei lon nöüm we DPA card. Mi lamot kopwe esile ngeni ekkewe ka filiretä pwe repwe wisen älisuk me chon om famili esap iir Chon Pwäratä Jiowa, met ka filatä.
[Pwóór lón pekin taropwe 3]
• Ka fen filatä met sokkun minen älillis lon pioing kopwe etiwa fän itom me om famili?
• Pokiten kese sile met epwe fis ngeni manauom, ka kan ukkuwei nöüm DPA card?