Eü Angang mi Kkolo Lamotan
1. Met sipwe fangolo pokiten sia fokkun aücheani ewe angangen afalafal?
1 Pwata a kan wor kapasen pesepes iteitan pwe sipwe äeä ach fansoun, pöchökkül, me wöüch lon ewe angangen afalafal? Popun, pun ese pwal wor eü angang mi aüchea lap seni! Ach chechchemeni pwe epwe efeiöchü chommong aramas epwe alapalo ach mochen fiti ei angang esap chüen fissefäl.—Fof. 20:24.
2. Ifa usun ach angangen afalafal a epinalo iten Jiowa we mi lap?
2 Epinalo Iten Jiowa: Ewe angangen afalafal a menlapei pwe än Jiowa we Mwu fän nemenien Kraist Jises epwe ekkesiwili mwuun aramas meinisin me pwäkini än aramas kewe osukosuk. (Mt. 6:9, 10) Jiowa a lingelo pun i chök a tongeni selänikich seni samau me mälo. (Ais. 25:8; 33:24) Pokiten sia iteit seni itan, eli aramas repwe mwareiti Kot atun ra küna ach tinikken me föfför mürinnö. (1 Pit. 2:12) A ifa me pwapwaach le arongafetälei iten Jiowa, ach we Samol mi Lapalap!
3. Met sokkun feiöch epwe tori chokkewe mi etiwaöchü pworausen ewe Mwu?
3 Amanaua Ekkewe Ekkoch: Jiowa “esap mochen pwe eman epwe pöütmwälila, nge a fen mochen pwe meinisin repwe ekieksefäl.” (2 Pit. 3:9) Nge, ika esor epwe afalafaler, ifa usun repwe silei ekiekin Jiowa usun föfför mi mürinnö are ngaw? (Sona 4:11; Rom 10:13-15) Atun aramas ra etiwaöchü ewe kapas allim, ra amürinnölo manauer lupwen ra pöütalo ar kewe föfför mi ngaw. (Mika 4:1-4) Pwal och, ra pwapwaiti ewe äpilükülükün manau esemuch. Ach fiti ewe angangen afalafal me asukula aramas a tongeni amanauakich me chokkewe mi aüselingakich. (1 Tim. 4:16) A ifa me watteen aücheaan wisach lon ei angang mi fokkun lamot!
4. Pwata sipwe achocho ükükün ach tufich le fiti ewe angangen afalafala ewe Mwu me föralo chon käeö?
4 Ekiselo chök, ewe riäfföü mi lapalap epwe asopwalo ei otot mi ngaw. Iir kewe mi fel ngeni Jiowa repwe küna manau. Ina popun, ewe angangen afalafal me föralo chon käeö mi fiffis ikenäi a fokkun atapwal, lamot, me älillisöch. Sipwe akkomwa ei angang lon manauach!—Mt. 6:33.