Ka Fen Mmolnetä fän iten Om Älillisin Pioing Atun Epwe Fis Eü Feiengaw mi Weiweitä?
A tongeni fis ngonuk eü feiengaw mi weiweitä me a tongeni fis lon eü fansoun kese tepereni, nge epwe lamot ngonuk älillisin pioing. (Jem. 4:14) Ina minne, emön mi tipächem epwe ammolnatä ükükün an tufich. (SalF. 22:3) Ka fen filatä me makketiw filiom ren met sokkun minen älillis seni pioing kopwe etiwa? Ren an epwe älisuk, a fen kawor ewe DVD Transfusion-Alternative Health Care—Meeting Patient Needs and Rights, (Ekkewe Minen Älillis Seni Pioing me Lükün IV Chcha mi Ataweei Osupwangen Ekkewe mi Semwen), ewe arüüeföün DVD itelapan Transfusion-Alternatives—Documentary Series, a fen fför. Atun ka katol, ppii ika ka tongeni pölüweni ekkeei kapas eis fan. Ekkewe sam me in repwe ekieki ika nöür kewe semirit repwe katol pokiten epwe ffich än ekkewe tokter rei aramas.
(1) Met popun ekkoch tokter me kangof ra ekieksefäl usun IV chcha? (2) Apasa ülüngät sokkun reirei mi weires ekkewe tokter ra tongeni föri, nge resap äeä chcha. (3) Pwata a chommongolo tokter me tokterin reirei woon unusen fönüfan mi tipemecheres le älisi ekkewe mi semwen, nge resap äeä chcha? (4) Met ekkewe repot ra kerän fis seni pioing ra pwäraatä usun äeään chcha? (5) Ikkefa ekkewe feiengaw seni IV chcha? (6) Met ekiekin chommong sou sile usun feiöchün än emön etiwa pwal ekkoch minen älillis lükün IV chcha? (7) Met a efisatä nafangawen chcha [anemia], me met epwe älisi emön ika a nafangaw chchaan? (8) Ifa usun ekkewe tokter ra tongeni alapaalo cell mi par lon inisin ewe mi semwen? (9) Met tokter ra tongeni föri pwe esap kon watte ewe chcha a towu seni emön atun an reirei? (10) Mei wor minen älillis me lükün IV chcha fän iten semirit are fän iten aramas mi kon watte feiengawer? (11) Ifa eü allük mi lamot fän iten ekkewe tokter lupwen ra älisi aramas?
Pokiten mwelien letipen emön epwe pwisin filatä ika epwe etiwa ekkoch ekkewe minen älillis a ffich lon ei video, iwe, kosap witiwit tori om tolong lon eü feiengaw mi weiweitä, iwe, kopwap ekieki ika kopwe föri are kosap. Ewe insert lon ewe Ach Angangen Afalafala Ewe Mwu minen November 2006, epwe älisuk le föri kefil mi longolong woon met ka fen käeö. Iwe, ika ka fen papatais, kopwe makketiw minne ka filatä lon noum we DPA card me kopwe chök ukkuwei noum na card iteitan.
[Ekis Pwóróus lón pekin taropwe 3]
Ka fen filatä me makketiw filiom ren met sokkun minen älillis seni pioing kopwe etiwa?