Afalafal Fän Lükülük lon Ekkewe Leenien Business
1. Pwata sisap lichippüng ika sia meefi niuokkus le afalafal lon ekkewe leenien business?
1 Sia kan niuokkus atun sia ekiekin afalafal lon ekkewe leenien business? Ika ina, iwe sisap lichippüng pwe pwal mwo nge Paul ewe emön ese nisässäü, nge a pwal lamot ngeni an epwe pwisin apworai le afalafal. (1 Tes. 2:2) Sipwe ppii ekkoch mettoch mi eppetikich le afalafal lon ekkewe leenien business, me ekkewe minen älillis repwe älisikich le pworacho ngeniir.
2. Pwata sisap lolilen usun ach aosukosuka ekkewe chon angang?
2 Itä Ach Fos Ngeni ekkewe Chon Angang, epwe Osukosuker are Asonger? Lon chommong leenien business, ekkewe chon angang ra kan älisi aramas ina popun ra mmolnetä le fos ngeni aramas ese pwal lifilifil. Ekkewe chon angang ra ekieki pwe en nöür customer ina popun ra kan mesemesen mochen älisuk. Ach üföüföch me emelimel epwe efisi än ekkewe chon angang föfföröch ngenikich.
3. Met epwe tongeni älisikich pwe site asonga ekkewe customer?
3 Itä Upwe Afalafal Mwen Mesen Chommong Customer? Ika mi tufich, filatä le afalafal lon eü atun ese kon chommong aramas lon ewe leeni, äwewe chök atun a kerän chök suuk. Fos ngeni ewe pos are ewe chon angang atun chök ese osukosuk ren och mettoch are atun ese älisi emön customer. Kopwe ammwocha om we afalafal.
4. Met sipwe tongeni apasa atun sia afalafal lon ekkewe leenien business?
4 Met Upwe Apasa? Iei met kopwe apasa atun kopwe fos ngeni ewe pos ika a chommong chon angang: “Pokiten chon business rese kon nonnom lon imwer, ina popun aua chuuruk lon om ei leenien angang. Ua silei pwe ka angang ikenäi ina popun esap pwal ttam ai fos ngonuk.” Sisap fos usun ewe kokkotun monien älillis, chilon chök ika ra eis ika met a kan älisatä ach angang, pwe rete ekieki pwe sia amömö mettoch. Ika mi tufich eli kopwe tingorei ewe pos pwe kopwe tongeni ekis afalafal ngeni ekkewe chon angang. Eäni ngeniir ewe afalafal ka eäni ngeni ewe pos. Ika emön chon angang a osukosuk, iwe kopwe chök ammwocha om we afalafal me likiti ngeni echö chökükkünün taropwe. Ika ese tufich om kopwe fos ngeni ekkewe chon angang, neman epwe mut ngonuk om kopwe likiti ekkoch puk lon an ekkewe chon angang leenien asösö are lon ewe leenien puk fän iten ekkewe customer.
5. Ikkefa ekkewe popun sia tongeni afalafal lon ekkewe leenien business fän lükülük?
5 Jises me Paul ra afalafal ngeni aramas lon ar leenien angang fän lükülük, iwe pwal en kopwe pwal tongeni ina usun. (Mt. 4:18-21; 9:9; Fof. 17:17) Tingorei Jiowa om kopwe tipepwora me eäni eü letip mi kinamwe. (Fof. 4:29) A kan sopwöch ach afalafal lon ekkewe leenien business pokiten lap ngeni aramas ra nonnom lon ekkena leeni atun sia chuuriir. Pwata kese sotuni ei sokkun afalafal?