Afalafal Woon Al mi Uwaöch
1. Ifa usun sipwe tongeni äppirü Jises?
1 Atun än Jises afalafal woon fönüfan, ese akkachopwa le fos ngeni aramas a chuuri woon al me pwal lon ekkoch leeni. (Luk 9:57-61; Jon 4:7) A mochen äiti ngeni chommong aramas an we pworaus mi fokkun aüchea. Ikenäi, sia tongeni älisi aramas le angei än Kot tipachem ren ach afalafal ngeniir woon al. (SalF. 1:20) Epwe lapolo sopwöchüch ika sipwe akkomw le fos ngeni aramas me pwäratä mirit.
2. Pwata a lamot ach sipwe akkomw le fos ngeni aramas lon ach afalafal woon al?
2 Sipwe Akkomw le Fos ngeni Aramas: A öch sipwe akkomw le fos ngeni aramas nge sisap chök ütä are mommot me witi än aramas repwe fos ngenikich. Sipwe emelimel, me attola aramas fän kinamwe me mosonoson. Ika oua mwin me pwal ekkoch chon afalafal, a öch oupwe imufesen le fos ngeni aramas. Mwirin, kopwe pwal eis ika ifa usun oupwe chufengensefäl me chokkewe mi mochen aüseling. Ekkoch chon afalafal ra afalafal woon al lon eü chök leeni iteitan, ina pwata, ra tongeni chuchchursefäli ekkoch fän iten ar repwe akkafalafal ngeniir.
3. Epwe ifa usun sipwe pwäratä mirit atun sia afalafal woon al?
3 Eäni Mirit: Kopwe pwäratä mirit le filiöchü tefen ewe al kopwe ütä ie me iö kopwe fos ngeni. Kosap ekiekin fos ngeni meinisin ekkewe mi fetal ikena ie. Kopwe nennengeniöchü ekkewe aramas pwe kopwe silei met kopwe fos ngeniir woon. Ika ewe aramas mi ruo atapwal, eli a öch kosap fos ngeni. Atun ka afalafal ünükün ekkewe business, kopwe pwäri mirit pwe kete aosukosuka ewe manager. A öch sipwe afalafal ngeni ekkewe ra tou me lon ekkewe business nge esap ekkewe repwele kerän tolong. Fos ngeni aramas lon eü napanap esap eniuokkusur me arüköör. Kopwe pwal pwäratä mirit atun ka anöünöü nöüch kewe puk. Ika ewe aramas ese kon lien pwapwaiti, eli kopwe chök anöünöü ngeni ewe tract nge esap ekkewe puk.
4. Pwata afalafal woon al eü napanapen afalafal mi apwapwa me uwaöch?
4 Afalafal woon al a atufichikich le amwora chommong föün pwikilin ewe enlet lon chök mwochomwochen fansoun. (SalAf. 11:6) Eli ekkewe aramas sia afalafal ngeniir woon al sise tongeni chuuriir lon imwer atun sia afalafal imw me imw. Pwata sise akkota pwe sipwe fiti ewe angangen afalafal woon al, eü napanapen afalafal mi apwapwa me uwaöch?