Néúnéú Ekkewe Tract le Achéúfetálei ewe Kapas Allim
1. Ifa usun néún Kot kewe aramas ra néúnéú ekkewe tract?
1 Seni me lóóm, néún Jiowa kewe aramas ra fen néúnéú ekkewe tract seni Paipel le achéúfetálei ewe kapas allim. Lón ewe ier 1880, C. T. Russell me chiechian kewe ra poputá le féri ewe Bible Students’ Tracts, me a kawor ngeni chókkewe mi álleani ewe Watch Tower mi kawor fán iten aramas ese pwal lifilifil. A mmen aúchea ekkewe tract, ina pwata lón 1884 atun C. T. Russell a rechisterini eú kompeni, iwe ewe kapas “tract” a pachetá wóón ewe it Zion’s Watch Tower Tract Society, me iei a siwil ngeni Watch Tower Bible and Tract Society of Pennsylvania. Nge ena kompeni esap fán iten business nge fán iten kálisitáán angangen ewe Mwú. Lupwen a tori 1918, ekkewe Chón Káé Paipel ra fen eineti lap seni 300 million tract. Tori iei ekkewe tract ra álilliséch lón ewe angangen afalafal.
2. Pwata ra álilliséch ekkewe tract?
2 Popun Ra Álilliséch Ekkewe Tract: A sókkópat élúwen ekkewe tract me aramas ra mwittir áfánniir. Ewe pwóróus mi mwochomwoch mi nóm lón, a álilliséch me a efisi án aramas mochen állea. Ekkewe chón imw mi pireir le álleani ekkewe Leenien Mas are puk, repwe sani ekkewe tract. A mecheres anéúnéún ekkewe tract, pwal mwo nge fán iten ekkewe mineféén chón afalafal are ekkewe semirit. Pwal eú, ekkewe tract ra chék chékúkkún me a mecheres ach sipwe uwei.
3. Apwóróusa pwóróusom are pwóróusen ekkewe ekkóch lón ekkewe puk mi pwáraatá lamoten ekkewe tract.
3 Chómmóng ra silei ewe enlet ren ewe tract. Áwewe chék, emén fefin seni Haiti a kúna eché me lein néúch kewe tract wóón ewe al. A angetiwei, álleani me kétá: “Iei ewe enlet!” Mwirin ekis fansoun, a feiló ren ewe Leenien Mwich, a poputá le káé Paipel me papataiseló. A fis ekkena mettóch meinisin pokiten manamanen Án Kot we Kapas a nónnóm lón ena tract.
4. Met sipwe achocho le tikeri ika a tori ewe maram ach sipwe anéúnéú ekkewe tract?
4 Seni Imw me Imw: Pokiten ekkewe tract ra mmen álilliséch lón angangen afalafal, iwe poputá seni November, sipwe anéúnéú ekkewe tract fán ekkóch maram. Iei met sipwe achocho le tikeri. Sia mochen néúnéú tract le poputááni ach pwóróus ngeni ewe chón imw nge sisap chék eiti ngeni. Ika sia kúna pwe lón ewe chék áeúin fansoun sia chuuri ewe chón imw are return visit nge a pwapwaiti ewe pwóróusfengen, iwe sia tongeni áiti ngeni ewe káéén Paipel ren ach néúnéú ewe puk Paipel A Apasa are pwal ekkóch puk. Epwe ifa usun ach sipwe anéúnéú ekkewe tract imw me imw? Ekkewe tract ra sókkofesen, iwe mi lamot ach sipwe sileéchú ekkewe tract sipwe anéúnéú.
5. Epwe ifa usun ach sipwe anéúnéú ekkewe tract imw me imw?
5 Mi lamot pwe met sipwe eáni afalafal, epwe weneiti ewe leeni sia afalafal ie me ewe tract sipwe néúnéú. Sia tongeni poputááni ewe pwóróusfengen ren ach eiti ngeni ewe chón imw ewe tract. A ling wóón ewe tract, ina pwata mi tongeni apwapwatáái chón aúseling. Are sia tongeni áiti ngeni néúch kewe sókkópaten tract me mut ngeni an epwe filatá menni a sani. Ika sia afalafal lón ewe leeni aramas rese kan mochen suuki asamer kewe, iwe sipwe áiti ngeniir ewe tract me ikewe ia ewe chón imw epwe kúna me ie. Are sia tongeni ereniir ika kich mi tongeni waalong ewe tract fán asamer we me sia mochen silei met meefier usun ena tract. Ika eú kapas eis itelapen ewe tract, iwe sia tongeni eis meefier wóón. Are sia tongeni fférútá pwisin ach kapas eis mi tongeni efisatá án chón imw pwapwaiti le aúseling me pwóróus ngenikich. Sia tongeni álleani ngeni ewe chón imw ekis pwóróus lón ewe tract me ekis kaúló ika sia tori eú kapas eis me mut ngeni an epwe uwawu pwisin meefian. Sia tongeni álleani ekkewe menlapen wokisin seni Paipel. Mwirin ach pwóróusfengen wóón ekkóch pwóróus, sia tongeni asopwaló ena pwóróusfengen me akkóta ineet sipwe pwal liwinitiir. Ika ewe mwichefel a kan watiw ekkewe puk lón ekkewe imw ese nóm chón, iwe sia tongeni likitatiw eché tract ikewe ekkewe ekkóch resap kúna me ie.
6. Ifa usun néúnéún ekkewe tract atun sia afalafal wóón al?
6 Afalafal Wóón Al: Ka fen piin néúnéú ekkewe tract le afalafal wóón al? Ekkóch chón fetál ra atapwalapwal me rese mochen kaúló le fós ngenikich. Eli a weires ach sipwe esilla ika iir mi wesewesen mochen aúseling. Pwata sise eiti ngeniir eché tract lap seni ach sipwe eiti ngeniir eú mineféén puk, saminne sipwe silei ika repwe álleani? Pokiten a ling wóón ewe tract me a mwochomwoch masouan, ar mochen silei masouan a tongeni efisatá ar repwe mochen álleani ewe tract ika a wor ekis ar fansoun. Nge ika rese atapwalapwal, iwe sia tongeni apwóróusa ngeniir ekkóch pwóróus lón ewe tract.
7. Apwóróusa pwóróusen ekkóch mi áiti ngenikich néúnéún ekkewe tract atun afalafal sereseréch.
7 Afalafal Sereseréch: A mecheres ach sipwe afalafal sereseréch ren ach néúnéú ekkewe tract. Emén chienach mwán a kan waalong fitaché tract lón pwokitan iteiten an ló seni imwan. Ika a chuuri emén, áwewe chék emén chón angang lón sitowa, iwe a chék ereni pwe epwe ngeni óch mettóch pwe epwe álleani me mwirin a eiti ngeni eché tract. Lupwen eú pean pwúpwúlú ra feiló lón ewe leeni New York pwe repwe kukkunou, ra mirititi pwe repwe tongeni chuuri aramas seni sókkópaten fénú. Ina pwata ra uwei ewe puk Good News for All Nations, me chómmóng tract lón sókkópaten fós. Iwe atun ra rong án emén fós lón pwisin an fós atun a amémé mettóch wóón ewe sidewalk are ekkewe ra kan mómmót rer lón park are leenien mwéngé, iwe repwe anéúnéú ngeniir eché tract lón pwisin ar fós.
8. Ifa usun ekkewe tract ra usun chék féún irá?
8 ‘Amworafeili Ffotóm Féún Irá’: Ekkewe tract ra usun chék féún irá. Emén chón atake a amworafetálei ffotán kewe féún irá pún ese silei menni epwe máár me fásar. Iei alon Än Salomon Afalafal 11:6: “Lesosor kopwe amorafeili föün irä, kopwe pwal amorafeili lekuniol. Pun kosap silei meni leir epwe märöch, ika repwe märöch meinisin.” Ina minne, amwo sipwe sópweló le “achöfetalei silelap” ren ach néúnéú ekkewe tract mi fókkun álilliséch lón ewe angangen afalafal.”—SalF. 15:7.
[Ekis Pwóróus lón pekin taropwe 3]
Pokiten ekkewe tract ra álilliséch lón ewe angangen afalafal, iwe poputá seni November, sipwe anéúnéú ekkewe tract fán ekkóch maram