Ifa Usun Óm Famili Epwe Pwapwa?

1. Pwata eú pwúpwúlú mi fiti pwúngún allúk a aúchea ngeni pwapwaan ewe famili?

Ewe pwóróus allim a feito seni Jiowa, “ewe Kot mi pwapwa,” me ewe mi mochen pwe famili meinisin repwe pwapwa. (1 Timoty 1:11, NW) I a poputááni ewe kókkótun pwúpwúlú. Eú pwúpwúlú mi fiti pwúngún allúk a aúchea ngeni pwapwaan famili, pokiten a álisatá án sam me in me ekkewe nau meefi núkúnúkéch. Chón Kraist repwe súféliti allúkún mwú usun rechisterin pwúpwúlú lón imwen kapwúng.​—Álleani Lukas 2:1, 4, 5.

Met Kot a mochen usun pwúpwúlú? A mochen pwe ewe riri epwe nomofóch lefilen emén mwán me emén fefin. Jiowa a mochen pwe ekkewe mwán me fefin mi pwúpwúlú repwe tuppwélfengen. (Ipru 13:4) A oput mufesen are wes lón pwúpwúlú. (Malakai 2:16) Nge, a mutatá án emén Chón Kraist epwe mu seni pwúlúwan me pwúpwúlúsefál ika pwúlúwan we a féri ewe tipisin lisowu.​—Álleani Mateus 19:3-6, 9, TF.

2. Epwe ifa usun féfférún pwúpwúlú lefiler?

Jiowa a fératá mwán me fefin pwe repwe pélúwéch le apwénúetá wiser lón pwúpwúlú. (Keneses 2:18) Pokiten ewe mwán i mékúren ewe famili, iwe epwe awora met mi lamot ngeni an we famili lón pekin aion me asukuler usun Kot. Epwe pwáraatá an tongei pwúlúwan ren an pennúkúoló mochenin kewe. Iir me rúúemén repwe tongfengen me súfélfengen. Pokiten meinisin mwán me fefin mi pwúpwúlú rese unuséch, iwe ar akkachocho le omusaaló tipisin pwúlúwer, epwe ina kiien pwapwaan ar pwúpwúlú.​—Álleani Efisos 4:31, 32; 5:22-25, 33; 1 Petrus 3:7.

3. Itá kopwe sú seni pwúlúwom we ika esor pwapwa lón ámi we pwúpwúlú?

Ika oua kúna weires lón ámi we pwúpwúlú, ámi me rúúemén oupwe anganga ewe féfférún tong lefilemi. (1 Korint 13:4, 5, TF) Án Kot we Kapas ese apéchékkúla imufesen lón pwúpwúlú pwe esap ina alen pwákini osukosuken pwúpwúlú mi fen chéúfetál.​—Álleani Markus 10:9.

4. Ámi kana nau, met Kot a mochen fán itemi?

Jiowa a mochen pwe oupwe pwapwa. A ngenikemi ewe kapasen emmwen mi múrinné seni meinisin ren ifa usun oupwe pwapwaiti ámi sáráfé. A mochen pwe oupwe kúna álillis seni ewe mirit me sile seni inemi kewe me sememi. (Kolose 3:20) Jiowa a pwal mochen pwe oupwe kúna ewe pwapwa seni ámi féfféri letipen ewe Chón Férikemi me letipen Néún we.​—Álleani Än Salomon Afalafal 11:9–12:1; Mateus 19:13-15; 21:15, 16.

5. Sam me in kana, ifa usun néúmi kewe repwe kúna pwapwa?

Oupwe angang weires le awora mwéngé, imw, me úf fán iten néúmi kewe. (1 Timoty 5:8) Nge ren án néúmi kewe repwe kúna pwapwa, a lamot oupwe pwal asukuler le tongei Kot me káé seni. (Efisos 6:4) Ámi isetiw leenien áppirú le tongei Kot a fókkun tongeni achchúngú letipen néúmi kewe. Ika ámi angangen káit a lóngólóng wóón án Kot Kapas, iwe a tongeni anapanapaéchú ekiekiir.​—Álleani Tuteronomi 6:4-7; Än Salomon Fos 22:6.

A álilliséch ngeni ekkewe nau atun oupwe apéchékkúler me apúnger. A pwal lamot oupwe apwúngúúr me emiritiir. Ekkena sókkun asukul a túmúnú seniir ekkewe féffér repwe atai ar pwapwa. (Än Salomon Fos 22:15) Nge, ewe angangen emirit esap fis fán arochongaw me kirikiringaw.​—Álleani Kolose 3:21.

Chón Pwáraatá Jiowa ra féri sókkópaten puk mi ákkáeúin ffér pwe epwe álisi sam me in me ekkewe nau. Ekkena puk ra lóngólóng wóón ewe Paipel.​—Álleani Kölfel 19:7, 11.