Ámúrinnééló Tufichich lón ewe Angangen Afalafal lón Ekkewe Leenien Business

Pwata A Lamot: A watte awaan án chómmóng aramas angang lón ar leenien angang. Ina popun, fán chómmóng ewe alen ach sipwe chuuriir pwe sipwe fós ngeniir usun pwóróusen ewe Mwúún Kot, lón ar kewe leenien angang. A apwapwa me uwaéch ach afalafal lón ekkewe leenien business pokiten aramas ra nóm, me ekkewe chón angang ra mochen álisi chókkewe ra etto pwe ra ekieki nge repwe kamé. Ekkewe chón afalafal ra tongeni uwaéch ika repwe eáni mirit me túmúnú met ra úféúf me napanapen fouter. (2 Kor. 6:3) Ina popun, ewe chónemmweni ewe angangen afalafal epwe chechcheki ika a fán fitu ra afalafal lón ekkewe leenien business me ié kewe ra afalafal.

Usun Ach Féri:

Ammólnatá eú afalafal mi mwoch. Pún ika sia attama ach fós ngeni emén chón angang, iwe eli esap chúen suuk ach sipwe fós ngeni lón pwal eú fansoun.
Filatá le chúri aramas lón ekkewe business lón eú atun ese osukosuk, áwewe chék atun ra kerán suuk.
Achocho le akkomw fós ngeni ewe meilap. Kopwe emelimel me pwáraatá pwe ka áfánni. Neman kopwe apasa ei, “Ren ekis chék fansoun ám aua chuuri aramas lón ar leenien angang pokiten a weires aupwe chuuriir lón pwisin imwer.” Amwocha óm afalafal ngeni me anéúnéú ngeni tract, Leenien Mas are pwal eú puk. Pwe aramas resap ekieki pwe kich chón amémé mettóch, a éch ika sisap fósun ewe monien asor chilóón chék ika ra eisinikich ia a feito me ie monien ach angang.
Ika ewe meilap a sani, tingor mumutáán óm kopwe pwal ekis fós ngeni ekkewe ekkóch chón angang. Lón ekkóch leenien business, neman a éch kopwe tingor óm kopwe likiti ekkóch puk ikewe ekkewe chón angang ra mwéngé are asésé ie.
Kopwe eáni mirit me tipemecheres. Áwewe chék, ika emén chón angang a fós ngeni emén chón kamé are a osukosuk, witiwit tori ese chúen osukosuk, iwe ina atun kopwe fós ngeni.

Sótuni fán ei Maram:

Lón ámi Famili Fel lón en, asóssót eú afalafal mi mwoch kopwe eáni ika ka afalafal lón ekkewe leenien business.