Met Ewe Paipel A Apasa?

Ié ewe Tefil, are met ena Tefil?

KOPWE ITÁ ERÁ pwe ewe Tefil . . .

• I emén ngún?

• Eú minen lios mi liosuetá minne mi ngaw lón emén aramas?

• Masouen lón tutulap?

PAIPEL A APASA

Ewe Tefil a fós ngeni Jesus me sótuni i. (Mateus 4:1-4) Iwe, ewe Tefil esap ina masouen lón tutulap, esap pwal chék eú lios fán iten minne mi ngaw. I wesewesen emén ngún mi ngaw.

MET SIA PWAL TONGENI KÁÉ SENI PAIPEL?

• Me lóóm lóóm, ewe Tefil i emén chónláng mi pin, ‘tori ewe rän a föföringau lon.’ (Isikiel 28:15) A wiliti emén chón kapas chofona me a ú ngeni Kot.

• A pwal wor ekkóch chónláng ra fiti Satan lón an angangen ú ngeni.​—Pwärätä 12:9.

• Ewe Tefil a achunaló letipen chómmóng aramas pwe resap lúkú pwe i wesewesen emén.​—2 Korint 4:4.

Ewe Tefil mi tongeni nemenaló aramas?

EKKÓCH ARAMAS RA APASA pwe chókkewe usun itá ewe Tefil a nemeniir ra chék pwomweni pwe mi wesewesen fis. Nge ren ekkóch, ra niwokkus ika ngún mi ngaw epwe nemeniir. Nge en, met óm ekiek?

PAIPEL A APASA

“Unusen fanüfan a nom fän nemenien Ewe mi Ngau.” (1 Johannes 5:19) A watte án ewe Tefil manamanen etipetipa aramas, nge ese nemenaló meinisin aramas.

MET SIA PWAL TONGENI KÁÉ SENI PAIPEL?

• Ewe Tefil a áeá minne mi chofona pwe epwe alapaaló an angangen etipetip.​—2 Korint 11:14.

• Fán ekkóch ekkewe ngún mi ngaw ra tongeni nemeni aramas.​—Mateus 12:22.

• Ren án Kot álillis, ka tongeni sópwéch le “ü ngeni Tefil.”​—James 4:7.