Túmúnú Ekkeei Mettóch Atun Ka Káé Ngeni Emén

Kosap Achómmónga Minne Ka Apasa: Kosap ekieki pwe a lamot kopwe áweweei ekkewe pwóróus meinisin. Jesus a néúnéú kapas eis le álisi aramas ar repwe ekieki me pwisin kúna pwúngún ewe pwóróus. (Mat 17:24-27) Kapas eis a tongeni amwasangasanga ewe káé me álisuk le silei met noum we chón káé a weweiti me lúkú. (be-E 253 ¶3-4) Atun ka kapas eis, kopwe mosonottam le witiwiti an pélúweni. Ika a mwáál an pélúweni, kosap mwittir ereni pélúwan. Kopwe chék emmweni pwe epwe pwisin kúna pélúwan ren óm eáni pwal ekkóch kapas eis. (be-E 238 ¶1-2) Kosap kon mwittir le fós pwe ewe chón afalafal epwe liapeni ekkewe minefé pwóróus.​—be-E 230 ¶4.

Kosap Achómmónga Ekkewe Pwóróus: Túmúnuk seni óm kopwe apasa meinisin minne ka silei usun ewe pwóróus. (Jo 16:12) Menlapei chék ewe pwóróus mi lamot lón ewe parakraf. (be-E 226 ¶4-5) Pwóróus mi tichik ikaamwo ra éch nge ra tongeni amwonaló pwóróus mi lamot. (be-E 235 ¶3) Ika ewe chón káé a fen weweiti ewe pwóróus mi lamot, mwet ngeni ewe parakraf mwirin.

Káé Chék ewe Lesen: Populapen ach káé ngeni aramas pwe epwe chúng letiper nge esap chék ren ach sipwe áwesi ewe lesen. (Luk 24:32) Áeáéchú manamanen án Kot we Kapas ren óm menlapei ekkewe wokisin mi chék weneiti ena lesen. (2Ko 10:4; Ip 4:12; be-E 144 ¶1-3) Áeá kapas áwewe mi mecheres. (be-E 245 ¶2-4) Napanapen óm káé epwe fichiiti án ewe chón káé weires me lúkú. Kopwe eisiniir: “Met meefiom usun ekkeei lesen ka káé?” “Met ei lesen a áiti ngenikich usun Jiowa?” “Ifa ewe feiéch kopwe kúna ika kopwe féri ena kapasen fén?”​—be-E 238 ¶3-5; 259 ¶1.