Poputááni eú Pwóróusfengen ren Óm Néúnéú Tract

Seni January 2018, lúkúnpéén Manawach me Ach Angangen Afalafal Minen Káé fán Iten Mwich a awora ekkewe alen pwóróusfengen. Sia angei pesepes ach sipwe nefótófót wóón ach pwóróus ngeni aramas lap seni ach sipwe chék anéúnéú ngeniir puk. Ren an epwe ámecheresi án ekkewe chón afalafal siwili napanapen ar afalafal, ekkewe videon alen pwóróusfengen ra áiti ngenikich ifa usun sipwe poputááni eú pwóróusfengen nge sipwe chék néúnéú ewe Paipel. Iwe nge, a itá wewe ngeni pwe sisap anéúnéú puk me metakkan atun sia afalafal imw me imw? Aapw esap ina weween! Áwewe chék, sia tongeni néúnéúfichi ekkewe tract ren ach poputááni eú pwóróusfengen. Epwe tongeni iei usun napanapen néúnéún ekkewe tract:

1. Eáni ewe kapas eis mi wor fitu pélúwan mi nóm lúkúnpéén ewe tract.

2. Áiti ngeni ewe pélúwan me ren ewe Paipel a nóm asan lón ewe pekin taropwe ruu. Ika mi fich óm kopwe sópweló, álleani me pwóróus wóón ekkóch pwóróus lón ewe tract.

3. Ngeni ewe chón imw ewe tract me pesei an epwe pwisin sópweló le álleani ekkewe lusun lón ewe fansoun mi fich ngeni.

4. Mwen óm kopwe ló seni, áiti ngeni ewe kinikin “Mettóch Kopwe Ekieki” me ewe kapas eis lón, me akkóta óm liwinsefál pwe oupwe pwóróusfengen wóón met ewe Paipel a apasa.

Atun ka liwiniti ewe chón imw, pwóróusfengen wóón pélúwen ewe kapas eis, me likiti ngeni pwal eú kapas eis oupwe pwóróus wóón lón nan. Neman kopwe filatá eú kapas eis seni ach we website are seni ewe puk mi pwá lúkúnúppen ewe tract. Mwirin lón ewe fansoun mi fich, áiti ngeni ewe brochure Pwóróus Allim Seni Kot! are pwal eú puk fán iten káé seni ewe Pwórun Asukul.