Ka Tongeni Sileöchü Kot ren Itan?

Ika emön mi iteföülo a mochen sipwe chök kör ngeni pwisin itan, sia meefi pwe a äfännikich. Aramas ra kan kör ngeni ekkewe nöüwisin mwu, “Governor,” “Samol,” are “Ämmafel.” Ina popun, ika emön mi watte wisan a erenuk: “Kese mochen kopwe chök kör ngeniei itei,” ese mwääl kopwe meefi pwe en mi aüchea.

EWE Kot mi enlet a erenikich lon an we Kapas, ewe Paipel: “Ngang [Jiowa], iei chök itei.” (Aisea 42:8) Inaamwo ika a chommong itelapen Kot, äwewe chök, “Chon Föratä,” “Kot Mi Unusen Tekia,” me “Samol mi Lapalap,” nge Kot a pwäratä pwe a kan aücheani nöün kewe mi tuppwöl ren an etiwer ar repwe kör ngeni pwisin itan.

Äwewe chök, lon eü atun, Moses a ereni Kot: “Ai Samol [Jiowa, NW].” (Ekistos 4:10) Atun efinünün ewe imwen fel lon Jerusalem, King Salomon a poputääni an we iotek ren an erä, “Ai Samol mi Lapalap [Jiowa].” (1 King 8:22, 23) Lon än Aisea iotek ngeni Kot fän iten chon Israel, a pwal apasa: “[Jiowa], en semelapem.” (Aisea 63:16) A ffat pwe Semach lon läng a etiwakich pwe sipwe kör ngeni itan.

A lamot sipwe kör ngeni Kot itan we Jiowa, nge a pwal kapachelong chommong mettoch lon ach wesewesen silei i ren itan. Iei än Jiowa pwon usun emön mi tongei me lükü i: “Upwe tümwünü i, pun a silei itei.” (Kölfel 91:14) A ffat pwe a wor chommong mettoch mi kapachelong lon ach silei iten Kot, pun ina kiien ach küna an tümün. Iwe, met a lamot pwe sipwe silei Jiowa ren itan?