Ewe Enlet usun Armaketon

“Ir [chonläng mi ngaw] ra feila ren ekewe kingen unusen fanüfan ar repwe achufengeniir . . .  lon ewe leni mi iteni lon kapasen Ipru Armaketon.”​—PWÄRÄTÄ 16:14, 16.

FÄN ekkoch aramas ra erä pwe Armaketon ina iten eü leeni.

Iwe nge, ifa wesewesen weween ewe kapas “Armaketon”? Pwata chök mwo ewe kapas “Armaketon” a kan weneiti eü mettoch mi fis usun chök eü maun?

Ra Chufengen lon ewe Leeni Itan Armaketon

Ewe popun kapasen Ipru Har–Magedon a wewe ngeni “Chukun Mekito.” Inaamwo ika ese wesewesen wor eü chuuk mi iteni “Chukun Mekito” nge mi wesewesen wor eü leeni itan Mekito. A nonnom lon eü leeni mi öch pokiten a nom lefilen ruuofoch al mi itifengen notouääfengin ewe leeni ewe mwuun Israel loom a nonnom ie. Chommong maun ra fis arapakkan lon ena leeni, nge lon eü me eü ekkena maun, eü pekin a unusen akkufu ewe eü pekin. Ina popun, aramas ra kan eriri ewe it Mekito ngeni maun.a

Iwe nge, aüchean Mekito esap ren met sokkun maun a kan fiffis ikena ie, nge ren ewe popun a wor maun. Mekito ina eü me lein ekkewe leeni lon ewe Fönüen Pwon Jiowa Kot a ngeni chon Israel. (Ekistos 33:1; Josua 12:7, 21) A pwon ngeniir pwe epwe tümünüür seni chon oputer, iwe a apwönüetä. (Tuteronomi 6:18, 19) Ren chök äwewe, Jiowa a äeä an we manaman lon Mekito le tümünü chon Israel ren an maunei chokkewe mi töpworalong lon Israel, weween, Japin ewe kingen Kenan, nöün we meilapen sounfiu Sisera me nöün kewe sounfiu.​—Soukapwüng 4:14-16.

Ina minne, ewe kapas “Armaketon” a liosuetä och mettoch mi fokkun lamot. A wewe ngeni eü fiufengen lefilen ruu pekin mi pöchökkül.

Ewe oesini lon puken Pwarata a fos usun eü fansoun lon mwachkkan atun Setan me nöün kewe chonläng mi ngaw repwe amwökütü mwuun fönüfan meinisin le emwichafengenni nöür kewe sounfiu. Ar föri ena a wewe ngeni pwe ra mochen ü ngeni nöün Kot kewe aramas me ar angang. Ena angangen ü ngeni epwe efisi mäloon chommong aramas lupwen Kot epwe akkufu chon oputer.​—Pwarata 19:11-18.

Pwata ewe Kot mi fen mak lon Paipel pwe i mi ‘ümoumöch, pwal songomang o wöün tong ellet,’ epwe efisi mäloon chommong aramas? (Nehemia 9:17) Ren ach sipwe weweiti föfförün Kot kewe, mi lamot sipwe pölüweni ekkeei ülüngät kapas eis: (1) Iö a akkomw poputääni ewe maun? (2) Pwata Kot a kapachelong lon ena maun? (3) Met sokkun feiöch mi nomottam ena üfengen lefilen Kot me chon koputan epwe atoto ngeni fönüfan me chokkewe mi nonnom lon?

1. IÖ A POPUTÄÄNI EWE MAUN?

Ekkewe chon poputääni ena maunen Armaketon, iir “ekewe kingen unusen fanüfan,” weween ekkewe nöüwisin mwuun fönüfan. Kot esap poputääni ena maun. Nge, fen Kot epwe tümünü aramas mi mürinnö seni ekkewe mi mochen aroserelo. Met popun a wor ena maun? Pokiten Setan epwe amwökütü mwuun fönüfan me ekkewe sounfiu ar repwe unusen maunei nöün Jiowa kewe aramas.​—Pwarata 16:13, 14; 19:17, 18.

Lon ach ei fansoun, ekkoch mwu ra kan aücheani än emön pwisin pwüng le apasawu meefian me filatä an lamalam. Ina popun, aramas rese kon ekieki pwe ekkewe mwuun fönüfan repwe aükükü mwökütükütün lamalam are aroserelo. Iwe nge, än mwuun fönüfan ü ngeni lamalam ra fen fis lon ekkewe fansoun ra lo me a chüen fiffis ikenäi.b Iwe nge, a mwaren wor ruu sokkofesen mi lap usun ekkena angangen fiu ngeni lamalam a fis loom me met epwe fis lon Armaketon. Äeüin, ei fiu epwe fis woon unusen fönüfan. Oruuan, Jiowa epwe appölüwa ena fiu ren ewe sokkun pöchökkül mi lap seni met a äeä me loom. (Jeremaia 25:32, 33) Ewe Paipel a apasa pwe ena üfengen ina ewe “maun lon ewe rän mi lap än Kot ewe mi Unusen Manaman.”

2. PWATA KOT A PWAL KAPACHELONG?

Jiowa a öüröüra chokkewe mi fel ngeni pwe repwe kinamwefengen me tongei chon oputer. (Mika 4:1-3; Mattu 5:43, 44; 26:52) Iwe, resap nöünöü ekkewe pisekin efeiengaw le pwisin tümünüür atun epwe war ena angangen ü ngeni mi kon ssenük. Ika pwe Kot ese angolong pwe epwe amanaua nöün kewe aramas, iwe, repwe rosolo. Iwe, iten Jiowa Kot epwe itengaw. Ika ekkewe chon ü ngeni repwe tufichin arosalo nöün aramas, iwe weween pwe Jiowa esap emön mi tong, pwüng me manaman. Esap tufich an epwe fis ena!​—Kölfel 37:28, 29.

Kot ese mochen epwe nielo emön, ina popun a awora kapasen öüröür usun met epwe föri. (2 Piter 3:9) Ekkewe pworaus mi mak lon ewe Paipel, ra ächchema ngenikich meinisin pwe me loom Kot a appölüwa chokkewe mi ü ngeni nöün kewe aramas. (2 King 19:35) Ewe Paipel a pwal öüröürakich pwe lon mwachkkan atun Setan me nöün kewe sounfiu me an mwuun fönüfan repwe maunei nöün Kot aramas, Jiowa epwe angolong me okkokkuf ngeniir. Pwüngün, än Kot we kapas a fen oesini seni loom pwe Jiowa epwe nielo ekkewe mi ngaw. (Än Salomon Fos 2:21, 22; 2 Tesalonika 1:6-9) Lon ena fansoun, esap wor tipemwaramwar lon ekiekin ekkewe chon ü ngeni pwe ra fen fiu ngeni ewe Kot mi Lapalap.​—Isikiel 38:21-23.

3. MET FEIÖCHÜN ENA ÜFENGEN?

Mwiriloon ewe maunen Armaketon, chommong aramas repwe küna manau. Ina minne, epwe ina poputään ewe kinamwe woon fönüfan.​—Pwarata 21:3, 4.

Ewe puken Pwarata a fos usun “eu mwich mi fokun chocho,” repwe manauewu seni ewe üfengen. (Pwarata 7:9, 14) Fän än Kot emmwen, chokkana repwe älisi le ewili ei fönüfan ngeni eü Paratis, usun met Jiowa a fen tipeni seni lepoputään.

Itä sia silei ineet chon koputen nöün Kot kewe aramas repwe ü ngeniir?

[Sasing lon pekin taropwe 6]

Jiowa Kot a fen tümünü nöün kewe aramas me loom me a nielo chon oputer

[Sasing lon pekin taropwe 7]

Jiowa epwe pwal tümünü nöün kewe aramas lon ewe maunen Armaketon