Iei Álemwiriach Seni Kot

1. Met Jiowa a awora ngeni aramas pwe repwe kúna feiéch?

JIOWA, i emén Kot mi nónnóm tori feilfeiló chék, me a éúréúra ngenikich met a lamot sipwe féri pwe sipwe kúna manaw esemuch. Ekkena kapasen éúréúr rese siwil. Ewe Paipel a erá: “Än ewe Samol kewe kapas repwe nonom tori feilfeilachök.” (1 Pet. 1:23-25) A ifa me watteen ach kilisou pwe Kot a awora ngenikich ewe Paipel me ewe pwóróus mi lamot mi mak lón!

2. Met Jiowa a mochen ach sipwe silei usun i?

² Jiowa a mochen pwe kich meinisin sipwe silei itan. A ákkáeúin mak lón ewe Paipel iten Kot we, Jiowa, lupwen a áweweei pwóróusen án Kot fératá láng me fénúfan. (Ken. 2:4)a Ren án Kot manaman, a makkeei itan fán chómmóng wóón ekkewe faú mi chépép, ekkewe a mak ewe Engol Allúk wóón. Áwewe chék, ewe áeúin allúk a poputá ren ekkeei kapas: “Ngang [Jiowa] om Kot.” (Eks. 20:1-17, NW) Ewe Tefil a sótun le amóeló ewe Paipel pwe sisap tongeni silei Kot me itan we. Nge Jiowa ese mut ngeni an epwe amóeló.​—Kölf. 73:28.

3. Met Kot a pwal mochen ach sipwe káé seni ewe Paipel?

³ Aramas ra eáni chómmóng ekiek mi mwáál usun Kot. Nge Jiowa a mochen kich meinisin sipwe silei ewe enlet. Sia kilisou pwe ewe Paipel a affata ngenikich ewe enlet. (Álleani Kölfel 43:3, 4.) Usun itá sia nónnóm lón saram, nge ei fénúfan a nóm lón rochopwak.​—1 Joh. 1:6, 7.

A WOR ÁLEMWIRIACH MI KKÓLÓ AÚCHEAN

4, 5. Ifa ewe feiéch mi aúchea sia angei lón ewe ier 1931?

⁴ Aramas seni eú chék fénú, a tongeni léllé chék eérenier, napanaper, me minne ra féfféri lón manawer, nge ekkena mettóch ra kan pásini ngeni mwirimwiriir kewe, pwe ikkena álemwirier. Kich Chón Pwáraatá Jiowa, a pwal wor álemwiriach mi fókkun aúchea. Jiowa a álisi néún kewe aramas ar repwe weweiti ewe Paipel, ewe pwóróus mi enlet usun I, me minne a tipeni. A pwal ngenikich eú feiéch mi kkóló aúchean pwe sia iteit seni itan we.

⁵ Sia angei itach we atun ewe mwichelap lón Columbus, Ohio, Merika, lón ewe ier 1931. A mak wóón ewe taropween prokram ekkewe mesen mak “JW.” Emén fin Kraist a erá pwe me ren ekkóch pwiich kewe “JW” a wewe ngeni “Just Wait” (Witiwit Chék) are “Just Watch” (Katol Chék). Nge ekkóch ra pwal mwo nge árere le erá pwe a wewe ngeni “Jehovah’s Witnesses” (Chón Pwáraatá Jiowa). Me mwen ena ier, aramas ra kér ngenikich Ekkewe Chón Káé Paipel, nge meinisin chón aúseling ngeni ena afalafal lón July 26, 1931 ra tipeeú pwe seni ena rán feiló sipwele iteni Chón Pwáraatá Jiowa. A mmen ámmeseik ena rán pún sia angei ewe mineféén it mi feito seni Paipel. (Álleani Aisea 43:12.) Iei alón emén pwiich: “Use tongeni ménúkaaló osomongun ewe púchér me alopolop.” Ese pwal wor eú lamalam mi mochen iteit seni ena it, nge Kot a fen mut ngenikich ach sipwe iteni ena it mi fókkun kkóló aúchean lón lap seni 80 ier iei.

6. Menni pwóróus a kapachelong lón álemwiriach me ren Kot?

⁶ A pwal kapachelong lón álemwiriach ekkewe pwóróus mi pwúng me lamot lón Paipel usun néún Kot kewe chón angang lóóm. Áwewe chék, a mak pwóróusen Apraham, Isaak me Jakop. Ese mwáál, ekkeei mwán ra pwóróusfengen me ar kewe famili ren ifa usun repwe apwapwaai Jiowa. Ina popun, sise máirú ren án Josef úppos pwe esap tipis me koon ren pwúlúwen Potifar we. (Ken. 39:7-9) Ekkewe popun Chón Kraist ra kan kákkáitfengen lefiler pwóróus usun Kot. Paulus a ereni ewe mwichefel minne Jesus a áiti ngeni usun ewe Fááfen Ach Samol. (1 Kor. 11:2, 23) Ekkeei pwóróus meinisin ra mak lón Paipel pwe sipwe tongeni káé ifa usun sipwe fel ngeni Kot. (Álleani Johannes 4:23, 24.) Ewe Paipel a tongeni álisi aramas meinisin, nge itá kich néún Jiowa aramas sipwe fen kon aúcheani.

7. Menni pwon kinikinin ach álemwir?

⁷ Jiowa a pwal álisi néún kewe aramas ikenái. (Kölf. 118:7) Sia tongeni álleani seni néúch kewe puk ifa usun a kan túmúnúúr. Ei mettóch a anúkúnúkúkich, inaamwo ika sia nóm fán riáfféú mwáál. Ewe Paipel a pwonei pwe ese wor pisekin maun, are án aramas sótun efeiengawakich, epwe tongeni sópwéch. Ika ekkóch repwe sótun etipisi néún Kot kewe aramas lón imwen kapwúng, iwe, epwe leteló mwirin pwe iir mi mwáál pún ach pwúng a feito seni Jiowa. Pwal iei kinikinin ach ‘feiöch’ are álemwiriach me ren Kot. (Ais. 54:17) Satan esap tongeni efisi och mettóch an epwe efeiengawakich tori feilfeiló.

8. Met sipwele káé lón ei lesen me ewe lesen mwirin ei?

⁸ Satan a fen sótuni le amóeló ewe Paipel, eppeti án aramas repwe silei iten Kot we Jiowa, me amonomonaló ewe enlet. Nge a sópwongaw. Lón ei lesen me ewe lesen mwirin ei, sipwe pwóróus wóón (1) ifa usun Kot a túmúnú ewe Paipel me ewe pwóróus lón pwe resap móló; (2) ifa usun Jiowa a túmúnú pwe aramas repwe tufichin silei itan we; me (3) ifa usun Kot a atufichikich ach sipwe silei ewe enlet ikenái.

JIOWA A TÚMÚNÚ EWE PAIPEL ME EWE PWÓRÓUS LÓN

9-11. Ifa usun Jiowa a túmúnú ewe Paipel?

⁹ Fán chómmóng aramas ra sótun amóeló ewe Paipel, nge Jiowa a túmúnú. Ewe lamalamen Katolik a fen sótuni le eppeti aramas seni ar álleani ewe Paipel. Lón ewe ier 1229, eú mwichen néúwisin ena lamalam lón France a féri eú allúk mi affata pwe a mwáál án aramas repwe álleani ewe Paipel lón pwisin fósun fénúer. Lón ewe ier 1234, Spein a pwal féri ena esin allúk. Mwirin, lón ewe ier 1559, ewe papa pin itan Paul IV a apachaalong ewe Paipel lein ekkewe puk mi pinepin án aramas repwe néúni are printini ika ese wor mumutáán seni ar lamalam.

¹⁰ Inaamwo ika aramas ra sótun le amóeló ewe Paipel, nge Jiowa a túmúnú an we Kapas. Órun ewe ier 1382, John Wycliffe a afféúni ewe áeúin Paipel lón fósun Merika. William Tyndale a pwal afféúni ewe Paipel lón fósun Merika. Nge ren an féri ena, a ninniiló lón ewe ier 1536. Ra fétatá wóón efóch irá me a púchérútá me apasa: “Samol, kopwe suuki mesen ewe kingen England.” Mwirin ra ffórusi, me kenaló inisin.

¹¹ Lón ewe ier 1535, Miles Coverdale a pwal afféúni ewe Paipel lón fósun Merika. Lón an afféúni ekkóch kinikinin ena Paipel a néúnéú ewe afféún Paipel me ren Tyndale. Nge Coverdale a pwal afféúni ekkóch kinikinin ena Paipel seni ewe Paipel lón fósun Latin me seni fósun Tois, ewe Martin Luther a afféúni. Lón ach ei fansoun, néún Jiowa kewe aramas ra féri ewe New World Translation of the Holy Scriptures. A fataffatéch, a pwúng me a álilliséch lón ewe angangen afalafal. Satan are ekkewe aramas resap tongeni amóeló ewe Paipel.

JIOWA A TÚMÚNÚ PWE SIPWE TONGENI SILEI ITAN WE

12. Ifa usun ewe New World Translation a fen álisi aramas le silei iten Jiowa we?

¹² Jiowa Kot a túmúnú pwe itan we esap unusen móló seni lón ekkewe Paipel meinisin. Lupwen pwiich kewe ra féri ewe New World Translation, ra féréchú pwe repwe eliwinaalong iten Kot we, Jiowa, lón iteiten ia a mak ie lón ewe popun Paipel. Iten Kot lón Tesin Ipru a mak fán 6,973 me lón Tesin Krik a mak fán 237. Iei, ewe New World Translation a kawor lón lap seni 116 fósun fénúfan me a fen peres lón lap seni 178,545,862 kapi.

13. Pwata sia silei pwe seni lepoputáán aramas, iir ra fen silei iten Kot we?

¹³ Ewe áeúin pean aramas, Atam me Efa ra silei me néúnéú iten Jiowa we. Noa a pwal pani ena it. A erá: “Sipwe mwareiti [Jiowa] än Säm we Kot.” (Ken. 4:1; 9:26) Kot a pwisin pani itan we lupwen a fós ngeni aramas. A erá: “Ngang [Jiowa], iei chök itei. Iwe, üsap ngeni eman kot ai ling.” Kot a pwal apasa: “Ngang [Jiowa], esap wor eman lüki, esap pwal wor eman Kot lüki.” (Ais. 42:8; 45:5) Jiowa a túmúnúéchú pwe aramas wóón unusen fénúfan repwe tongeni silei itan we. Sia feiéch pwe sia tongeni néúnéú iten Jiowa we me sia néún Chón Pwáraatá! Ina weween alón ewe Paipel, a erá: “Sipwe pwal aürätä ach filaik fän iten ach Kot.”​—Kölf. 20:5.

14. Me lúkún ewe Paipel, ia sia pwal tongeni kúna me ie iten Kot we?

¹⁴ Esap chék lón ewe Paipel a pwá me ie iten Kot we. Áwewe chék, sia pwal tongeni kúna me wóón ewe faú itan Moabite Stone, a pwá me lón Dhiban (lón Paipel Tipon), 13 mwail étiwen ewe Setin Máló. A mak wóón ena faú och pwóróus usun King Omri, ewe kingen Israel. A pwal mak met ewe kingen Moap, King Mesa a apasa usun an maun ngeni Israel. (“Iwe, Omri a mäla, nge ra peiaseni lon Samaria. Nge Ahap nöün we mwän a siwili lon wisan wisen king.” (1 King 16:28; 2 King 1:1; 3:4, 5) A mak wóón ena faú iten Kot we lón Tetragrammaton (ekkewe rúáánú mesen makken Ipru YHWH). Sia pwal tongeni kúna iten Kot we mi mak fán chómmóng wóón ekkewe pwiin taropwe, itan Lachish Letters, mi ffér seni rume seni pwúl ra kúna me lón Israel.

15. Menni ewe puk ra eita ngeni Septuagint, me pwata a lamot?

¹⁵ Lap seni 2,000 ier lóóm, a afféú ewe Tesin Ipru (ekkewe puk lón Paipel seni Keneses tori Malakai) lón fósun Krik, ra eita ngeni Septuagint. Pwata a lamot an afféú ewe Tesin Ipru lón fósun Krik? Ekkewe chón Jus ra eoló lón Papilon úkúkún 70 ier. Iwe, lupwen ra towu lón ewe ier 537 mwen Kraist, ekkóch leir ra filatá ar repwe nómoló Papilon. Nge mwirin och fansoun, chómmóng chón Jus ra mwékút ngeni Alexandria lón Isip, ikewe aramas ra fós lón fósun Krik. Iwe, a lamot ngeni ekkeei chón Jus ewe Tesin Ipru mi afféú lón fósun Krik. Lón ekkóch kapiin ena Septuagint, iten Kot we a mak lón fósun Ipru.

16. Ifa usun ewe puk itan “Bay Psalm Book” a néúnéú iten Kot we?

¹⁶ Ewe áeúin puk a peres lón Merika lón ekkewe leeni mi nóm fán nemenien mwúún England, ina ewe puken Kélfel mi afféú lón fósun Merika seni fósun Ipru. A mak iten Kot we mi pin lón. Iten ena puk “Bay Psalm Book” me a peres lón ewe ier 1640. Eú me lein ekkewe wokisin a mak iten Kot we lón, ina lón Kölfel 1:1, 2, nge iei itechikin: Iehovah. Ena wokisin a erá pwe mi feiéch emén mwán ese aúseling ngeni ewe mi ngaw, nge a pwapwaiti “allúkún Iehovah.” Ren pwal ekkóch pwóróus usun iten Kot we, nengeni ewe puk itelapan The Divine Name That Will Endure Forever.

JIOWA A TÚMÚNÚ PWE SIPWE SILEI EWE ENLET

17, 18. (a) Met weween ewe enlet? (b) Ikkefa ekkewe pwóróus ra kapachelong lón “enletin ewe Pworausen Manau”?

¹⁷ Sia pwapwa le angang ngeni Jiowa, “ewe Kot mi allükülük [“Koten enlet,” NW].” (Kölf. 31:5) Met weween enlet? A wewe ngeni ekkewe pwóróus usun och mettóch, nge mi wesewesan. Lón ekkewe popun fós ewe Paipel a mak lón ra afféwú ewe kapas “enlet” ren ekkewe kapas mi wewe ngeni mettóch mi pwúng me mettóch sia tongeni lúkúlúk wóón.

¹⁸ Jiowa a túmúnúéchú pwe sipwe silei ewe pwóróus mi enlet ikenái. Me a ákkálisikich le alapaaló ach silei ewe enlet. (2 Joh. 1, 2) Ina met Än Salomon Fos 4:18 a apasa: “Ewe al ekewe chon pwüng ra fetal won a usun chök saramen ünümweerän mi chök sasaramala tori a unusen ränila.” Iei alón Jesus lón an iótek ngeni Kot: “Om kapas a let.” (Joh. 17:17) A mak lón án Kot we Kapas “enletin ewe Pworausen Manau,” weween mettóch meinisin Chón Kraist ra lúkú. (Kal. 2:14) A kapachelong ewe pwóróus mi enlet usun iten Jiowa, an we nemenem, án Jesus we asorun méén kepich, ewe manawsefál me ewe Mwú. Iei, sipwe káé ifa usun Kot a fen túmúnú ewe pwóróus mi enlet inaamwo ika Satan a sótun le amonomonaló.

JIOWA A EPPETI ÁN SATAN SÓTUN AMONOMONALÓ EWE ENLET

19, 20. Ié ena Nimrot, me met aramas ra sótun féri atun an nemenem?

¹⁹ Mwirin ewe Noter, a wor emén chón liapeni man itan Nimrot, i a ú ngeni Jiowa. (Ken. 10:9) Pokiten i a ú ngeni Kot, iwe, a wesewesen fel ngeni Satan. Nimrot a usun chókkewe mi ú ngeni Néún Kot we. Iei alón Jesus ngeniir: “Ämi nöün sememi, ewe Tefil, ämi oua chök mochen apwönüetä mochenin sememi,” ewe “esap fokun nom won pekin let.”​—Joh. 8:44.

²⁰ Nimrot a nemeni Papel me pwal ekkóch telinimw mi nóm lefilen ekkewe chénúpupu Tikris me Oifrat. (Ken. 10:10) Neman, i ewe a popuetá ewe telinimwen Papel me an we imw tekia órun ewe ier 2269 mwen Kraist. Jiowa ese mochen aramas repwe nónnóm lón eú chék leeni, nge ekkewe chón aúetá Papel ra erá: “Ou etto, sipwe aüetä eu telinimw fän itach, pwal eu imw mi tekia, ungan epwe tori läng. Pun sipwe afisätä itach ren pwe sisap toropasfeil won unusen fanüfan.” Nge rese tongeni áwesi kaútáán ewe imw tekia pún Kot a “alikofifi fosun aramas meinisin,” iwe, ekkewe aramas ra toropasfetál. (Ken. 11:1-4, 8, 9) Satan a mochen amóeló ewe fel mi enlet me féri pwe meinisin repwe fel ngeni i. Nge Jiowa a túmúnú ewe fel mi enlet. Iwe iei, iteiten rán a chóchchómmóngóló chón fel ngeni I.

21, 22. (a) Pwata ekkewe lamalam chofona resap tongeni amóeló ewe fel mi enlet? (b) Met sipwele káé lón en lesen mwirin ei?

²¹ Ren enletin esap tongeni tufich án lamalam chofona epwe wesewesen amóeló ewe fel mi enlet. Met popun? Pún Jiowa, ach we Soukáit mi Lap, a fen túmúnú pwe epwe nóm rech ewe Paipel, a túmúnú pwe sipwe silei itan we, me silei ewe enlet. (Ais. 30:20, 21) Lupwen sia fel ngeni Kot lón ewe napanap a pwapwaiti, iwe, sipwe wesewesen pwapwa. Nge mi lamot sipwe túmúnúéchú pwe sipwe chék lúkú minne mi enlet me fiti emmwenien án Kot we manaman mi fel.

²² Lón en lesen mwirin ei, sipwe káé ifa usun ekkóch lamalam ra poputá le áiti ngeni aramas afalafal mi chofona usun Kot. Sipwe káé pwe ekkena afalafal esap áitien ewe Paipel. Sipwe pwal kúna pwe Jiowa a fen efeiéchúkich ren an awora ngenikich ekkewe pwóróus mi enlet usun i. Ikkena álemwiriach mi kkóló aúchean.