Ekkewe Kapwúng Seni Kot​—Iir Féfférún Kirikiringaw?

REN an epwe pélú ei kapas eis, sipwe nengeni ruu pwóróus lón Paipel usun án Kot kewe kapwúng. Ikkeei, ewe Noter lón fansoun Noa we me karosolóón ekkewe chón Kanaan.

EWE NOTER LÓN FANSOUN NOA WE

MET EKKÓCH ARAMAS RA ERÁ: “Kot a kirikiringaw ren an aworato ewe Noter me nieló aramas meinisin wóón fénúfan, chilóón chék Noa me an famili.”

MET EWE PAIPEL A APASA: Kot a erá: “Üsap pwapwaiti mälan eman chon föföringau, nge üa mochen pwe ewe chon föföringau epwe kul seni an tipis o manau.” (Isikiel 33:11) Ina popun Kot ese fókkun pwapwaiti málóón ekkewe mi ngaw lón fansoun Noa we. Nge met popun Kot a féri ena?

Ewe Paipel a apasa pwe lupwen Kot a tinató an kapwúng wóón ekkewe aramas mi ngaw lón fansoun lóóm, a féri pwe epwe eú “minen afalafal [are minen éúréúr] ngeni chon fofor ingau mwirin.” (2 Petrus 2:5, 6, Testament Mi Fö) Ewe Paipel a pwal áweweei met ekiekin Kot me met a kan féfféri atun epwe aworato an kapwúng wóón aramas mi ngaw. Ifa ekiekin Kot me féfférún?

Áeúin, Kot a affata pwe inaamwo ika a meefi letipechou ren an nieló aramas, nge a chechchemeni lupwen aramas ra kirikiringaw me efisatá riáfféú, me i a kan ngeni ekkena sókkun aramas chappen ar féffér. Iwe lón mwachkkan, Kot epwe unusen áwesaaló pwúngúngaw me riáfféú.

Oruuan, minne Kot a féri lóóm a áiti ngenikich pwe mwen án Kot tinató eú kapwúng, a pwáraatá an tong ren an akkomw awora éúréúr. Noa a éúréúra ekkewe aramas nge rese aúseling ngeni i. Ewe Paipel a erá: “Iwe rese mo tepereni met a fis tori ewe noter a feito o a sonireno meinisin.”​—Mateus 24:39, Kapasen God.

A kan ina usun met Kot a féri? Ewer. Áwewe chék, a éúréúra néún kewe aramasen Israel pwe ika ra féri féfféringaw usun met ekkewe mwú únúkkúr ra féfféri, iwe epwe mut ngeni chón koputer kewe ar repwe tééki fénúer, ataieló ar we iolapen telinimw Jerusalem, me repwe eoló. Iwe ekkewe chón Israel ra féri ekkewe féffér mi ngaw, ra kan mwo nge eáni asor néúr kewe semirit. Iwe met, Jiowa a apwúngúúr? Ewer, nge akkomw a tittinaaló néún kewe soufós pwe repwe éúréúrer ar repwe siwili féfférúr atun a chúen suuk ngeniir. A mwo nge apasa: “Kot ewe Samol mi Lapalap esap föri och ika esap pwäri mwo mine a ekiekietä ngeni nöün chon angang ekewe soufos.”​—Amos 3:7.

IFA USUN A WENEITUK: Ekkewe mettóch Jiowa a kan féri atun an kewe kapwúng me lóóm ra ngenikich ápilúkúlúk. Sia tongeni lúkúlúk pwe Jiowa epwe apwúngú ekkewe mi kirikiringaw mi efisatá riáfféú. Ewe Paipel a apasa: “Pun ekewe aramasangau repwe käriwu, . . . nge ekewe chon tipetekison repwe fanüeni ewe fanü o pwapwaäsini ar feiöch me kinamwe mi somwola.” (Kölfel 37:9-11) Met meefiom usun ewe sókkun kapwúng epwe angasaaló aramas seni riáfféú? Ina eú féfférún kapwúng mi kirikiringaw are mi kirekiréch?

KAROSOLÓÓN EKKEWE CHÓN KANAAN

MET EKKÓCH ARAMAS RA ERÁ: “Karosolóón ekkewe chón Kanaan ina eú féfférún kirikiringaw mi léllé ngeni met a kan fiffis ikenái ren karosolóón unusen eú einangen aramas.”

MET EWE PAIPEL A APASA: “[Án Kot] kewe al meinisin ra pwüng. I eman Kot mi allükülük, esap wor an mwäl.” (Tuteronomi 32:4) Án Kot féfférún kapwúng wóón mettóch ese léllé ngeni ewe maun a kan fis lefilen aramas. Pwata? Pokiten Kot esap usun aramas, i a tongeni álleani masouen letipen aramas, weween a silei ika iir met sókkun aramas me lón.

Áwewe chék, lupwen a apwúngú ekkewe telinimw Sotom me Komora me a fen apwúngaló pwe repwe kataló, iwe ewe mwán mi tuppwél Apraham a lólilen ika mi fen pwúng minne Jiowa a apwúngaló. Ese tongeni ekieki pwe an we Kot mi pwúng epwe “wesewesen niela chon pwüng fiti chon pwüngingau.” Iwe, fán mosonottam, Kot a alúkúlúkú ngeni Apraham pwe ika mi wor mwaren engol aramas mi pwúng lón Sotom, esap ataieló ewe telinimw. (Keneses 18:20-33) A ffat pwe Kot a etittina letipen ekkena aramas me a kúna úkúkún ngawer.​—1 Kronika 28:9.

Pwal ina chék usun, Kot a apwúngaló pwe ekkewe chón Kanaan iir mi fókkun ngaw, iwe a pwúng an filatá ar repwe ninniiló. Ekkewe chón Kanaan ra iteféúló lón ar kirikiringaw, ra mwo nge eáni asoren kek néúr kewe nge ra chúen manaw.a (2 King 16:3) Ekkewe chón Kanaan ra silei pwe Jiowa a fen allúkú ngeni chón Israel ar repwe fénúeni unusen ewe fénú. Chókkewe mi filatá ar repwe nómotiw lón ewe fénú me maun ngeni chón Israel, rese chék ú ngeniir nge ra pwal ú ngeni Jiowa, ewe a fen pwáraatá pwe i a nónnóm ren néún aramas.

Pwal och, Kot a kirekiréch ngeni ekkewe chón Kanaan mi péútaaló ar féffér mi ngaw me álleasochisi án Jiowa kewe allúk. Áwewe chék, Rahap, emén fin Kanaan fin lisowu, me an we famili ra kúna manaw. Chón ewe telinimw Kipeon ra pwal tingorei chón Israel ar repwe kirekiréch ngeniir, iwe, iir meinisin me néúr kewe ra kúna manaw.​—Josua 6:25; 9:3, 24-26.

IFA USUN A WENEITUK: Sia tongeni káé eú lesen mi lamot seni ewe kapwúng mi fis ngeni ekkewe chón Kanaan. Sia arapakkan ngeni ewe rán ewe Paipel a oesini usun, “ewe rän, lupwen ekewe aramas resap meniniti Kot repwe küna kapwüng me mäla.” (2 Petrus 3:7) Ika sia tongei Jiowa me féri minne mi pwúng me ren, sipwe kúna feiéch lupwen epwe amóeló ekkewe riáfféú ren an nieló meinisin chókkewe mi ú ngeni an nemenem mi pwúng.

Jiowa a áchema ngenikich fán tong pwe ekkewe kefil sam me in ra féri a kkúú manawen néúr kewe. Án Kot we Kapas a erá: “Oupwe filätä manau, pwe ämi me mwirimwirimi kana oupwe manau. Oupwe echeni ewe Samol mi Lapalap ämi we Kot, oupwe aleasochisi alon o fitipacheiti.” (Tuteronomi 30:19, 20) Ekkena kapas, alon emén Kot mi kirikiringaw are alon emén Kot mi tongei aramas me mochen ar repwe féri kefil mi múrinné?