Dhilebiwe na Luka

4 Mmalelani Yezu wodhalene muya wa Mulugu ovenya mu Jordau, muyayá omuttukulela mwiddeddereni 2 mwa malabo 40 vina Ddiabo omweha. Malabwene abo iyene kaja elo, nona omamalelowa okaliwa dala. 3 Venevo Ddiabo omwaddela dhahi: “Akala weyo oli mwana Mulugu, kalamula nlugu ntti nisadduwe nikale pawu.” 4 Mbwenyi Yezu omwakula: “Elebiwa: ‘Muttu kankalawo na ojavi bahi.’”

5 Venevo Ddiabo omuttukulela mburo wolapa-lapa, mwa mudhidhi mung’onovi, omutonyihedha omwene wotene wa mwilaboni. 6 Vasogorhova Ddiabo omwaddela: “Ddinele ouvaha omwene obu wotene vamodha na nttittimihona vowi ddiperhekeliwa, ddinonvaha oninfunemina. 7 Nona ogaddebedha dila modha, dhotedhene dhinakale dhawo.” 8 Yezu omwakula dhahi: “Elebiwa, ‘Omwebedhe Yehova Mulugu wawo, vina omulabelege iyene bahi.’”

9 Vasogorhova, Ddiabo omuttukulela Yezu o Jeruzalemi, omuweliha mburo wolapa-lapa wa mparha, ohiloga dhahi: “Akala weyo oli mwana Mulugu, kalupela vati, 10 vowi elebiwa: ‘Iyene onele waruma anju aye wi aubarele,’ 11 vina, ‘Awene anele ougapa mmadani mwawa wila nnyalo nawo nihivade nlugu.’” 12 Yezu omwakula eraga: “Elogiwa dhahi, ‘Kumwehe Yehova Mulugu wawo.’” 13 Mmalele dhoweha dhotene, Ddiabo omuttiya ajedhelaga mudhidhi mwina wofwanyela.

14 Yezu ohiyelela o Galileya na guru dha muya wokoddela. Vina miselu dhapama mwaha waye dhihivuwa mirudda dhotene dhowaddamela. 15 Ottiya ejo, iyene oroma osunziha mmasinagoga* mwawa, vina otene annimuttittimiha.

16 Mmaleliye ovenya odhowa o Nazareti wunuwiliye, wenewo ninga mwalemeleliye ovolowa musinagoga* siku na Sabuddu vina ovenya wi engese. 17 Ovahiwa rolu ya namavuhulela Izaiya, mfuguleliye ofwanya valebiwe dhahi: 18 “Muya wa Yehova oli na miyo vowi iyene oddittikittela walaleyela muselu wapama ayelegi. Oddiruma wi ddalaleyele afugeliwe ofuruliwa wawa, aliba ohona wiyelela wawa wona, wavuna ampujiwa, 19 wi ddilaleye yaka ya nttebwa na Yehova.” 20 Mmaliliye ofunya roluyá ohimperhekela mukamihedhi, odhowa ogilati; vano otene àli musinagogamwá* andidela omwang’ana. 21 N’eji oroma wawaddela: “Malebo aba ewalinyu ddabuno ahakwanihedheya.”

22 Otene aroma omuloga deretu vina annagalala na mazu olibiha abudduwa mwano mwaye, awene anloga: “Oddu kahiyo mwana Jozé?” 23 Nona iyene ohawaddela: “Mohaganyedha nyuwo munele olabihedha mazu aba muddaddagana miyo, ‘Mediku kavivulumutxe wamwinya. Vina okose okuno sidadi yawo dhotedhene dhiwalihu wi ohikosa o Kafarnau.’” 24 Iyene ohiloga: “Ddinouwaddelani ebaribari, kawo namavuhulela onrumeliwa mwilaboni mwaye. 25 Ddinouwaddelani ebaribari wi: Masaka a Eliya, mu Izrayel mwahikala amamukwela enjene venevo vafugeyile wirimu mwari mwa vyaka ttaru na myeri mitanu na mmodha vina mwilabonimwa muhikala dala enddimuwa. 26 Masiki dhawene, mwa ayana abo otene, Eliya karumeliwevo nne mmodha, ahili mamukwela w’o Sarefa wakala elabo y’o Sidoni. 27 Vina nsaka na namavuhulela Elizeu, mu Izrayel mwahikala attu enjene anna maranya, mbwenyi aboyá kavulumutxiwe, ahili Naama mukadda Síria.” 28 Otene àli musinagoga* ewa esidhá asilidhiwa vaddiddi, 29 avenya amuttukulela otakulu wa sidadi, momaguva amuttiya nikome na mwango vamagiwe sidadiyá wi amutukumele mutxiddo. 30 Mbwenyi Yezu ovira vari vawa vina odhowa.

31 Mmaleliye ofiya o Kafarnau, sidadi modha y’o Galileya. Wenewo oroma osunzihawo siku na Sabuddu, 32 vina awene atikina na masunziho aye vowi waloga na owodha. 33 Musinagogamwá* mwahikala mulobwana wavolowiwe muya wabure, venevo okuwa na lizu noliba: 34 “Ah! Yezu Munazareti, onfuna nni na iyo? Odhele onitolotxa? Miyo txibarene ddinouziwa weyo, oli Mukoddeli wa Mulugu.” 35 Mbwenyi Yezu osaddeya muyayá, eraga: “Kamaala, omuttiye muttu oddo.” N’eji muyayá wabure mmaleliye omponyedha vati mulobwana ole vari vawa, obudduwamo ahimvoreyile. 36 Venevo otene ahuma milomo aroma ologa muttu na mukwaye: “Abaya mazu gani? Iyene onolamula muya dhabure na owodha vina na guru, muyadhá dhinobudduwamo!” 37 Nona sabwa ya ejuwene, miselu dhalogiwa mwaha waye dhihivuwa mirudda dhotene dhawaddamela.

38 Mbudduweliye musinagoga,* odhowa vatakulu va Simoni. Nyezeli wa Simoniyá wali muredda, wela otabuwa venjene na febiri; vano Yezu okumbirhiwa wila amukamihedhe. 39 Venevo Yezu omuworomela, onyanyuwela febiri, febiriyá emuttiya. Mudhidhene obo nyezeliyá wa Simoni ovenya vina oroma wapiyela.

40 Nzuwa niddowelaga, attu otene abulela na viredda dhottiyana-ttiyana attukuleliwa vàli Yezu, iyene wannimutapulela nlada mmodha-mmodha vina wannavulumutxa. 41 Adomonyo vina ambudduwa mwa enjene akuwaga: “Nyuwo muli Mwana Mulugu.” Vano Yezu wannanyanyuwela vina kattiya muyadhá ologa, vowi dhanziwa wi iyene wali Kristu.

42 Vano muyele vati, iyene ovenya odhowa mburo wayene. Venevo muttitti oroma omutamela afiya mburo waliye vina atamela omukoddiha wila ahibudduwe mburo obule. 43 Vano iyene ohawaddela: “Enofuneya wi ddalaleyele miselu dhapama dha Omwene wa Mulugu, attu a sidadi dhina vowi jijene erumeliwemi.” 44 Dhahene iyene odhowa alaleyagavi mmasinagoga* dh’o Judeya.