Merelo a Arumiwi
28 Mvuneyelihu nifiyedha oziwa wi suwa ejile yakuweliwa Malta. 2 Attu a vasuwaniva ànakela na mada meli, vowi muzogwe wanrubwa vina elaboyá yanridha, agasa motto vina anirela dhapama. 3 Paulo oddoddela kuni ohika vamottoniva, mwaha wa oviha mukwininimwa mubudduwa evili emulumile nlada emuwaddelela. 4 Attu a vasuwaniva monelani nowa ejile jilivi na nlada naye aroma ologa muttu na mukwaye: “Txibarene mulobwana oddu panga masiki owodhilevi ovuneya mbara, Oligana* kumuttiyile wi akalewovi.” 5 Paulo ohurudhela nowaya vamottoni mbwenyi kapadduweliwe elo. 6 Vano awene anjedhela wi onele oviba obe onele omotta morurumutxa-mwene akwe. Mmalelani ojedhela venjene oná wi kiyapadduwa elo, asaddula dhobuwelani aroma ologa wi iyene wali mulugu.
7 Waddamanana venevale vakala mindda dha mulobwana dhahi munddimuwa wa suwa ejo wakuweliwa Públio; iyene onakela pamene ninga aleddo aye mwari mwa malabo mararu. 8 Babi wa Públio wali muredda vakamani, wanna febiri na eredda yovaluwa, venevo Paulo odhowa omona vina olobela, omutapulela mada vina onvulumutxa. 9 Mpadduweli esidhá, aredda ena akala vasuwa aroma omutamela vina anvulumutxiwa. 10 Awene ahoniha otamalela wawa anivahaga dhilobo dhinjene, vina nifunaga odhowa anivaha dhotedhene dhanijombela.
11 Mvirele myeri miraru nivenya na paporho wanna osogorhowa ezinddiyelo ya “Ana Zeu”; paporho oddo wali w’o Alexandriya vina nsaka n’oridha wali vasuwa. 12 Nisama o Sirakuza, nikala wenewo malabo mararu. 13 Wenewo nidhowanavi oleddo wehu nifiya o Rejiyo, mmangwananimwá eroma woba pevo yadhana ogusuni,* dhahene siku nanawilina nifiya o Putéoli. 14 Wenewo nihafwanya abali ena anididelile okala na awene masiku matanu na meli, mmalelihu nihinyalela o Roma. 15 Abali a wenewo mwiwalani wi iyo nel’odha, ahidhowa vamusika wa Ápiyu vina adhowa vali Nyumba Tarhu Mwakeliwa Aleddo.* Paulo mwawoneliye omutamalela Mulugu vina olibiheya. 16 Mfiyedhihu o Roma ehirumelihiwa wi Paulo akalege yeka na munyakoddo mmodha wi amwang’anelege.
17 Mvirele malabo mararu iyene ohakuweliha alobwana ottittimiheya a Ayuda; mfiyedhani ohiloga: “Alobwanani, abali, masiki miyo ddihikosile elobo yabure na nlogo nehu vina ddihilupile dhilemelelo dha azamani ehu, ddihifugeliwa o Jeruzalemi vina ddiperhekiwa mmadani mwa akadda Roma. 18 Mmalelani oddivuza, afuna addifurule sabwani kaddifwanyilena muladdu waddifwanyeliha opiwa. 19 Vowi Ayuda kafunile wi ddifuruliwe ddittukuleleya okumbirha wi ddattongiwe wa Sézari, mbwenyi kahiyo wi ddahikana muladdu wosumelana nlogo naga. 20 Jijene yukuwelihileni miyo wi ddiloge na nyuwo vina dduwoneni, sabwani bu mwaha wa njedhelo na ana Izrayel omageliwemi na kurenti eji.” 21 Awene amwakula: “Iyo kanakelile makarta adhile o Judeya mwaha wawo, vina abali otene adhilewo kavo ologile nne elobo modha yabure ekosiliwe. 22 Nona nihona wi japama wiwa dhinubuweliwe, sabwani enziwehu mwaha wa nikuru ntti niswa, jawi ninopambihiwa epaddi yotene.”
23 Dhahene alaganela ogumana na iyene siku nina, nona attu enjene adhowa ogumana na Paulo mburo wakaliye. Oromana membesi ofiyedha txiguwo iyene ohavaha onamoona àtapulelagamo mowakwana-mwene mwaha wa omwene wa Mulugu, vina iyene wanlabihedha Nlamulo na Mizé na dhilebile Anamavuhulela wi àttukulele omuroromela Yezu. 24 Attu ena anrumela dhilobo dhalogiye oku ena akoddaga. 25 Ninga vahiteya ohiwanana mukalelani, aroma obalaleya, venevo Paulo ologa mazu aba:
“Muya wokoddela ohiloga na azamani enyu na mazu a namavuhulela Izaiya anloga, 26 ‘odhowe waloge dhahi na nlogo ntti: “Nyuwo munele wiwa, vano kamunanonelemo, munele wang’ana, vano kamunone elo. 27 Nlogo ntti ttawuma murima, awene afuga maru awa na mento awa, wila ahiwodhege wona na mento awa, wiwa na maru awa; wi ahinonelemo na murima wawa, atxinuwá, miyo ddavulumutxa.”’ 28 Vano muziwe wi muselu obu wovuna wa Mulugu ohirumeliwa attu a malogo meena; awene anele ovuruwana.” 29* ——
30 Dhahene iyene okalavi mwari mwa vyaka bili nyumba yapitxeliye, vina wannawakela na mada meli otene adhowa omona, 31 àlaleyelaga omwene wa Mulugu vina àsunzihaga mwaha wa Nabuya Yezu Kristu na oliba murima,* ahikoddihiwaga na muttu.