Kaana Ekalelo Ya Wawonana Akwawo Ttima Empitta Yawo
Niparha na Makaniya
Omukumbela vaye onowattukulela attu otanyana. Ole onna ekalelo ya omukumbela vaye, opama onfuna wayevi bahi. Iyene onivoona ninga wa ttima opitta akwaye; onofiyedha wubuwela wi olitxi wofwanyela ddi iyene. Iyo kanubuweleni wi kaninagwele mmuregani ninga mpu, vowi muttu-muttu onowaddameliwa ekalelo eji. Ensiklopedia Britanika ehiloga dhahi: “Attu a [yeddelo] yottiyana-ttiyana—anovittittimiha venjene obuwelaga wi akwawa kahiye elo—awene anologa wi mweddelo wawa, dhoja dhawa, mwabalelo wawa, mwebedhelo wawa, ekalelo yawa na dhina dha malogo awa, sattima opitta dha malogo mena.” Txini enfwanyelihu okosa wi nirebette dhubuwelo esi dhotowa malago?
Txini Dhinloga Bibilia
“Muthu-muthu na ovyeviha onddimuwa awonegena akwaye thima enpitha yaye.”—FILIPI 2:3.
Eji enttapulela nni? Akala iyo ninfuna nirebette ovittukulela, ninofwanyela weddana merelo anttiyana na ovittukulelawa—ali ovyeviha. Ovyeviha ononittukulela ozinddiyela wi dhihikalawo dhilobo dhihinwodhihu, esuwene dhinwodha attu akwihu. Mwilaboni kanimo nikuru na attu nina owodha wa dhotedhene obe ninkosa dhotene dhapamavi.
Karoma woona empadduwele Stefan. Iyene wunuweli mwilaboni mwaye, mbwenye ohiwodha orebetta ekalelo eji ya watanya attu ahili a elabo yaye. Stefan ohiloga: “Miyo ddihizinddiyela wi wawonana attu akwawo ttima empitta yawo, enoburutxamo mmirimani ekalelo ya otanya. Kaddinziwa dha malogo otene. Mbwenye ddinoziwa wi dhihikalawo dhilobo dhinfwanyelimi osunza mwari mwa yeddelo ya malogo meena.”
Txini Enfwanyeliwe Okosa
Katamela oziwa ebaribari mwaha wa ejile eliwe, kudduwale wi weyo oli muttu onvonya. Dhihikalawo dhihinwodhiwe okosa esuwene dhinwodha akwawo. Kuwubuwele wi attu a malogo otene anna ekalelo modhene.
Ohinatti omubuwela mubureni muttu ohili wa elabo yawo, karoma ovivuza dhahi:
Kudduwale wi dhihikalawo dhihinwodhiwe okosa esuwene dhinwodha akwawo
‘Yeddeloya eji ehinziveliwana miyo, el’okala yabure obe el’ottiyana na yaga?’
‘Muttu oddu agatamela obure mwari mwa yeddelo ya elabo yaga kanafwanyemo?’
‘Txini enwodhetxa muttu oddu deretu opitta miyo?’
Weyo agakula mavuzo aba na ekalelo y’ohivipelana malago, kunawodhe orabelavi ekalelo ya otanya, mbwenye onela owodha vina ozinddiyela opama wa akwawo okuwene ogawuttukulela watikina.