Epaddi 5
Mvaho Wotikiniha Wa Ofuru Wa Osakula
1, 2. Mvaho gani wotikiniha obwene onkosa epaddi ya musasanyeliwo wehu?
WILA ninonelemo sabwa enthiyela Mulugu goi okalagawovi vina ejile enfuniye okosela goi eji, voroma ninofanyeela ononelamo mukalelo onithanddiliye. Iyene kakaleli onithanddavi na maningo vina ogogo. Iyene vina onithanddile na dhubuwelo vina makalelo a ohagalala a vawoka.
2 Epaddi ya makamaka ya dhubuwelo dhehu na makalelo a ohagalala ku ofuru wa osakula. Pu mwenemo, Mulugu ohika mmaningoni mwehu ewodhelo ya osakula na ofuru. Mohaganyedha obu mvaho wotikiniha odhile wa iyene.
Mukalelo Othanddiwe Iyo
3-5. Nintamaalela eni ofuru wa osakula?
3 Ndoweni nisekeserhe mukalelo oli ofuru wa osakula mwari mwa sabwa enthiyela Mulugu goi okalagawovi. Wila nirome, katanaalela eji: Weyo onotamaalela ofuru oniwena wa osakulaga ejile enfuniwe okosa vina ologa, ejile enfuniwe oja vina wabala, mabasa gani anfuniwe okosa, vina okule onfuna weyo okala vamodha na mukaleloya onfuniwe okala? Obe ogafunile wila mudhidhi wotene muthu muthuvi alamulege dhotene dhinfanyeeliwe ologa vina okosa mwigumini yawo?
4 Kuli muthu waderetwene onfuna wila egumi yaye elamuleliwege kakamwe. Sabwa yani? Sabwa ya mukalelo onithanddile Mulugu. Bibilia onnipanga wila Mulugu omuthanddile muthu ninga ‘nladdaniho naye,’ nanda ewodhelo yina ena Mulugu ja osakula na ofuru. (Wita 1:26; Olibiha 7:6) Mwathanddeliye athu, iyene wahavaha ewodhelo yakakene yotikiniha—mvaho wa ofuru wa osakula. Ji sabwa ya ejene ensilidheliwihu okosiwa adhari na alamuleli a otabala.
5 Noona ofuna okaana ofuru kayo elobo yabure, sabwani Mulugu ddi Mulugu wa ofuru. Bibilia onloga dhahi: “Vali Muya wa Nabuya, pali ofuru.” (2 Korinto 3:17) Dhaene, Mulugu ohinivaha ofuru wa osakula ninga epaddi ya musasanyeliwo wehu kakamwe. Vowila iyene ohiziwa mukalelo ogalabile dhubuwelo vina makalelo ehu a ohagalala, iyene wahiziwa wila nigahagalalitxi na ofuru wa osakula.
6. Mulugu othanddile dhavi ogogo wehu wila olabege mowiwanana na ofuru wa osakula?
6 Wila needde na ofuru wa osakula, Mulugu ohinivaha ewodhelo ya wubuwela, wañgananiha dhitagano, ogana dhilobo vina oziwa yaderetu vina yabure. (Ahebreu 5:14) Dhaene, ofuru wa osakula wanfanyeela olabihedhiwa na osakula wa otxenjerha. Iyo kanithanddiwe ninga makina asasanyedhiwe oloddaga mweeddihedho mweeddihedhovi abene ahina ogogo, ahina wene efunelo ya elobo. Nne kanithanddiwe wila nikosege dhilobo na eziwelo yobaaliwana ninga munkosela dhinama. Othiya eji, ogogo wehu wotikiniha osasanyiwe wila olabege mowiwanana na osakula wehu na ofuru.
Maromo Aderetu
7, 8. Maromo gani aderetu aavahile Mulugu ababi ehu ooroma?
7 Mulugu wila alagihe yawila wantanaala vaddiddi, iyene wahavaha ababi ehu ooroma Adamu na Eva ofuru wa osakula vamodha na dhotene dhigaafunile muthu waderetu. Awene eekiwe mparaizu munddimuwa wakala ninga mundda wokoddela. Aahikaana dhilobo gwe dha omaningoni. Aahikaana maningo na dhubuwelo dhowakwana, mwawila kagafiyedhile wuluvala, obulela obe okwa—awene agahikalawo na mukalakala. Agahikaana ana owakwana, abene agakaanile vina musogorho mosanzaya vina mwa mukalakala. Nanda nlogo na athu nthene nigenjivile nigahikaana mabasa oohagalaliha a omagomelowa osaddula elabo yotene ya vati bikala paraizu.—Wita 1:26-30; 2:15.
8 Mwaha wa ejile yasasanyedhiwe, Bibilia onloga dhahi: “Mulugu mwañganeliye mabasa otene erileye, ohona wi bapama-wene.” (Wita 1:31) Bibilia vina onomuloga Mulugu wila: “Mabasa aye bawakwana.” (Olibiha 32:4) Pu mwenemo, Mpaddutxi wahivaha nlogo na athu maromo a wakwana. Kugakalile elobo yaderetu empitha ejene. Iyene wahilagiha deretu wila Mulugu ontanaala!
Ofuru Mwari Mwa Migano
9, 10. Ofuru wa osakula onfanyeelela eni opimeleliwaga mofanyeela?
9 Mwa dhaene, Mulugu wafuna wila ofuru wa osakula ohikaane migano? Katanaalela sidadi yodhaala karo ejene ehina wene malamulo a murampani, kadda muthu bageeddihedha mpaddi mpaddivi na muthamagelo onfuniye. Weyo ogahifuna weeddihamo karo na mikalelo eso? Nne, aba agakalile makathamiho a murampani vina ogahitota ngovi gwe.
10 Noona, jakakene vina na mvaho wa ofuru wa osakula. Kovahiwa ofuru wohikaana migano, mu nlogoni na athu mugahikala makathamiho oopitha. Wanfanyeela okala malamulo wila eeddihege mabasa a athu. Nzu na Mulugu ninloga dhahi: “Eddaganí n’ekalelo y’afuru: kamweddena ofuruyá ninga elobo y’okunélana vimanya dhenyu.” (1 Pedru 2:16) Mulugu onfuna wila ofuru wa osakula opimeleliwege wila oderetu okalegewo. Iyene kafuna wila iyo nikaane ofuru kakamwe, mbwenye ofuru wothiyedhedha, wiwelelaga gano dha nlamulo.
Malamulo Aani?
11. Nisasanyeliwe wiwelelaga malamulo aani?
11 Nisasanyeliwe wiwelelaga malamulo aani? Epaddi yina ya nlebo na 1 Pedru 2:16 ( BJ) enloga dhahi: ‘Nyuwo kamuli adhari a muthu mwina, muli adhari a Mulugu bahi.’ Eji kintapulela wila odhari wokoseliwa otabala, mbwenye ontapulela wila nisasanyeliwe ohagalaletxa nigewelelaga malamulo a Mulugu. (Mateu 22:35-40) Malamulo aye anoweeddiha deretu opitha malamulo malamulovi apanddiwe na athu. “Miyo ddili Nabuya Mulugu wawo, onuvaha magano ankaliha, onuvelela mudila dhinfwanyela weyo ovira.”—Iza 48:17.
12. Ofuru gani wa osakula onihuna mwari mwa migano dha malamulo a Mulugu?
12 Mudhidhi wakakene, malamulo a Mulugu anofugula dila ya okalawo ofuru mwinjene wa osakula mwari mwa migano dhaye. Ji ejene enkalihawo dhilobo dhothiyana thiyana vina enokaliha deretu nlogo na athu. Katanaalela makalelo oothiyana thiyana a dhoja, dhabalo, jibo, dholebiwa dhokoddela vina matakulu ozugunuwa elabo yotene. Txibarene mwa dhilobo esi ninfuna osakula wehu othiya muthu mwina onisakulelaga.
13. Malamulo gani a omaningoni anfanyeelihu wiwelela mwa oderetu wehu?
13 Dhaene, nithanddeliwe ohagalaletxa nigewelelaga malamulo a Mulugu abene anlamula meeddelo a athu. Eji enligana na wiwelelaga malamulo a Mulugu a mwilaboni. Motagiha, nigapwaza nlamulo na guru enweta dhilobo nanda banilupa va thukuwani yolapa vaddiddi, ninovoreyeya obe ninokwa. Nigapwaza malamulo ali mmaningoni mwehu, banithiya oja, omwa manje obe ovuma ninela okwa.
14. Niziwile dhavi wila athu kapaddutxiwe wi avilamulelege woka?
14 Vowila txibarene nithanddiwe na efunelo ya wiwelelaga malamulo eekile Mulugu mwilaboni, nithanddiwe vina na efunelo ya wiwelelaga malamulo a mweddelo a Mulugu vina abale aneeddiha dhilobo dha mmawani. (Mateu 4:4) Athu kathanddeliwe ovilamulaga anya, s’ohilamuliwa na Musasanyi wawa nanda beddeleya deretu. Namavuhulela Jeremiya onloga dhahi: ‘Ddiziwa wi muthu kaiye mwinya w’okalawo waye, kanwodha opima yeka tharho dhaye. Nabuya, kaddilageni.’ (Jeremiya 10:23, 24) Noona, na mikalelo dhinjidhene athu athanddeliwe okalagawo mutxiddo mwa olamulela wa Mulugu, othiya olamulela wawa.
15. Malamulo a Mulugu agahaalemela Adamu na Eva?
15 Wiwelela malamulo a Mulugu kugakalile elobo yolemela wa ababi ehu ooroma. Mbwenye ogahilabela oderetu wawa vina oderetu wa nlogo notene na athu. Atelani ooroma kokalavi mwari mwa migano dha malamulo a Mulugu, dhotedhene dhigaheedda deretu. Mwa txibarene ovanene naakalegewo mparaizu wotikiniha wohagalaliha, ninga murala wa nlogo na athu ookwela vina oowiwanana! Kugakalilewo obure, goi vina okwa.
[Foto vanikukuni 11]
Mpaddutxi wahavaha athu maromo owakwana
[Foto vanikukuni 12]
Ogahifuna weeddiha karo mu rampani modhaala karo kowiliwa kamuli malamulo a murampani?