Agosto

Koona dhilobo bili dhinnisunziha nlebo na masalmo. Yoroma, aligani anopattiwa makattamiho. Yanawili, Yehova ononivuna mmakattamihoni mwehu. Yehova onnivuna dhavi? Elobo modha enkosiye wi anikamihedhe, kukana monelo wovipimelela sabwa ya makattamiho angumanihuna mwilaboni mpuno. Masiki Yehova vapikireliye wi ninelege odhowavi nimulabelaga nowagalala, eji kintapulela wi iyene onelege onirabeliha makattamiho otene annigwela. (Iza. 66:14) Iyene onnikokomeza wi nizuzumele wang’ana dha musogorho, nsaka-nene-ntto ninakalegewo iyo na murenddele, okala-n’okala-wene. (2 Kor. 4:​16-18) Oku nijedhelaga mudhidhi obo, iyene ononikamihedha odhowavi nimulabelaga siku na siku. (Ent. 3:​22-24) Ninsunzavo eni na alabeli ororomela a Yehova a masaka a mundduni na a masaka abano? Ninodhaga opattiwa makattamiho ohijedheleya. Mbwenyi nigamukuluvela Yehova, iyene txipo kanattiye onikamihedha.—Masal. 55:22. w23.04 14-15 ddima 3-4

Enowodheya iyo osunza na yotagiha ya José na Maria, abuwene ali omala-nawale wi ewelele dhaloga abale attomeliwe ottonga elabo masiki vahalani yovevuwa. (Lk. 2:​1-6) Katanalela mukalelo wehiwe wiwelela wawa Maria bana yari. Mwene wo Roma Augusto wahigwiha nlamulo naloga wi otene eyelele sidadi dhibaliwani wi alebeliwe. José na Maria ahikosa oleddo wa makilometru 150 mpaka o Belemi aviraga mmimburoni mwadhalile myango. Oleddo obule kugali wovevuwa makamaka mwa Maria odduwene wanna yari ya myeri mitanu na minai. Kito mudhidhi waye wobala kufiya oku awene akosaga oleddo? Txino awene ahizuzuma vaddiddi obuwelaga egumi ya Maria vina ya mwana odduwene agadhile okala Mesiya. Awene kofuna obu kugali mwaha agattukuleli ohiwelela malamulo a guverno? José na Maria kattiyile makattamiho awa wattiyiha wiwelela malamulo, awene ahiwelela dhilogile alamuleli. Nanda Yehova ohiruriha wiwelela wawa. Maria ohifiya mpaka o Belemi obareleyene, ohimbala mwana na egumi vina ohikamihedha wakwanihedheya wa nivuhulo na mBibiliani!—Mik. 5:2. w23.10 8 ddima 9; 9 ddima 11-12

Kito akala weyo onogurumela ogavahaga yowakula mmatugumanoni? Enaukamihedhe venjene, ovisasanyedha deretu. (Gano 21:5) Ogaziwa dhilobodha dhinasunziwe, enele okala yovevuwa ovaha yowakula yawo. Yina ja ovaha dhowakula dhohigonela. (Gano 15:23; 17:27) Ovaha yowakula yohigonela enele wukamihedha ohigurumela ogakulaga. Ovaha yowakula yohigonela vina na mazu awo, enele olagiha wi weyo ovisasanyedha deretu vina ohinonelamo makaniya. Kito akala masiki buvirihilemo marhe aba onilihu onogurumela ogavahaga yowakula? Kakuluvela wi Yehova onovaha ttima guru enkosiwe ya ovilibihedha okosa mpaka vanwodheliwe. (Lk. 21:​1-4) Ovilibihedha kintapulela okosa ejile ehinwodhiwe. (Fil. 4:5) Nona, kakosa yogana enawodhiwe wakwanihedha vina kamukumbirhe Yehova wila ovahe murima wofwasa. Txino vamaromo yogana enakose weyo ja ovaha dhowakula dhohigonela. w23.04 21 ddima 6-8

Murumiwi Paulo ohiniladdaniha na anyakoddo ankala txenjewa vina anabala guwo dha mukoddoni. Munyakoddo onofwanyela okala womala-nawale wi mudhidhi-mudhidhivi ogakalawo koddo arabe koddoya. Eji jinfuniwana iyo okosa. Wi nihidduwale labo na Yehova ninofwanyela wabala yabalo ya mujila kuloga nroromelo vina okwela, ottiya ejo nimwabale txapewa wamujila kuloga njedhelo. Yabalo ya mujila enobarela murima wa munyakoddo. Nroromelo vina okwela dhinobarela murima wehu wa nladdaniho. Mikalelo esi dhinele onikamihedha omulabela Yehova vina onfwara Yezu. Nroromelo ninonivaha nikuluvelo nawi Yehova onele onittuva nigamutamela na murima wehu wotene. (Aheb. 11:6) Eji enonittukulela okala oweddeyana na Musogorheli wehu Yezu masiki nifwanyiwaga makattamiho. Iyo ninele owodha olibiha nroromelo nehu modhela osunza mwaha wa abali a masaka ehu awodhile ovilela makattamiho a ofwara-fwariwa obe oyelega. Enowodheya vina iyo orabela otameletxa okana kobiri modhela osunza mwaha wa abali avevutxile egumi wi eke dhilobo Dhomwene vamburoni voroma mwigumini mwawa. w23.06 10 ddima 8-9

Ovipimelela ewodhelo ya wang’anela dhokosa dhehu vina dhiniwamo iyo. Iyo vina ninofuna ovipimelela wi nikane efunelo ya wakwanihedha dhogana dhehu, ttabwattabwa akala dhoganadha sorutxa wakwanihedha vina kanina efunelo yokosa. Kudduwale wi ovipimelela onokosa mpaddi wa dhimbala muya nona omulobe Yehova wi awukamihedhe wunuwiha mukalelo obu wamakamaka. (Lk. 11:13; Gal. 5:​22, 23) Kujedhele dhilobo wuweddelaga deretu. Mwilaboni mpu munkalihu, kaninfwanyela ojedhela dhilobo dhotedhene oneddelaga deretu. Nigajedhelaga ejuwene kaninawodhe wakwaniha yogana yehu. Enodhaga opadduwa ohikana efunelo sabwa yogana yawo okala ninga yorutxa wakwanihedha. Ekalaga dhahene karoma ovirihagamo ttarho modha-modha. Akala yogana yawo ja omwengesa Bibilia wantero, ononamo dhavi oroma wengesa mitala dhing’onovi valaboni? w23.05 29 ddima 11-13

Na nikamihedho na Yehova vina nikuru naye oja womuyani onowakamihedhavi attu wi eddege Mudila Yokoddela. (Iza. 35:8; 48:17; 60:17) Neji, ninologa wi akala muttu onorumela omusunza Bibilia, iyene onowakela gari ya wedda Mudila Yokoddela. Ena anokosa ejuwene mwa mudhidhi mung’onovi agamala battiya wedda mudilamwa. Mbwenyi ena kampupuruwa anodhowavi eddaga mudila mpu afwaraga mpaka ongomelani. Dilaya eji engomela wuvi? Mwa abale ana njedhelo na odhowa wirimu, Dila Yokoddela enattukulela mparaizu wa Mulugu wirimu. (Ovuh. 2:7) Mwa abale ana njedhelo nokala mparaizu velaboni ya vati, dila enattukulele omagomo wa vyaka 1.000 wa Omwene wa Kristu, nsakanene ntto ninakale iyo notene aligani. Akala weyo ohiroma wedda dila eji, kuwang’ane mundduni, odhowegevi weddaga mudilanimwa mpaka ongomelani, mwilaboni eswa! w23.05 17 ddima 15; 19 ddima 16-18

Ogatanalela dhilobo dhotene dhukoseli Yehova, weyo onotamalela venjene vina onofuna omperhekela egumi yawo. (Masal. 116:​12-14) Bibilia onloga wi ddi Yehova onnivaha “dhapama dhetene na mivaho dhetene dhawakwana.” (Tia. 1:17) Mvaho wa ttimaya ompitta mivaho dhotene yobolo ya Mwanaye, Yezu. Kobuwela eji! Sabwa ya yobolo enowodheya weyo okana mandano ofiyedheya ,na Yehova ottiya ejo Yehova onowuvaha gari ya okalawo namukalakala. (1 Jo. 4:​9, 10) Oviperheka wa Yehova mukalelo mmodha wa olagiha wi onomutamalela Yehova ottiya sabwa ya yobolo bahi mbwenyi vina sabwa ya mareliho otene akeliliwe.—Olib. 16:17; 2 Kor. 5:15. w24.03 5 ddima 8

Iyo nigona mweddelo wa attu masaka abano ninovyona ninga Loti. Iyene wannunlana mweddelo wabure wa attu a nsaka naye, sabwani iyene wanziwa wi Babi waye wa wirimu wannidda dhokosa dhawa dhonyakuwa. (2 Ped. 2:​7, 8) Omova Mulugu vina omukwela waye ohimuttukulela orabela mweddelo wonyakuwa wa attu a nsaka naye. Iyo vina ninkala mwilaboni muli attu ahineddana magano a Yehova. Masiki dhawene, enowodheya okana mweddelo wokoddela modhela odhowavi nimukwelaga Yehova vina okana mukalelo wapama wa omova iyene. Yehova ononikamihedha modhela onilibiha na mazu anfwanyeya munivuruni na Gano. Akristu otene, alobwana, ayana, azombwe vina anakalaba, agasunzaga magano anfwanyeya munivuruni ntti anele opurelamo. Iyo nigamovaga Yehova ninele orabela wandana na attu ankosa dhilobo dhabure. w23.06 20 ddima 1-2; 21 ddima 5

Txino weyo wahigumanana widdiwa na anamudhi, obe txino ohittiya dhilobo dhamakamaka mpaddi womaningoni sabwa ya ofuna wika vamburoni voroma Omwene wa Mulugu. (Mt. 6:33) Dhigapadduwa dhilobo ninga esi, kakana nikuluvelo wi Yehova onoziwa dhilobo dhotedhene dhinimukoseliwe. (Aheb. 6:10) Txino, weyo ohona na mento awo wi mazu aba a Yezu bebaribari: “Muthu othiyile numba yaye, peno abalaye, peno arogoriye, maye, babe, anaye, mindda dhaye, thangwi y’oddiroromela miyo vina [muthaka], ddinakele esodhá senjedhedhiwevo dila zana. Ddinarome wakela ovanene mwilaboni-mpuno: numba, abali, arogori, amayi, ababi, ana, mindda vamodha na widdiwa; mwilaboni enadhe onere wakelamo egumi yohimala.” (Mk. 10:​29, 30) Kavali waganyedha wi mareliho akeliwe ahinjiva vaddiddi opitta guru ekosiliwe.—Masal. 37:4. w24.03 9 ddima 5

Mudhidhi opattiwe Akristu akala o Judeya dala enddimuwa, abali a mulogo wo Antiokiya “alaganela wakamyedha abalawa o Judeya, apitxaga muthu-muthu yawodhiye.” (Mer. 11:​27-30) Masiki abaliya apattiwe dala akalaga wolapela, Akristu o Antiokiya ahikosa muli mwetemwene wi akamihedhe. (1 Jo. 3:​17, 18) Enowodheya iyo vina olagiha ttagaraga masaka abano nigaziwa wi abalihu na arogora anotabuwa mwaha wa opattiwa efoyo. Momaguva-mwene—ninowavuza anddimuwa a mmulogoni akala enowodheya iyo oviperheka wi nakamihedhe modhela okosa mivaho dhinkamihedha mabasa ankosiwa mwilaboni mwetemwene obe walobelela otene apattiwe dhifoyo. Abali ehu na arogora anele ofuna nikamihedho wi akane dhilobo dhinafune awene wi akalewo. Mwene wehu Yezu Kristu, agadha wattonga attu, iyo ninfuna wi iyene anifwanye nilagihaga ttagaraga vina aniwobe wi nakele Omwene.—Mt. 25:​34-40. w23.07 4 ddima 9-10; 6 ddima 12

Yezu ohitagiha ofewa murima wa Yehova. Varumiwiye velaboni ya vati, wadhele olaleyela “mabila orimela a nlogo na Izrayel.” Mbwenyi iyene ohoniha ofewa murima modhela walaleya attu a malogo mena. Dila modha muyana wahali mukadda Izrayel wahimukumbirha wi anvulumutxe mwanaye “[watabutxiwa] na muya wabure.” Ttagaraga dha Yezu dhihimuttukulela okosa yokumbirha ya muyanaya vina ohinvulumutxa mwanaye. (Mt. 15:​21-28) Koona yotagiha yina. Omaromo wa mabasa a Yezu olaleya, iyene wahiloga dhahi: “Ole onddikodda . . . , miyo vina ddinele omukodda.” (Mt. 10:33) Mbwenyi iyene kamukoddile Pedro masiki Pedroya vamukoddiliye dila ttaru. Yezu wahiziwa wi Pedro wahitxinuwa vina wannimuroromela. Muvenyihiwiye mukwani, Yezu wahimuttwanyuwela vina wahoniha wi wahimulevelela vina wanimukwela. (Lk. 24:​33, 34) Yehova Mulugu vina Yezu Kristu bofewa murima. Ki iyo? Yehova onjedhela wi iyo nikale ofewa murima. w23.07 21 ddima 6-7

Txini enalogihu na abale ahinrumela wi mapikirhelo a Mulugu anele opadduwa? Yoroma, Yehova mwinyene ddipikirheli. Nivuru na Ovuhulela ninologa: “Ole wagilatile vampaddoni w’omwene, ologa: ‘[Koona!] Dhetene, miyo ddinokaliha dhiswa.’” Yehova ohikana eziwelo, ewodhelo vina efunelo ya wakwaniha epikirheliye. Yanawili, mwa mpaddi wa Yehova, epikirheliye enkala ninga ehimala wakwanihedheya. Nona iyene ohiloga dhahi: “Dhinlogimi sebaribari, dhinofwanyela orumeliwa. . . . Dhetene dhimala wireya!” Yaneraru, kuli elobo enimutximiha Yehova wakwaniha epikirheliye, nona iyene ohiloga miyo ddili Alfa vina Omega. (Ovuh. 21:6) Yehova onele woniha wi Satana muttambi vina kahiyo elobwene. Nanda muttu baloga dhahi, ejoya kinapadduwe, txini enfwanyeliwe okosa? Wengese Ovuhulela 21:​5, 6. Omutapulelemo muttuya omukamihedhaga ononelamo wi enkala ninga Yehova ottikittile dukumento ennikuluveliha wi onele wakwaniha epikirheliye.—Iza. 65:16. w23.11 7 ddima 18-19

Yehova omukoseli nipikirhelo ntti Abrahamu vakwanihedhiye vyaka 75 ahinatti okana mwana. Koddi Abrahamu ohona wakwanihedheya wa nivuhulo ntti? Kawodhile wona dhotedhene. Mwabuweliye Mwinje Eufrate vina ajedhela vyaka 25, Abrahamu pawodhiliye wona matikiniho a obaliwa wa mwanaye Izaki, vasogorhova badhivirile vyaka 60, pawodhiliye wona obaliwa wa adhulaye eli, Ezau na Jakob. (Aheb. 6:15) Mbwenyi Abrahamu txipo kawodhile wona ziza naye nunuwaga ofiyedha okala nlogo ninddimuwa vina nivolowaga Mwilaboni Yopikirheliwa. Masiki dhawene, mulobwana oddu wa nroromelo wahikana mandano ofiyedheya vaddiddi na Muttanddi waye. (Tia. 2:23) Abrahamu agavenyihiwa mukwani, onele wagalala venjene agasunza wi malogo menjene ahakela mareliho sabwa ya nroromelo vina ovilela waye! (Wita 22:18) Txini ensunzihu? Iyo txino kaninawodhe wona ovanene mapikirhelo otene a Yehova akwanihedheyaga. Mbwenyi, nigakala attu ovilela ninga Abrahamu, ninele okana ebaribari wi Yehova onele onittuva ovanene vina venjene mwilaboni eswa.—Mk. 10:​29, 30. w23.08 24 ddima 14

Mwene Oziya bali muzombwe wali wovyeviha. Iyene ohifiyedha osunza “omuriha Mulugu.” Oziya okwile na vyaka 68, vyaka dhinjene dha okalawo waye Yehova wahimururiha. (2 Map. 26:​1-4) Oziya wahitolotxa malogo menjene a amwiddani vina wahibarela muttette wo Jeruzalemi. (2 Map. 26:​6-15) Oziya txibarene wahagalala vaddiddi sabwa ya esile dhikosiliye na nikamihedho na Yehova. (Koh. 3:​12, 13) Mwene Oziya wahilemela wawaddela attu ena dhafwanyelani okosa. Koddi eji ehimuttukulela wubuwela wi wanfwanyela okosa elobo-elobovi yafuniye? Labo nimodha Oziya wahivolowa mumparhani mwa Yehova, na opanela omperhekela mukutto woddumeya, elobo yaharumelihiwa amwene okosa. (2 Map. 26:​16-18) Namakutta Munddimuwa Azariya wahimusisigula n’ovenya Oziya osilidhiwa vaddiddi. Mokubanyiha-mwene, Oziya wahittiya ororomeleya sabwa ya ejuwene wahitxinutxiwa na maranya. (2 Map. 26:​19-21) Esi kadhigapadduwile iyene kokalavi wovyeviha! w23.09 10 ddima 9-10

Masiki vakaliliye Mukristu wottikitteliwa, murumiwi Pedro wandhowavi awanagana dhawobana dhaye. Yaka ya 36 N.K, Mulugu ohimuruma Pedro vatakulu va Kornélio wahali muyuda, venevo Kornélio wahittikitteliwa na muya wokoddela, vina wahidha ononelamo wi “Mulugu kanimuthiyaniha muthu” vina wi Amalabo obe attu ahali Ayuda anfwanyela okosa mpaddi wa mulogo w’Okristu. (Mer. 10:​34, 44, 45) Osogorhowa Pedro wahiroma oja na Amalabo, eji yali elobo yahinattigi iyene okosa mwigumini mwaye. Mbwenyi, Akristu ena ali Ayuda obuwela wi Ayuda na Amalabo kanfwanyela oja vamodha. Mudhowile Akristu ana mubuwelo obo o Antiokiya, Pedro wahittiya oja na Amalabo, txino sabwa ya wova wanyimula Akristu ali Ayuda. Murumiwi Paulo wahona wi Pedro wela okosa dhosarapitta vina wahimusisigula vamentoni va etene. (Gal. 2:​13, 14) Masiki na yovonya eji, Pedro keyelile mundduni. w23.09 22 ddima 8

Ovipepesa enodhaga owuzinddiyeliha vobaniliwe, mbwenyi kukumuwe sabwa ya ejuwene. Mulugu ddwapama, vina iyene onele wukamihedha okosa matxinjo anfuneya. (1 Ped. 2:3) Murumiwi Pedro ononikuluveliha: “Mulugu onowulibihani, onowuwaralihani, onowimetxani pwi. Pedro vamaromo wobuwela wi kafwanyela okala na Yezu. (Lk. 5:8) Mbwenyi na nikamihedho na Yehova vina Yezu, Pedro ohivilela vina ohidhowavi anfwaraga Kristu. Yodhelavoya Yehova ohinfugulela Pedro musuwo “wovolowana mumweneni wohimala wa Nabuyehu, Mvulumutxi wehu Yezu Kristu.” (2 Ped. 1:11) Obu mperhe munddimuwa wakelile Pedro! Akala dhahene ninga Pedro weyo onodhowavi bugavilela vina bugarumela oshagihiwa na Yehova, onele wakela mperhe wa egumi yohimala. Dhahene onele ofwanya ovulumutxa wadha weyo ororomelaga.—1 Ped. 1:9. w23.09 31 ddima 16-17

Vamusanani vahikala nttaddo nddimuwa—narugunowiwe na nsitto anamakutta vakosani mabasa awa. Ebuwa ya safuri vaddumeyiwa mukutto yali vattaddo apo vina yobo ya safuri mwekiwa manje yalabihedha anamakutta wi avikupena ahinatti ottidda mabasa awa. (Obud. 30:​17-20; 40:​6-8) Wirimu ninga attikitteliwi alivi velaboni ya vati masaka abano anomulabela Yehova nttaddo nili mwari mwa mparha womuyani. Yobo enddimuwa ya manje eli va nttaddo apo mubutxedho wamakamaka wa attikitteliwi vowi dhahene ninga Akristu otene, awene anofwanyela okala okoddela mpaddi womuyani womaningoni vina mweddelo wawa. “Muthithi munddimuwa,” onimwebedha wuvi Yehova? Murumiwi Joau ohona muttitti munddimuwa wemelile “osogorho wa mpaddo,” eji entapulela nttaddo nili otakulu wa mparha “amwimelelaga iyene mathiyu na mutana mmusanani mwaye.” (Ovuh. 7:​9, 13-15) Iyo ninottittimiha vaddiddi gari enivahile Yehova ya omwebedha na mukalelo wofwanyelela! w23.10 28 ddima 15-16

Mukalelo mwina onnivaha Yehova guru ku walabihedha anddimuwa a mmulogoni. (Iza. 32:​1, 2) Nona akala onogumanana makattamiho kawaddele dhozuzumiha dhawo anddimuwa a mmulogoni. Kuwubuwele dila bili, katamela nikamihedho nawa. Yehova onowodha wulibiha àlabihedhaga anddimuwa a mmulogoni. Njedhelo ninehu nindela mBibiliani okalawo namukalakala mparaizu velaboni ya vati obe Mumweneni wa wirimu—ninonivaha guru. (Rom. 4:​3, 18, 19) Njedhelo nehu ninowodha onikamihedha ovilela mmakattamihoni, olaleya miselu dhapama vina wakwanihedha mabasa anttomeliwihu mmulogoni. (1 Tes. 1:3) Njedhelo-nene ntti ttimulibihile murumiwi Paulo. Iyene ohifwanyiwa dhorutxa, dhodhugudha, widdiwa vina makattamiho agamuttukuleli otolowa. Dila dhina wakala nena na okwa. (2 Kor. 4:​8-10) Paulo wahifwanya guru yafuniye wi awodhe ovilela. (2 Kor. 4:​16-18) Paulo wazuzumela njedhelo naye na musogorho Paulo wahitanalela njedhelo ntti nona murima waye wandowa olibagavi. w23.10 15-16 ddima 14-17

Nigalobela ninofwanyelela ovivuza, obu mudhidhi wofwanyelela wi Yehova addivahe ejile enkumbirhimi? Txino onodhaga wubuwela wi yoloba yawo enofwanyela wakuliwa momaguva. Mbwenyi, mwebaribari Yehova onoziwa mudhidhi wofwanyelela wi anikamihedhe. (Aheb. 4:16) Dholoba dhehu dhigahakuliwe ninofwanyela wubuwela wi yowakula ya Yehova jijuwene. Mbwenyi dila dhina txino yowakula ya Yehova jawi nijedhelege. Motagiha, muzombwe oddule walobela wi Yehova anvulumutxe. Mbwenyi masiki dhawene kavulumuwile. Yehova kokosa matikiniho nanda bavulumuwa, Satana agalogile wi muzombwe oddule owodhile omulabela Yehova sabwa ya ovulumuwa. (Job 1:​9-11; 2:4) Ottiya ejo Yehova ohipikirhela wi musogorho mpo attu otene anele ovulumutxiwa viredda dhawa. (Iza. 33:24; Ovuh. 21:​3, 4) Nijedhaga ofiya wa siku ntto, kanijedhe matikiniho a ovulumutxiwa wa viredda dhehu. Txino mbali oddo agahimukumbirha Yehova guru vina murenddele wa muyubuweloni wi adhowegevi avilelaga vina masiki bali muredda amulabelege Yehova nororomeleya. w23.11 24 ddima 13

Sansau wahikosa yovonya enddimuwa vaddiddi, mbwenyi iyene txipo kattiyile omulabela Yehova. Iyene ohitamela gari ya okosa efunelo ya Yehova, owana na akadda Filisti. (Anam. 16:​28-30) Sansau wahimulobelela Yehova alogaga: “Ddivaheni guru ddabuno bahi, ddawirelena ntxiga akadda Filisti.” Yehova wahakula nlobelo na Sansau vina Yehova wahinvaha Sansau guru yinjene na mukalelo wotikiniha. Dila eji Sansau oapa akadda Filisti enjene, opitta abale apiliye valiye wamento. Ebaribari wi Sansau ohipattiwa makattamiho sabwa ya dhovonya dhaye, mbwenyi iyene kattiyile okosa efunelo ya Yehova. Jakakene empadduwa na iyo, akala ninokosa yottega enfuneya wila nilagiwe obe nigayelela ettomo yanihu, kanittiye omulabela Yehova. Kudduwale Yehova txipo kanninyanyala. (Masal. 103:​8, 9) Masiki na dhovonya dhehu, enowodheya odhowavi nilabihedhiwaga na Yehova dhahene ninga epadduwile na Sansau. w23.09 6 ddima 15-16

Ovilela wawo onowuttukulela orumeeliwa na Yehova. Eji kintapulela wi ogatabuwaga na ofwara-fwariwa obe na makattamiho mena Yehova onowagalala na makattamihoya, kahiye mwenemo. Ebaribariya jawi Yehova onagalala sabwa ya ovilela wawo. Ovilela wawo bunuttukulela orumeliwa na iyene. Eji gari enddimuwa enihu! (Masal. 5:12) Kudduwale wi Abrahamu ohigumanana makattamiho ottiyana-ttiyana vina ovilela waye ehimwagalaliha Yehova. Yehova wamona Abrahamu ninga marho Waye vina wamweddiha ninga muttu woligana. (Wita 15:6; Rom. 4:​13, 22) Enopadduwa yakakene na iyo. Orumeliwa wehu vamentoni va Yehova kunda sabwa ya iyo okosa dhilobo dhinjene mmabasani mwaye obe ettomo dhinihu. Yehova onnirumelela sabwa ya ovilela na nroromelo. Kintanala yimo yehu, makattamiho angumanihuna obe dhilobo dhinwodhihu, iyo notene ninofuniwana ovilela. Ahikalawo makattamiho anvileliwe ovanene? Akala pumwenemo, kudduwale wi enkosiwe enomwagalaliha Yehova. Nigazinddiyela wi ninorumeeliwa vamentoni va Yehova, njedhelo ninihu wi iyene onele wakwaniha dhotene dhipikireliye ninele odhowavi nikalaga noliba. w23.12 11 ddima 13-14

Mukristu onofwanyela osunza ologa pama na attu ena. Mulobwana onziwa ologa pama na attu ena onovuruwana n’ofwaseya dhubuwelo na dhiniwamo attu enna. (Gano 20:5) Iyene onowodha ozinddiyela lizu na attuya, ekalelo enlagiha kove dhawa vina jestu dhinkosani. Weyo kunawodhe wona dhotedhene esi ogahilogege na attu kove na kove. Akala weyo mudhidhi mwinjene onkala ologaga na attu ena modhela telefoni, e-mail obe mensagem, onodhaga wobaniha ewodhelo yawo ya ologa na attu ena kove na kove, nona otamelege marhe ologa na attu kove na kove. (2 Jo. 12) Mukristu wowarala onoziwa ovisapela vina wasapela amudhaye. (1 Tim. 5:8) Jamakamaka vaddiddi osunza mabasa anaukamihedhe ovisapela. (Mer. 18:​2, 3; 20:34; Ef. 4:28) Kavilibihedhe woniwa n’ekalelo ya muttu onttidda mabasa vina ompuliha mabasa aromiliye. Ogakosa dhawene enele okala yovevuwa ofwanya ganyo. w23.12 27 ddima 12-13

Bibilia agalogaga labo na Yehova, onaddana mudhidhi onattonge Yehova amwiddani aye vina onavune iyene nlogo naye. Masaka a mundduni, Yehova wahatxinutxa amwiddani aye. (Iza. 13:​1, 6; Ezek. 13:5; Sof. 1:8) Masaka abano, labo na Yehova ninele oroma na olupeliwa wa Babilónia Munddimuwa ninagomele mukoddoni ya Armagedon. Wi niviluwe labo ntto, iyo ninofwanyela ovisasanyedha ovanene. Yezu ohisunziha wi ninofwanyela okala womala-nawale “goyi enddimuwa” ehinafiya, ottiya ejo ninofwanyela okala txenjewa. (Mt. 24:21; Lk. 12:40) Mukartani yoroma yalebele Paulo akadda Tesalónika, iyene wahilabihedha misibo dhigakamihedhile Akristu okala omala-nawale labo ninddimuwa na Yehova vina labo nottonga waye. Paulo wanziwa wi labo na Yehova kanigafiyile mudhidhene obule. (2 Tes. 2:​1-3) Masiki dhawene, iyene wahalibiha abalaye wi anfwanyela ovisasanyedhela labo ntti ekalaga ninga ninfiya mangwana, iyo vina ninofwanyela olabihedha nlago ntti. w23.06 8 ddima 1-2

Omagomo wa dekada ya 1970, o Tóquio o Japão, wahimagiwa aranha céu wa 60 andares wakwaranyile maperediyu mena. Attu anivivuza akala aranha céu oddu kagagwile sabwa ya ottekenyeya wa mattaka wapadduwetxa elabo ejile. Txini ekamihedhile wi ejo ehipadduwe? Anamamagaya ahimaga na mukalelo wovadda vaddiddi vina na marhe a ovikoma mudhidhi ompadduwa efoyo ya ottekenyeya wa mattaka. Akristu anoladdanihiwa na aranha céu oddu. Na mukalelo gani? Mukristu onofwanyela okana monelo wapama wa ovikoma vina ohittekenyeya. Enofuneya ovikoma vina ohigulugudheya wi mudhidhi wotene awodhege wiwelela malamulo a Yehova vina dhoruma dhaye. Mukristu ninga oddo onkala omala-nawale wi ewelele vina kampwaza magano a Yehova. Mwa mpaddi mwina, iyene onofwanyela okala muttu wofewa murima obe ohigulugudheya, akala onopattiwa makattamiho anafuneye olagiha mukalelo obu. (Tia. 3:17) Mukristu onsunza ovipimelela onorabela ottabwiha dhilobo obe wonaga dhilobo dhotene ninga sapama. w23.07 14 ddima 1-2

Yezu opemberha dhoweha dha Satana Ddiabo, vina dhoweha dhigamuttukuleli ottiya okalavi oweddeyana na Mulugu. (Mt. 4:​1-11) Satana wahigana omuttegiha Yezu wila ahiwodhe opitxa yobolo. Mudhidhi wakosa Yezu mabasa aye velaboni ya vati, dhipadduwa dhoweha dhina dhiswa. Ogumanana ofwarafwariwa vina egumi yaye yakala vangovini. (Lk. 4:​28, 29; 13:31) Yahifuneya iyene owanana ohiligana wa anamafwara aye. (Mk. 9:​33, 34) Mudhidhi wattongiwiye, iyene obubuddiwa vina oruwaniwa. Vasogorhova opiwa ninga timbwini n’ekalelo yowiwopa vaddiddi. (Aheb. 12:​1-3) Iyene ovilela epaddi yomariha ya dhoweha dhaye se nibarelo na Yehova. (Mt. 27:46) Txibarene, Yezu otabuwa venjene wi aperheke yobolo. Nigatanalela dhotedhene dhikosile Yezu wi aniperhekele yobolo, omukwela wehu onowunuwa. w24.01 10-11 ddima 7-9

Ovilela ononikamihedha waweddiha pama attu ena. Ononikamihedha vina ofwaseyela wavuruwana attu ena agalogaga. (Tia. 1:19) Ottiya ejo, ovilela onowunuwiha murenddele. Ovilela ononibarela ohikosa dhilobo momaguva vina orabela okosa dhilobo dhohifwanyela. Nigakala attu ovilela, kaninamaguvele osilidhiwa muttu aganinyimula. Ottiya wiyihedhana obure na obure, ninelege odhowa nivilelagana vina nilevelelagana muttu na mukwaye dila dhotene dhinttegelana iyo. (Kol. 3:​12, 13) Ovilela ononikamihedha okosa dhosakula dhapama. Ottiya okosa dhilobo s’oroma otanalela, nirome opepesa wila ninonelemo yoganaya enfwanyelihu okosa, dhawene panakanehu dhopurelamo dhapama. Motagiha, akala nintamela mabasa, iyo nigahirumela mabasa mabasavi agafwanyilehu? Iyo nigakala attu ovilela, vamaromo ninotanalela mukalelo ogapattile mabasaya murala wehu na dhilobo dhomuyani. Sabwa ya okala attu ovilela, nigahiwodha orabela okosa dhosakula dhigadhile onitotela makattamiho. w23.08 22 ddima 8-9

Dila dhina onelege okumuwa vaddiddi sabwa ya dhovonya dhawo. Mbwenyi ogatanalela nipikirelo nimukoseliwe Yehova mudhidhi omperhekeliwe egumi yawo, onele owodha okana guru ya owanana yoweha-yowehavi enagumanena weyo. Weyo ogamperhekela egumi yawo Yehova, onovikodda wamwinya, eji entapulela wi onelege okodda elobo-txilobo enimusilidha Yehova. (Mt. 16:24) Nona ogagumanana dhoweha kunakale mudhidhi mwinjene wubuwelaga enfanyeliwe okosa vowi onele oziwa enakosiwe, odhowavi ororomeleyaga—na Yehova. Weyo onele odidelavi omwagalaliha Yehova. Ogakosa dhawene onele okala ninga Job. Masiki vagumaniliyena makattamiho orutxa vaddiddi, iyene ohiloga dhahi: “Mpaka okwa waga, kaddinatxelele woniha okoddela waga murima!”—Job 27:5. w24.03 9 ddima 6-7

Yehova, “Mulugu [Wokwela],” oli na iyo! (2 Kor. 13:11) Iyene onomuzuzumela muttu-muttu wa iyo. Ninofwanyela okuluvela wi nirugunuwiwa na okwela waye woweddeyana. (Masal. 32:10) Venevo vandowihu nitanalelaga mukalelo olagihile Yehova onikwela waye, ninele okala ofiyedheya na iyene vina kinarutxe ozinddiyela nikamihedho naye. Enowodheya iyo olobela wa Yehova mudhidhi mudhidhivi vina omwaddela wi ninofuna ozinddiyela onikwela waye. Enowodheya vina ologa na Yehova dhetene dhinnizuzumiha na nikuluvelo nawi iyene onononelamo dhinnipadduwela vina onofuna onikamihedha. (Masal. 145:19) Dhahene ninga munziveliwa iyo waddamela motto labo noridha, iyo ninofuna waddamela okwela wa Yehova. Masiki okwela wa Yehova okanaga guru, okwela oku vina ononifwasiha. Nona kafugula misuwo dha murima wawo wi ozinddiyele okwela wa Yehova mwigumini mwawo. Vina nigazinddiyelaga okwela oku notene ninele ologa: “Ddinomukwela Nabuya [Yehova]”!—Masal. 116:1. w24.01 31 ddima 19-20

Ottiya bahi waziwiha attu ena nzina na Mulugu, Yezu ohikosa dhilobo dhina. Ayuda aloga makani na Yezu anziwa nzina na Mulugu. Mbwenyi ddi Yezu watapulelemo. (Jo. 1:​17, 18) Motagiha, Malebo a Ebrayiko anologa wi Yehova, Mulugu wa ttagaraga vina wa nttebwa. (Obud. 34:​5-7) Yezu ohoniha ejuwene mmusiboni wa mwana wopawula. Nigengesaga mmusiboni obo babi onimona mwanaye wolapela-wene, bamuttamagela wi amukubatte vina wi amulevele na murima wotene, iyo ninokana monelo wowakwana mwaha wa ttagaraga vina nttebwa na Yehova. (Lk. 15:​11-32) Yezu ohoniha mowakwana-mwene omuttu wa Babe. w24.02 10 ddima 8-9

Dhahene ninga manje oridha aninvaha guru muttu wanna nttona, Yehova ononipangarhaza vina ononivaha guru nigawanagana makattamiho. Ninawodhe dhavi omutagiha Yehova modhela wapangarhaza attu ena vina walibiha? Mukalelo mmodha ku wunuwiha mikalelo dhinanikamihedhe wapangarhaza ena. Mikalelo eso sivi? Txini enanikamihedhe odhowagavi nikwelanaga siku na siku? (1 Tes. 4:18) Ninofwanyela wunuwiha mikalelo dhapama ninga, ttagaraga, okwela wa weddeyana vina oderetu. (Kol 3:12; 1 Ped 3:8) Mikalelo esi dhinanikamihedhe dhavi? Nigaweddelaga ttagaraga abali na arogora, ninowoniha wi ninowatanala txibarene vina ninele ottukuleleya wapangarhaza agapattiwa makattamiho. Dhahene ninga mulogile Yezu, mulomo onloga esile dhidhalile mmirimani. Muttu wapama onoburutxa dhapama mmafumoni mwaye apama. (Mt. 12:​34, 35) Wapangarhaza abali na arogora antabuwa, mukalelo wapama wolagiha wi ninowakwela. w23.11 10 ddima 10-11

Wi ninonelemo mavuhulo a mBibiliani ninofwanyela okumbirha nikamihedho. Katanalela nladdaniho ntti. Kobuwela okosaga oleddo bugadhowa mburho ohinattigi weyo ofiya, mbwenyi mukwawo onkosiwena oleddo onoziwawo deretu wegowa ondowinyu, iyene onoziwa pama mburho oli weyo vina onoziwa ongomela dila modha-modha. Se waganyedha weyo ogahiziveliwa okosa oleddo na marho oddu! Na mukalelo wakakene, Yehova oli ninga marho oddu, iyene onoziwa pama osogorho ondowihu. Nona wi ninonelemo pama mavuhulo a Bibilia, ninofwanyela oviyeviha wi nimukumbirhe Yehova nikamihedho. (Dan. 2:28; 2 Ped. 1:​19, 20) Ninga mambali wapama, Yehova onfuna wi anaye ajevo dhilobo dhapama dhinapadduwe musogorho. (Jer. 29:11) Mbwenyi mottiyana na amambali omaningoni, Yehova onowodha ologa dhilobo dhinapadduwe musogorho mowakwana-mwene. Iyene ohilebiha mavuhulo mBibiliani anwodha iyo ononelamo mowakwana-mwene ahinatti wakwanihedheya.—Iza. 46:10. w23.08 8 ddima 3-4