Nzina Na Mulugu Ttivi?

Ogafunaga omuziwa muttu, elobo yoroma enkosiwe ja onvuza dhahi, “Nzina nawo ttivi?” Mbwenyi weyo komukosa nivuzo ntti Mulugu, iyene agauwakulile dhavi?

“Miyo ddili [Yehova], nzina naga thinthi-wene.”—Izaiya 42:8.

Wahiromaga wiwa nzina ntti? Txino nne, vowi maBibilia menjene alabihedhile dila dhingʼonovi nzina ntti na Mulugu, obe kalabihedhile nzinana. Mabibilia mena anoburutxamo nzina na Mulugu bekamo nzina na ettomo “NABUYA.” Mbwenyi epaddi ya Bibilia elebiwe na Ebrayiko munofwanyeya nzina na Mulugu dila dhowakwana 7.000. Nzina na Mulugu na Ebrayiko ninlebiwa na maletara owakwana manai, maletarayá baba YHWH obe JHVH, mwa vyaka dhinjene nzina na Mulugu ninotapuleliwa na elogelo ya Etxuwabo dhahi “Yehova”.

Nzina na Mulugu na Ebrayiko va nipapini ya Mar Morto — Rolu ya Masalmo ya *Mar Morto* Sekulu yoroma N.K., EBRAYIKO

Nzina na Mulugu na elogelo ya Engelezi otapuleliwa wa Bibilia wa Tyndale — Otapuleliwa wa Tyndale 1530, ENGELEZI

Nzina na Mulugu na elogelo ya Espanyoli otapuleliwa wa Bibilia versão Reina-Valera — *Versão Reina-Valera* 1602, ESPANYOLI

Nzina na Mulugu na elogelo ya Exina otapuleliwa wa Bibilia Union Version — *Union Version* 1919, EXINA

Nzina na Mulugu ninofwanyeya mmaleboni otene a Ebrayiko

SABWAYA JANI NZINA NA MULUGU TTAMAKAMAKA

Ttamakamaka mwa iyene. Kavo onvahile nzina Mulugu; ddi mwinyene ovisakuleli. Yehova ohiloga: “Nthi thi nzina naga, okala n’okala-wene; thi nzina ninaddiromolegena malogo a masaka otene.” (Obudduwa 3:15) Mbibiliani, nzina na Mulugu ninofwanyeyamo dila dhinjene opitta mazina mena a ettomo, ninga motagiha Namawodha-wodha, Baba, Nabuya, obe Mulugu, vina ninofwanyeyamo dila dhinjene opitta nzina-nzinavi, ninga Abrahamu, Mizé, Davidi vina Yezu. Ottiya ejo, Yehova onfuna wi nzina naye niziwiwe. Bibilia onloga: “Aziwe wi nzina nenyu muli [Yehova]. Nyuwo bahi muli Namadhulu-dhulu mwilaboni mwetemwene.”—Masalmo 83:19 [Masalmo 83:18 NM].

Ttamakamaka mwa Yezu. Munlobeloni ninziwiwa ninga Baba wehu, Yezu ohasunziha anamafwara aye omukumbirha dhahi Mulugu: “Nzina nenyu nikoddelihiwe.” (Mateu 6:9) Yezu vina wahimulobelela Mulugu dhahi: “Babani, thithimihani nzina nenyu.” (Joau 12:28) Ottittimiha nzina na Mulugu yali elobo yamakamaka mwigumini mwa Yezu, nona ohiloga mazu aba munlobenoni naye: “Ddiaziwiha nzina nenyu, ddigàziwihavi.”—Joau 17:26.

Ttamakamaka mwa ole onimwebedha. Alabeli a Mulugu a masaka awale anziwa wi obareleya vina ovuneya wawa wewanana na nzina na Mulugu. Bibilia onologa wi: Nzina na Yehova murhingotti woliba; wenewo attu apama anottamagelawo, anovuneya. (Gano 18:10) Onologa vina: “Onittana nzina na [Yehova] onele ovuneya.” (Jowel 3:5 [Jowel 2:32 NM]) Ottiya ejo Bibilia onosunziha wi nzina na Mulugu nigahazindhiyeliha attu animwebedha. Malogo mena otene aneddege na amilugu awa, mbwenyi iyo ninele weddagavi na nzina na Yehova Mulugu wehu namukalakala.—Mikeya 4:5; Merelo 15:14.

NZINA NA MULUGU NINTAPULELA ENI

Ninosunziha ejile eliye vina ejile enwodhiye okosa. Anamapepesa enjene anorumela wi nzina na Yehova nintapulela “Iyene Onowodha Okosa Ejile Enfuniye.” Mwinyene Yehova Mulugu ohinikamihedha ononelamo entapulela nzina naye venevo valogiliye na Mizé dhahi: Miyo Ddinele Okala Ejile Eganilemi Okala. (Obudduwa 3:14) Dhahene nzina na Mulugu ninonisunziha wi iyene kahiyo bahi Muttanddi wa dhilobo dhotedhene. Iyene onokala obe onokosiha esile dhittanddiliye okala ejile enfuniye wi akwanihedhe efunelo yaye. Mazina a ettomo a Mulugu anowoniha kakamwe wi iyene ddinna ewodhelo opitta attu otene, vina kawo onna ewodhelo enimpitta iyene. Mbwenyi nzina Yehova bahi ttinlagiha ejile eliye vina enwodhiye okala.

Ninowoniha wi iyene onofuna okala marho wehu. Ejile entapulela nzina na Mulugu enowoniha wila iyene onotanala dhottandda dhaye, otaganyiha na muttu-muttu wa iyo. Mulugu onilagiha nzina naye, eji enowoniha wila iyene onfuna wi nimuziwe. Ottiya ejo, Mulugu ddiromile onaddela nzina naye kajedhile wi muttu anvuze, weyo ol’ani? Ejo, enowoniha wi Mulugu kanfuna wila oniwe ninga muttu oli wolapela, odduwene ohinfuna oziweya; efunelo yaye ja iyo omonaga ninga Muttu webaribari vina ninga marho oli vakuvi na iyo.—Masalmo 73:28.

Nigalabihedhaga nzina na Mulugu ninowoniha wila ninofuna okala marho waye. Kobuwela wi onfuna okale marho wa muttu, nanda bumwaddela nzina nawo. Ogaviwalemo dhavi iyene kohilabihedhaga nzina nawona? Txino ogahaganyedha akala txibarene iyeneyá onofuna okala marho wawo. Jakakene empadduwa na Mulugu. Yehova onaddela nzina naye, vina ononikokomeza wi nilabihedhege. Nigalabihedhaga nzina na Yehova, ninomutonyihedha wi ninofuna okala amarho aye. Masiki akala muttu onotanalela obe onowubuwela bahi nzina naye, Yehova onozinddiyela!—Malakiya 3:16.

Osunza nzina na Mulugu ji ttarho yoroma wi nimuziwe, okosa ejuwene jamakamaka. Mbwenyi kaninfwanyelela ogomela venevo. Ninofwanyelela ononelamo ejile eli Yehova obe oziwa mikalelo dhaye.

NZINA NA MULUGU TTIVI? Mulugu nzina naye ddi Yehova. Nzina ntti kaninladdaniheya vina nzina naye nintapulela wi Mulugu onowodha okosa dhotene dhinfuniye

OMUTTANDDILE MULUGU BANI?

Attu enjene anovikosa nivuzo ntti. Txino weyo vina onovikosaga. Mwebaribari egaziveliwe iyo oziwa jiji: Akala ddi Mulugu ottanddile dhotedhene, kito omuttanddile Mulugu bani?

Se waganyedha asientista anorumela wi erimu, elabo, otaganyiha na dhineneri vina mapalaneta, ahikana omaromo. Bibilia vina onorumela na monelo obu, versu yoroma ya mBibiliani enloga: “Omaromelo Mulugu opaddutxa elabo y’odhulu na ya vati.”—Wita 1:1.

Erimu, elabo na dhotene dhilimo kadhivittanddile woka; elobo txipo kimpadduwa woka. Elobo ehiliwo kinwodha ottadda elo. Erimu, elabo na dhotene dhilimo kadhigakalilewo, kohikalawo elo omaromo. Wi erimu, elabo na dhilimo dhikalewo yanfuneya wi elobo obe muttu waliwo vina wahakosa mpaddi wa erimu, elabo na esile dhilimo attandde. Yehova Mulugu onna maningo omuyani, oli namawodha-wodha vina onna eziwelo, Ddittanddile dhilobo dhotene.—Joau 4:24.

Bibilia onloga dhahi mwaha wa Mulugu: “Myango dhihinathi okalawo, elabo na dhilimo dhihinathi woneya, nyuwo mulivi Mulugu okala n’okala-wene.” (Masalmo 90:2) Mulugu kattanddiwe, iyene kanna omaromo nne omagomo. Nona enononeleyamo wi ddi Mulugu, opaddutxile “omaromo” erimu, elabo na dhetene dhilimo.—Ovuhulela 4:11.