Yopurelamo Sabwa ya Odidela​—Makani aba attiddiwe mu Anuário das Testemunhas de Jeová de 2013

Nikuku 45, ddima 1 mpaka nikuku 46, ddima 1​—Afrika

‘Egahikala Yowodheya Ologa na Iyene?’

Musogorheli mmodha wa milogo wa elabo ya Etiopia wela olaleya numba na numba vamodha na mbali mwina. Vamusuwo mwina, awene ahinfanya muyana mmodha vina ahinvuza akala awene agahiwodha ologa na mwinyaya wa ntakulu. Wahawakula eraga wi ejoya kegaali yowodheya, awene ahimukumbirha akala egahiwodheya omuttiyedha nivuru nimodha wi anvahe iyene. Wahidhowa omukumbirha akala iyene agahirumeela, veyeleliye, wahiloga eraga wi ologile wi onfuna arome woona.

Venevo abali ahimperhekela nivuru nimodha wi adhowena anvahe. Muvirile mitala mig’onovi musogorhomwa, iyene wahiyela vina wahiloga wi iyene orumeela wengesa. Venevo mbali mmodha ologa, “Akala iyene kanwodha obudduwa otakulu, egahikala yowodheya wi iyo nivolowe wi niloge na iyene?” Muyana oddule ovolowa dila yina wili wi anvuze. Dila eji iyene ohigoneela vaddiddi opitta dila dhoroma, vina abali anivivuza akala iyene agahiyela. Mwari mwa mudhidhi mwina iyene wahiyela vina wahawobela wi avolowe. Ovano abali ahifiyedha woona wi mwinya wa ntakulu, Yirgu, wali muluvali vina wali vakuguluni sabwa ya oredda mwari mwa vyaka kumi, kawodha obudduwavo nne vina kawodha ogilati. Muyana oddule wahigoneela sabwani iyene wamukamihedha mwinyaya wa ntakulu wabala guwo dhaye vina wasasanyedha mburoya waliye.

Abali abale ahilaleya miselu dhapama. Na wagalala modheela esile dhewiliye, Yirgu wahirumeela nsunzo na Bibilia. Mudhidhi weedda nsunzo naye, wahiroma ovulumuwa. Muvirile mudhidhi, iyene wanwodha ovenya vakuguluni vina waneedda na kadera ya maroda. Venevo iyene wahiroma odhowa omutugumanoni vina obatiziwe va mutugumanoni wa kwatti.