Kadhowagavi Vasogorho ninga Murumiwi
1. Dhotagiha gani dha vyaka zana dhoroma dhinfanyeelihu osanza wi nidhowevi vasogorho ninga arumiwi?
1 Akristu anofanyeela odhowavi vasogorho ninga arumiwi. Noona Yezu wahavaha anamasunzaye mashagiho akamihedhile awene odhowagavi vasogorho na mabasa a olaleya. (Luka 9:1-5; 10:1-11) Jakakene yakosihile Ákila na Prisila omuttukulela Apolo vani vawa “amutapulela vawakwana dila ya Mulugu.” (Mer. 18:24-26) Na sabwa yakakene, Paulo wahimulibiha namalaleya woliba Timóteo wi eregenavi dhasunzihiye wi ‘attu etene oone wunuwa waye.’ (1 Tim. 4:13-15) Ninofanyeela wunuwihavi mabasihu a olaleya nihitanaalaga mudhidhi onlabihu ninga adhari a Nabuya mmabasani a olaleya.
2. Ninawodhe dhavi watagiha eena?
2 Natagihe Attu Eena: Mukalelo mwina wa wunuwiha ewodhelo yehu bwa watagiha attu eena. (Gano 27:17) Na eji namalaleya mwina agalaleyaga weyo onofanyeela omukalela txenjewa. Kakumbirha malago a anamalaleya ana eziwelo ya mukalelo onlaleyani vina wavuruwane mofanyeela enfunani ologa. (Gano 1:5) Ohigana omwiyelela muttu, omusunziha Bibilia, obe okosa mukalelo mwina wa olaleya? Karoma onvuza mwimeleli wa nikuru na olaleya obe namalaleya ona ewodhelo wi awushagihe. Kobuwela wi muya wa Yehova onowodha wunuwiha guru dhehu, dhahene weyo anofanyeela okumbirha mmalobeloni mwawo.—Luka 11:13.
3. Ninakele dhavi malago anvahiwehu s’hikumbirha?
3 Akala onovahiwa nlago wi odhowevi vasogorho, onasilidhiwe masiki akala kukumbirhile nlagona. (Koh. 7:9) Onofanyeela orumeela nikamihedhona na oviyeviha vina na otamaalela ninga mwakoseli Apolo. Ogakosa dhawene onolagiha wi ohikaana malago.—Gano 12:15.
4. Yezu onivahile mukalelo gani woliba wi nikale anamalaleya odhowa vasogorho?
4 Odhowa Vasogorho Onomuttittimiha Mulugu: Alabihedhaga nladdaniho, Yezu wahashagiha anamasunzaye wi adhowevi vasogorho ninga arumiwi. Iyene wahiviladdaniha na mvidera vina anamafara aye ninga dhirasidha. Iyeneya vina wahiloga wi Babe onosasanyedha dhirasidha ‘wi dhibale milima minjene.’ (Joau 15:2) Ninga munfunela mwinya wa mvidera wi obalege milima minjene, Yehova vina onfuna wi iyo nidhowegevi vasogorho banigabaala “mulima wa mazu a mwano mwehu.” (Aheb. 13:15) Wagalala gani onkaanihuna nigadhowagavi vasogorho ninga anamalaleya? Yezu ononivaha yowakulaya: “Nyuwo mugabala milima minjene, mugakala anamasunza aga, panthithimihiwa Babaga.”—Joau 15:8.