Nunuwihaga Ewodhelo Yehu Mmabasani a Omwene—Kakala Namavelela Wokamihedha
Ekalile Eni Yamakamaka: Yezu wahinonelamo ttima ya olaleya muttu na mukwe. Noona mudhidhi warumiliye anamafara aye 70 wi adhowe vasogorho vaye wi alaleye, warumile muttu na mukwe. (Luka 10:1) Namavelela onowodha ovaha nikamihedho nofanyeelela akala namalaleya onogumanana makattamiho obe akala kana ebaribari ya omwakula mwanamurala. (Koh 4:9, 10) Oddule ona eziwelo yowarala podi ogawelana eziwelo yaye vina banvaha malago anwodha omukamihedha oddule onlabaniye bakala namalaleya wa eziwelo. (Gano 27:17) Iyene vina podi omulibiha modheela makani aye olibiha numba na numba.—Fil 4:8.
Ninakose Dhavi:
• Kakala txenjewa mukwawo agavahaga onamoona. (Tia 1:19) Mudhidhi onengesiwa nlebo, ofarihedhe Mbibiliani mwawo. Ejo enele ouvaha gari ya okamihedha egakala yofuneya.
• Olabihedhe etanaalelo yaderetu wi oziwe mudhidhi gani onfanyeeliwe ovolowa mmakaninimwa. (Gano 25:11) Akala weyo ononvelela namalaleya mwina mmasunzoni a Bibilia, dhowakula dhawo dhottiyedhana dhinele otamaaleliwa. Mwadhahene, mudhidhi onlaleya weyo numba-numba, mukwawo wa mabasa txino onokumbirha wi weyo ologe numba yaye. Mohaganyedha, akala iyeneya namalaleya muswa obe kana nikuluvelo na wakula nivuzo obe opambihana, iyene onela otamaalela nikamihedho nawo. Mbwenye akala weyo ononvelela namalaleya numba na numba, oleddo wa wiyelela, obe mmabasani a masunzo a Bibilia, kumuzuzumihe, kumugwaddele, kumwakiye mazu, obe kuwikevo makani ottiyana.
• Mugawelena eziwelo yenyu. Akala, mudhidhi mwina weyo podi onvaha malago namalaleya onlabaniwe wi omukamihedhe wi akaane ewodhelo mmabasani a olaleya, kumaalena. (Gano 3:27) Mwari mwa mudhidhiya, weyo podi oroma ologaga: “Weyo onoonamo dhavi dhikoseliwe?” obe “Onofuna wi dduwaddele elobo?” obe “Miyo ddinfuna ddikose dhahi.” Kakaana muyubuweloni wi oku attu eena anotamaalela ovahiwa malago mmudhidhinimwa, awene anokala onyimuwa akala anosumuleliwa mwari mwa dhovirigana dhawa dhotene.
Kakosa Ejuwene Mwari mwa Mweri:
• Ogamala olaba mmalaleyoni na mukwawo wa mabasa a olaleya omwaddele elogiliye obe ekosiliye envahile ewodhelo ya okala namavelela wokamihedha.