Ásia na Oriente Médio—Makani aba attiddiwe mu Anuário das Testemunhas de Jeová de 2014
Nikamihedho Nivahiwe Mulobwana Wohoona, Wohiwa vina Wohiloga
Nikuku 59, ddima 1, mpaka nikuku 62, ddima 1
Yaka ya 1999, mulogo wa elogelo ya mada o Kobe, Japão, wahimuziwa mulobwana wohiloga wakuweliwa Hirofumi. Mudhidhi wadhowile mbali dhahi omoona, mai waye ohimukoddiha. Mbaliya wahiyela dila dhinjene amukumbiraga vaddiddi wi amoone, mwavenevo mai waye omburutxela vamusuwo. Hirofumiya wahikaana nddevu dholapa, nttitti nonyunyuruwa vina norinteya. Wali ninga muttu wodduwaliwa vasuwa vorameya manje vyaka dhinjene. Omentoni waye kuwatonyihedha mikalelo dhomuttu. Ottiya okala muttu wohiwa Hirofumi vina koona. Mbali wahitikina vaddiddi, mbwenye wahittidda mada aye wi alogena na elogelo ya mada. Mbwenye Hirofumiya kaakulela elobwene. Oredda wohoona wa Hirofumi omuromile bana vyaka 31 dhobaaliwa. Mwavenevo vahivira vyaka 10 ahilogaga na muttu.
Mvirele malabo meeli mbali omwiyelela dila yanawili. Venevo mai wa Hirofumi okala wotikina vaddiddi, sabwani wobuwela yawila mbali kageyelile vamalile iyene wona mukalelo wa mwanaye. Dila yanawili mbali omukumbirha mai waye wi amburutxe mukwaye Hirofumi wi amoone, mmalelani mamayayeya omburutxela vamulago. Mvirele mweri mmodha wa omwiyelela, vowi Hirofumi kaakulela elobwene, mamayaye omwaddela mbali wi katabuwe vina omwiyelela muttu ohinakula elobwene. Masiki na dhawene mbali kamutxelelivi omwiyelela. Vakosiye oleddo wa omwiyelela wanttukula mikatte dhoziva wi amulagihe omukwela waye. Vavirile myeri minli s’hipurelamo, mbaliya wahiroma woona wi walabela yovi.
Venevo mbaliya ogana omwiyelela dila yomariha bahi. Ahinatti odhowa owaniwe, wahilobela wi Yehova amukamihedhe ononelamo akala agahifanyeelelavi omwiyelela Hirofumi. Vafiyile mbali vatakulu va Hirofumi, omuttidda madaye vina baloga na elogelo ya mada wila ohikalawo Mulugu onkuweliwa Yehova oli odhulu onimoona iyene vina onnonelamo goi yaye opitta muttu-muttuvi. Yehova onowuzuzumela vina onofuna wi awufurule mmatabuwoni mwawo. Jijene emurumeliye Munamoona waye apano vatakulu-vawo wi awoone. Vamaromo Hirofumi kalagihilevi etanaalelo; mbwenye vamaleliye wahittidda mada a mbali na guru vaddiddi baroma omottiya mintori. Na okubanya mbali wahifiyedha omottiya mintori vina. Vamalelani ahiroma omusunza Bibilia.
Awene ahisunza vyaka 11. Mudhidhi obu Hirofumi wannoona matugumano mulogo wa elogelo ya mada wali wolapela. Musogorhomwa wahimwalela mulogo wali vakuvi wa ntakulu naye. Mulogoya obo kaliwo mbali waziwa elogelo ya mada mbwenye movira mudhidhi wa myeri 18, abali 22 ahiroma osunza elogelo ya mada wi amukamihedhe Hirofumi. Janeiro wa 2012, Hirofumi wahikosa epaddi ya Eskola ya Orumiwi wa Mulugu na muttu bagatapulela dhalogiye na mada. Mweri wa Outubro yaka yakakene wahikala namalaleya wohibatiziwa.