Kattiya Motto wa Yehova Ottiddagavi

1. Txini enloga Bibilia mwaha wa okwelana watxibarene?

BIBILIA onotapulela okwelana watxibarene na mazu aba okoddela vaddiddi: Okwelana onoviha ninga motto onda wa Yehova. Manje a bara dhotedhene, kagawodhile ottimiha okwelanawa, nne minje vina kigawodhile otolotxa.b (Jibo ya Aliba Okwelana 8:6, 7) Mazu aba anowalibiha atelani wi enowodheya nyuwo, otonyihedha okwelana watxibarene muttu na mukwaye.

2. Txini enfwanyela okosa atelani wi okwelana wawa onobane?

² Okwelana watxibarene vina wamukalakala ontonyihedhana mulobwana na mwadhiye, onda sabwa ya ovilibihedha wawa. Motagiha, karoma wubuwela motto ogasiwe—wi mottoya odhowevi ottiddaga enofuneya wikagavo kuni, ogahikale txenjewa mottoya onodha ottima. Na mukalelo wakakene, okwelana wa mulobwana na mwadhiye, onele odhowavi okalaga wolibene—aweneyá agazuzumela matelo awa. Txino, atelani anodhaga woona wi matelo awa anowobana, makamaka akala awene anowinjiveliwa mittorho ninga oyelega, makattamiho a egumi obe walela aima. Ovano akala weyo wa muteli obe muteliwi, txini enfwanyeliwe okosa wi ottiye motto wa Yehova ottiddagavi vamateloni vawo? Mwari mwa nsunzo ntti, ninele wona ttarho ttaru dhinfwanyeliwe okosa wi matelo awo adhowegevi akalaga olibene vina owagalala.c

KADHOWAGAVI OLIBIHAGA MANDANO AWO NA YEHOVA

3. Okana mandano oliba na Yehova onunuwiha dhavi okwelana wa atelani? (Kohelét 4:12) (Koona vina foto.)

³ Wi motto wa Yehova ottiddegevi vamuralani, muteli na muteliwi anofwanyela ovilibihedha okana mandano oliba na Yehova. Okosa eji enakamihedha dhavi atelani? Akala mulobwana na mwadhiye anovaha ttima mandano awa na Yehova, anovirihamo magano a Yehova ejo enele wakamihedha orabela vina owanana makattamiho agobanihile okwelana wawa. (Kengesa Kohelét 4:12.) Muttu oliba mpaddi womuyani onovilibihedha otagiha mikalelo dha Yehova, ninga oderetu, ovilela vina olevelela. (Ef. 4:32–5:1) Akala atelani anotonyihedhana mikalelo esi okwelana wawa oganunuwavi. Murogora onkuweliwa Lena, oteliwe okwaranya vyaka 25 ohiloga dhahi: “Kinrutxa omukwela vina omuriha muttu woliba mpaddi womuyani.”

4. Txini yamuttukuleli Yehova omusakula José na Maria wi akale amambali wa Mesiya?

⁴ Ndoweni none yotagiha modha ya mBibiliani. Vaganile Yehova wasakula abale agakalile amambali a Mesiya, munihimoni na Davidi, Iyene wamusakulile José na Maria. Sabwaya jani? Sabwani oheli akana mandano oliba na Yehova, vina Yehova wanziwa wi awene agahimwika iyene vamburoni voroma vamateloni vawa. Txini ensunza atelani na yotagiha ya José na Maria?

5. Txini ensunza amamuni na yotagiha ya José?

⁵ José kattigiriga na wiwelela malago adha wa Yehova, eji emuttukulela okala mamuni wapama. Bibilia onologa dila ttaru dhakeliliye malago a Mulugu mwaha wa amudhaye. Dila esi dhetene, iyene waniwelela momaguva-mwene. (Mt. 1:20, 24; 2:13-15, 19-21) Masiki akala yafuneya okosa matxinjo manddimuwa, sabwa ya wiwelela malago a Mulugu, José ohimbarela, ohimukamihedha vina ohimukoya Maria. Txibarene eji emuttukulela Maria omukwela vina omuriha venjene José. Amamuni, enowodheya nyuwo omutagiha José modhela otamela malago a mBibiliani wi muwodhe wabarela amudhenyu.d Masiki akala enofuneya okosa matxinjo, akala weyo onofwara malago a mBibiliani onele woniha wi onomukwela mwadhiyo vina onele olibiha matelo awo. Murogora mmodha onkala o Vanuatu, oteliwe okwaranya vyaka 20, ohiloga dhahi: “Mamunaga agatamela vina agafwara malago a Yehova, omuriha waga onowunuwa. Miyo ddinokala obareleya vina ddinokuluvela dhosakula dhaye.”

6. Txini ensunza ateliwi na yotagiha ya Maria?

⁶ Maria wahikana mandano oliba na Yehova, iyene kamujedha José wi alibihe nroromelo naye. Vina wanziwa deretu Malebo. (Koona A Sentinela de Fevereiro de 2016, pág. 17, ddima 17) Iyene vina wantamela mudhidhi wa otanalela. (Lk. 2:19, 51) Kinaganyedhiwa wi sabwa ya okala muttu woliba mpaddi womuyani, Maria wali muteliwi wapama. Masaka abano, ateliwi enjene anovilibihedha omutagiha Maria. Motagiha, murogora onkuweliwa Emiko ohiloga dhahi: “Miyo baddili muziye, ddahisakula mudhidhi wa ovizuzumela mpaddi womuyani. Mbwenyi mmalilemi oteliwa, mamunaga ddàkosa nlobelo vina ddasogorhela webedha wa ntakulu, mwa venevo miyo ddahizinddiyela wi ddahiroma omujedhana mamunaga oddizuzumelaga mpaddi womuyani. Mbwenyi ddihona wi ddi miyo ddamwinya wafwanyela olibiha mandano aga na Yehova. Ovano miyo ddinotamela mudhidhi wa olibiha mandano aga na Mulugu—ddilobelaga, ddimwengesaga Bibilia vina dditanalelaga dhinengesimi.” (Gal. 6:5) Ateliwi, mudhowegevi mulibihaga mandano enyu na Yehova, mugakosa dhawene amamunenyu anele okana sabwa dhinjene dhowutamalelani vina wukwelani.—Gano 31:30.

7. Txini ensunza atelani na yotagiha ya José na Maria sabwa ya omwebedha Yehova vamodha?

⁷ Wi José na Maria alibihe mandano awa na Yehova, aba ali mabasa azuzumelani mumodhani. Mwa awene yali elobo yamakamaka vaddiddi omwebedha Yehova mumodhani ninga anamudhi. (Lk. 2:22-24, 41; 4:16) Ejo yali elobo yorutxa makamaka varomilani okana aima enjene, mbwenyi awene ahiwodha. Eji yotagiha yapama enfwanyela ofwara atelani, masaka abano! Akala weyo ohikana aima, dhahene ninga José na Maria, enodhaga okala elobo yorutxa odhowa omatugumanoni obe otamela mudhidhi wa okosa webedha wa ntakulu. Yottabwaya enodhaga okala yorutxa ofwanya mudhidhi w’onsunza vina olobela vamodha ninga atelani. Masiki dhawene, mugavilibihedha omwebedha Yehova mumodhani munokala ofiyedheya na iyene vina muttu na mukwaye. Nona, mwike dhilobo dhomuyani vamburoni voroma.

8. Akala atelani anogumanana magudulano a okosa webedha wa ntakulu mumodhani, txini enakamihedhe?

⁸ Txini enfwanyela weyo okosa akala onogumanana maguddulano vamuralani? Txino, nyuwo moweli kamuna efunelo ya okosa webedha wantakulu vamodha. Na makattamiho ninga aba, txino enokala yapama oroma na dhilobo dhing’ono obe elebo enziveliwenyu osunza oheli. Okosa eji, enele olibiha okwelana wenyu vina enele wunuwiha efunelo yozuzumela dhilobo dhomuyani vamodha.

MUTAMELE MUDHIDHI W’OKALA VAMODHA

9. Enfuneyela nni muteli na muteliwi otamela mudhidhi w’okala vamodha?

⁹ Atelani, enowodheya nyuwo olibiha okwelana wenyu modhela otamela mudhidhi w’okala mumodhani. Okosa eji enele wukamihedhani ononelamo dhubuwelo vina mukalelo onviwamo muttu-muttu—ottiya oviwonaga ninga amwiddani. (Wita 2:24) Koona ezinddiyeli Lilia na Ruslan mumalilani otelana, muvirile vyaka okwaranya 15 mundduni. Lilia ohiloga: “Nobuwela wi nelege okala mudhidhi mwinjene vamodha, mbwenyi kahiye ejuwene epadduwile. Mudhidhi wotene nankana dhokosa, odhowa omabasani, dhilobo dha vatakulu vina walela aima. Mwa venevo, nahizinddiyela wi nanfwanyela otamela mudhidhi wi nikalege vamodha, kohikosa ejuwene nigahikala olapelana muttu na mukwaye.”

10. Atelani anawodhe dhavi ovirihamo enloga Éfeso 5:15, 16?

¹⁰ Txini enfwanyela okosa atelani wi akane mudhidhi w’okala vamodha? Txino enofuneya otamela obe olagana mudhidhi onfwanyelani okala muttu na mukwaye. (Kengesa Éfeso 5:15, 16.) Mbali mmodha wo Nigeria onkuweliwa Uzondo, ohiloga dhahi: “Miyo ddigatadelaga mabasa aga, ddinogawa mudhidhi onfwanyelemi okala na mwadhaga vina ddinowika mudhidhene obo vamburoni voroma.” (Fil. 1:10) Koona yotagiha ya Anastasia, onkala o Moldavia, iyene mwadhi wa nameddelela milogo, mbwenyi ofwanya marhe olabihedha pama mudhidhi waye. Iyene ohiloga dhahi: “Miyo ddinosasanyedhaga dhilobo dhaga mudhidhi onsasanyedha mamunaga mabasa aye a mmulogoni. Sabwa ya ejuwene ninokana mudhidhi w’okala vamodha.” Ki akala kamunkana mudhidhi sabwa ya winjiveliwa mabasa vina enokala yorutxa ofwanya mudhidhi w’okala vamodha?

11. Mabasa gani akosa Ákila na Prisila mumodhani?

¹¹ Enowodheya atelani osunza na yotagiha ya Ákila na Prisila, atelani arihiwa venjene na Akristu oroma. (Rom. 16:3, 4) Bibilia kanloga venjene sabwa ya matelo awa, mbwenyi onowoniha wi awene anlaba, anlaleya vina anakamihedha attu ena, mbwenyi akosa dhetedhene esi mumodhani. (Mer. 18:2, 3, 24-26) Ebaribariya jiji, Bibilia agamulogaga Ákila, onimuloga mumodhani na Prisila.

12. Txini enfwanyela okosa atelani wi akane mudhidhi wa okala vamodha? (Koona vina foto.)

¹² Atelani anawodhe dhavi omutagiha Ákila na Prisila? Kobuwela mabasa menjene ana nyuwo wi mukose. Koddi egahiwodheya nyuwo okosa mabasaya aba mena mumodhani ninga atelani? Munokosa masasanyedho a obudduwa mmabasani a olaleya mudhidhi na mudhidhi? Motagiha, Ákila na Prisila anlaba vina vamodha. Enodhaga opadduwa nyuwo oheli kuhikana mabasa mamodhene, mbwenyi agahiwodheya okosa mabasa mena vamodha, ninga okuputta vatakulu? (Koh. 4:9) Akala mmodha onomukamihedha mukwaye na mabasa a vatakulu, nyuwo munele wona wi munlaba ninga nikuru vina munele okana mudhidhi wa ologa makani. Robert na Linda mutelilanina dhinovira vyaka okwaranya 50. Robert ohiloga dhahi: “Iyo kanina mudhidhi mwinjene wa ovega vamodha. Mbwenyi, miyo ddigasuwaga maparato oku mwadhaga omihaga maparatoya vina ddigamusasanyedhaga Jardim, iyene onodha oddikamihedha, eji enoddagalaliha venjene. Okosa dhilobo mumodhani enonikamihedha okala ofiyedheya muttu na mukwaye. Vina okwelana wehu, onodhowavi wunuwaga.”

13. Txini enfwanyela okosa atelani enlagiha wi anowiwanana txibarene?

¹³ Mbwenyi, kudduwale wi okala vamodha kintapulela wi nyuwo munowiwanana. Muteliwi mmodha wo Brasil ohiloga dhahi: “Masaka abano dhihikalawo dhilobo dhinji dhinzuzumiha, sabwa ya ejuwene ninodhaga wubuwela wi ninokala vamodha sabwa ya okala ntakulu modhene. Miyo ddihisunza wi okala vamodha kinakwana. Ddinofwanyela omuzuzumela mamunaga na dhojombeliwa dhaye.” Koona ekosile Bruno na mwadhiye Tays, wi azuzumelanege muttu na mukwaye. Iyene ohiloga dhahi: “Nigakana mudhidhi w’okala vamodha, ninoroma ottiya matelefoni wi nilabihedhe pama mudhidhi obo onihu.”

14. Akala atelani kanziveliwa ovira mudhidhi vamodha, txini enfwanyelani okosa?

¹⁴ Ki akala nyuwo kamunziveliwa ovira mudhidhi vamodha? Txino, munoziveliwa okosa dhilobo dhottiyana obe mugatamela mudhidhi w’okala vamodha kamunrutxa onyimulana. Txini enfwanyelinyu okosa? Kobuwelani wili yotagiha ya motto ogasiwe. Motto ogagasiwa kunttidda momaguva-mwene, enofuneya mudhidhi na mudhidhi wikaga kuni. Mufwaraga yotagiha eji, munkoddelani valaboni otamela mudhidhi mung’onovi wa okalaga vamodha? Mutamele okosa dhilobo dhinuzivelani moheli, vina murabele dhilobo dhinutotelani ogudulana. (Tia. 3:18) Mugaroma vang’ono-vang’ono, munele owodha wunuwiha okwela wenyu.

MURIHEGENA

15. Orihana okaleli eni elobo yamakamaka wi okwela wa atelani onobane?

¹⁵ Orihana onofuneya venjene vamateloni. Orihana onoladdanihiwa na Oxigênio. Oxigênio ogahikalewo, motto onottima momaguva. Na mukalelo wakakene, se orihana, okwela oli vamateloni onele wobana momaguva. Mwa mpaddi mwina, mulobwana na mwadhiye agavilibihedha weddihana na nriho okwela wawa oganunuwavi. Txino, weyo onodhaga wubuwela wi onolagiha nriho, mbwenyi mamuno obe mwadhiyo onowona wi weyo onomuriha? Penny na mamune Aret atelilena okwaranya vyaka 25. Penny, ohiloga dhahi: “Weddihana na nriho onlagiha iyo muttu na mukwaye onodhana wagalala vamuralani vehu. Iyo ninokala otapuwa wi niloge makani muttu na mukwaye sabwani ninoziwa wi enubuwela muttu mmodha jamakamaka mwa muttu mwina.” Txini enfwanyeliwe okosa wi mamuno obe mwadhiyo aziwe wi weyo onomuriha? Koona yotagiha ya Abrahamu na Sara.

16. Txini ensunza amamuni na yotagiha ya Abrahamu? (1 Pedro 3:7) (Koona vina foto.)

¹⁶ Abrahamu wanimweddiha Sara na nriho. Abrahamu wanvuruwana moonelo dha Sara vina wanriha dhobuweliye. Dila modha, Sara wahinyimuwa vaddiddi vina wanfuna omwaddela Abrahamu dhetedhene dhobuweliye. Iyene wahifiyedha ompwatteliha Abrahamu muladdu sabwa ya makani apadduwile. Koddi, Abrahamu wahinyimuwa na Sara? Nne. Iyene wanziwa wi Sara wanimwiwelela vina wanimukamihedha. Abrahamu wahinvuruwana Sara vina wahitamela ogomiha makattamihoya. (Wita 16:5, 6) Txini ensunzihu? Amamuni, ebaribari wi nyuwo muhikana ettomo ya osogorhela vamuralani. (1 Kor. 11:3) Noona, enokala yapama mamuni otonyihedha okwela modhela ovuruwana moonelo wa mwadhiye ahinatti okosa yogana, makamaka akala yoganaya enele ompatta. (1 Kor. 13:4, 5) Dila dhina enodhaga opadduwa mwadhiyo onyimuwa vina yofuna yaye jikala wuwaddela makaniya. Koddi weyo onele olagiha nriho modhela onvuruwana mukalelo onviwamo iyene? (Kengesa 1 Pedro 3:7.) Angela na Dimitry atelana okwaranya vyaka 30. Angela onotapulela enkosa mamune, enlagiha wi iyene onorihiwa: “Dimitry oli omala-nawale wi avuruwane ejile enlogimi masiki ddiganyimuwa iyene mulobwana wovilela vaddiddi.”

17. Txini ensunza ateliwi na yotagiha ya Sara? (1 Pedro 3:5, 6)

¹⁷ Sara wanimuriha Abrahamu vina wankamihedha dhogana dhaye. (Wita 12:5) Siku dhahi aleddo ahifiya vatakulu va Abrahamu. Iyene wahigana osasanyedha dhoja, mwa venevo iyene omukumbirha Sara wi orome ottiya dhakosiye vina asasanyedhe muttengo mwinjene wa pawu. (Wita 18:6) Sara wahikamihedha yogana ya Abrahamu vina mudhidhene obule wahikosa yakumbirhiwiye. Ateliwi, munele omutagiha Sara mugakamihedha dhogana dha amamunenyu. Mugakosa dhawene, munele olibiha matelo enyu. (Kengesa 1 Pedro 3:5, 6.) Dmitry, ologiwe mundduni, ohitapulela enkosa mwadhiye enooniye wi iyene onomuriha. Iyene, ohiloga dhahi: “Miyo ddinoziveliwa Angela agakamihedha dhogana dhaga, masiki akala moonelo dhehu s’ottiyana. Masiki akala eganile miyo kikalile, iyene kanloga bure.” Veneva enowoneya wi kinrutxa omukwela muttu onuriha!

18. Txini enapadduwe atelani agattiya motto wa okwelana ottiddagavi?

¹⁸ Masaka abano, Satana onokosa muli mwetemwene wi agomihe okwela wa vamateloni. Iyene onoziwa wi akala atelani anottiya okwelana eji vina enele wattukulela wobaniha omukwela wawa Yehova. Mbwenyi, okwela watxibarene, txipo kungoma! Kakosa muli mwetemwene, wi okwela wa vamateloni vawo okale ninga okwela onlogiwa munivuruni na Jibo ya Aliba Okwelana. Mmwike Yehova vamburoni voroma vamateloni venyu, katamelani mudhidhi w’okala vamodha vina mulagihe wi munoriha dhubuwelo na dhojombeliwa dha muttu na mukwaye. Mugakosa dhawene, nyuwo munele omuttittimiha Yehova oli Niparha wa okwela watxibarene, dhahene ninga motto ogasiwe ondowavi ottiddaga, okwelana wenyu onelege odhowavi wunuwaga okala-n’okala-wene.