Nilibihanege “Venjene” Muttu na Mukwaye

1. Paulo wakokomezela nni Akristu a Ahebreu wi alibihanege muttu na mukwaye “venjene”?

VYAKA zana dhoroma, murumiwi Paulo wahavaha nikokomezo Akristu Ahebreu: “Nubuwelanege wi nilibihe okwela, othidda mabasa apama. Kanitxelele matugumano ehu, ninga eniraga ena; nilibihanege thabwa-thabwa apa vanziwenyu wi siku na Nabuya nli vakuvi.” (Ahebreu 10:24, 25) Abali ahivivuza mwahaya wamutukulile Paulo wawaddela wi jofuneya awene olibihagana muttu na mukwaye venjivene. Muvirile vyaka tanu, yalogiliye yawoneya. Mudhidhene obu awene ahoona wi siku na Yehova nafuniye omuttonga Jeruzalemi nali vakuvi. Awene adha ononelamo wi anfwanyela obudduwamo ninga mwalogile Yezu. (Luka 21:20-22; Merelo 2:19, 20) Labo na Yehova nadhile vyaka 70, mudhidhi ogujuliwe Jeruzalemi na Akadda Roma.

2. Masaka abano enfuneyelani olibiyaganavi muttu na mukwanye?

² Masaka abano, iyo ninfwanyeya mapadduwo oligana. Txibarene siku “ninddimuwa” na Yehova nili vakuvi. (Jowel 2:11) Mazu a namavuhulela Sofoniya anowakwanihedheya nsaka nttino: ‘Siku ninddimuwa na Yehova nili vakuvi ninfuna ofiya-wene kanili oddayi!’ (Sofoniya 1:14) Nona, ninofwanyela “nubuwelanege wi nilibihe okwela, othidda mabasa apama.” (Ahebreu 10:24) Ninofwanyela watanala abali ehu wi nalibihe agafanyiwa dhowobaniha.

BANI ONFWANYELA OLIBIHIWA

3. Txini elogile murumiwi Paulo mwaha wa olibihana? (Koona foto eli omaromo.)

³ “Makathamiho anomukukumula muthu, mazu apama anompangarhaza.” (Gano 12:25) Iyo notene masaka mena ninofuna olibihiwa. Paulo wahiloga wi masiki abale attomeliwe walibiha attu ena anofuna vina olibihiwa. Iyene wahalebela abali Akadda Roma: “Txibarene ddinowunlela odha owonani, wi dduperhekeleni mivaho dha muya, mulibihiwena. Thabwa-thabwa ddinowunlela ogumana na nyuwo, wi vari venyu miyo vina ddilibihiwe na nroromelo nimodha-nene nineddana nyuwo na miyo.” (Roma 1:11, 12) Masaka mena murumiwi Paulo wanfuna olibihiwa vina.​—Kengesa Roma 15:30-32.

4, 5. Masaka abano analibihege iyo bani, nanda sabwaya jani?

⁴ Masaka abano enowodheya walibiha abale animulabela Yehova mudhidhi wotene ninga apionero o’roromeleya. Enjene anottiya okosa dhilobo dha ttima mwigumini mwawa wi alabe ninga apionero. Eji enopadduwa na amisionario, Abetelita, anameddelela milogo na awadhiwa vina abale anlaba mimburo dhotapulela. Etene aba anokosa guru wi amulabele Yehova alabihedhaga mudhidhi wawa mwinjene. Nona ninofuniwana wi nalibihe. Akalawo ena anfuna olaba mabasa a mudhidhi wotene mbwenye kanwodha. Awene anotamaalela agalibihiwa.

⁵ Bani onfwanyelela olibihiwa? Iyo ninojedheliwa wi nalibihe abali na arogora anvilela noziye wi ewelele nlamulo na Yehova ninloga oteliwa ‘mwa Nabuya.’ (1 Korinto 7:39) Ateliwi anolibiheya akala amamunawa anologa wi anowakwela vina anotamaalela na dhinkosani. (Gano 31:28, 31) Akristu anfwarafariwa obe ali aredda anotamela nlibiho. (2 Tesalónika 1:3-5) Yehova na Yezu anowalibiha etene ali ororomeleya.​—Kengesa 2 Tesalónika 2:16, 17.

ANDDIMUWA A MULOGO ANOWODHA ONILIBIHA

6. Mabasa gani anttidda “mwene” onlogiwa va Izaiya 32:1, 2?

⁶ Kengesa Izaiya 32:1, 2. Iyo ninkala masaka orutxa noona kaninrutxiwa okukumuwa vina wobana. Yezu onowalabihedha abali ottikitteliwa, “amwene” ororomeleya na mabila mena wi anilibihe. Anddimuwa a mulogo kahiye ‘amesirhi’ ammaga nroromelo nehu, mbwenye ‘akwehu a mabasa’ annivaha wagalala. Awene anfuna anikamihe wi naagalale vina nikale ororomeleya.​—2 Korinto 1:24.

7, 8. Anddimuwa a mmulogoni anakamihe dhavi attu na mazu awa vina na merelo?

⁷ Anddimuwa a mmulogoni anofwanyela omutagiha murumiwi Paulo, vowi iyene mudhidhi wotene wanalibiha abalaye. Iyene wahalebela karta abalaye akadda Tesalónika afwarafariwa: ‘Iyo ninowukwelani venjene, ofiyedha otamela owulevelani egumi yehu, kahiyo ouvahani muthakavi wa Mulugu. Txibarene nanukwelani-wene.’​—1 Tesalónika 2:8.

⁸ Anddimuwa a mmulogoni anowodha olibiha na mazu awa. Mazu bahi anowakwana? Paulo wahawaddela anddimuwa a akadda Éfeso: “Na merelo menjene dduwonihani wi enofuneya othidda mabasa, owakamyedhana ahawi, nubuwelaga mazu a Nabuya Yezu anloga: ‘Ovaha onothabiha opitha ovahiwa.’” (Merelo 20:35) Paulo wali ‘womala-nawale wovilevela’ abalaye. Iyene wahitonyihedha na merelo aye wila wali womala nawale wi akose elobo-txilobo mwa awene. (2 Korinto 12:15) Na mukalelo wakakene, anddimuwa a mmulogoni anofwanyela walibiha vina wapangarhaza attu ena na mazu vamodha na merelo. Agakosa dhawene anotonyihedha wi awene anonitanala.​—1 Korinto 14:3.

9. Addimuwa a mmulogoni anivilibihedha dhavi ovaha malago na mukalelo wolibiha?

⁹ Wi akamihedhe abali, masaka mena anddimuwa a mulogo anowavaha malago. Awene anowodha osunza mBibiliani marhe ovahana malago na mukalelo wolibiha. Yezu ohivaha yotagiha yaderetu ya ovaha malago nanda wahaperhegenza miselu mmilogoni dho Ásia menor mwamaleliye ovenya mukwani. Iyene wahavaha malago aderetu milogo dha Éfeso, Pergamu na Tiatira. Mbwenye ahinatti walaga, iyene wahasiba mwaha wa dhilobo dhaderetu dhakosani. (Ovuhulela 2:1-5, 12, 13, 18, 19) Yezu wahiloga na mulogo wa Laodiseya: “Miyo ddinowasumulula, ddinowalaga na goyi abale anakwelimi.” (Ovuhulela 3:19) Anddimuwa a mulogo anovilibihedha osaza mukalelo wa Yezu wa ovaha malago.

KAHIYE ANDDIMUWA A MMULOGONI BAHI ANFWANYEELA WALIBIHA ATTU EENA

10. Iyo notene ninalibihena dhavi muttu na mukwaye?

¹⁰ Kahiyo anddimuwa a mulogoni ekiwa anfuniwana walibiha attu ena. Paulo owakumbirha Akristu wi aloge “mazu a pama anlabela oleleya onfuneya, onapuriha” attu ena. (Éfeso 4:29) Muttu-muttu wa iyo obuwelege txini enfanyeeliye okosa wi akamihedhe akwaye. Paulo owalebela Akristu a akadda Ahebreu: “Nona libihani nyono dhenyu dhiwaheyile, myeddo dhenyu dhindederuwa. Myalihani dila dhokoromana dhinvirenyu, wi nnyalo na muliba otopinya ninaribituwemo, nile wogowa.” (Ahebreu 12:12, 13) Notene ninowodha olibihana vina opangarhazana muttu na mukwaye, masiki akala nili azombwe.

11. Txini emukamihedhile Marthe mukubanyani mwaye?

¹¹ Murogora dhahi onkuweliwa Marthe wahikana mudhidhi wakaliye wokubanyene.a (Koona yowenjedhedha.) Iyene ohileba: “Labo dhahi, valobela miyo wi ddilibihiwe, ddahimuziwa murogora wowunuwelavo oddittoyiyedhile okwela na ttagaraga yafunimi mudhidhene obule. Iyene vina wahiddipanga yampadduweli venevo miyo ddidha ononelamo wi kaddili meka.” Murogora oddu kaziwile wi mazu aye amukamihedha Marthe!

12, 13. Ninalabihedhe dhavi nikokomezo ninfwanyeya va Filipi 2:1-4?

¹² Paulo owalebela Akristu o Filipe: “Amudhaga! Akala Kristu onoulibihani, okwela onoupangarazani, Muya Wokoddela onoukalihani mumodhani, akala txibarene munoweddana okwelana na thagaraga, akwanihaní othaba wa murimaga; mweddegena mubuwelo mamodhene, okwelana wakene. Mwiwananege, mukale na murima mmodhene. Muhire elo-wene na murima wa mavurhano, wovithithimiha; muthu-muthu na oviyeviha onddimuwa awonegena akwaye thima enpitha yaye. Ahizuzumelege yayeví, atabuwelege vina dha akwaye.”​—Filipi 2:1-4.

¹³ Netene ninofuniwana oveda marhe o’libihana muttu na mukwaye. Iyo nitonyihedhe ‘okwela na nipangarhazo’ ‘wiwanana wokristu’ vina ‘okwelana na thagaraga’ wi nalibihe abali na arogora.

MAKALELO MENA A OLIBIHA

14. Mukalelo onfwanyela iyo walibihana attu ena buvi?

¹⁴ Jowagalaliha wiwa wi abale akamihedhe iyo anodhowavi na nroromelo nawa noliba. Murumiwi Joau ohileba “Kayiwo yina enddithabiha, ehilí oziwa wi anaga anowedda mwibaribarini.” (3 Joau 4) Apionero ena anowagalala agewa wi muttu omukamihedhilani osunza ebaribari wale onodhowavi amulabelaga Yehova, obe anolaba ninga pionero. Apionero aganyimuwa, ninofwanyela wawubutxedha dhilobo dhaderetu dhikosilani wi akamihedhe attu ena.

15. Txini enakose iyo wi natamaalele abale anlaba na nroromelo?

¹⁵ Anameddelela milogo na awadhiwa enji ahiloga wi ahilibiheya vaddiddi mudhowelani weddelela milogo nanda avahiwa matamaalelo sabwa ya mabasa ankosani. Eji vina enopadduwa na anddimuwa a mmulogoni amisionario abetelita vina otene abale animulaba Yehova na nroromelo. Watamalela mukalelo wawalibiha.

NOTENE IYO NINAWODHE DHAVI OLIBIHA

16. Elobo gani yohirutxa okosa enamulibihe muttu-muttuvi?

¹⁶ Kito akala weyo kunwodha ologa na attu ena eniwamo weyo mwaha wa awene? Kahiyo yorutxa walibiha attu ena. Karoma nomuteyela muttuya. Agakodda wakulela na emwerumweru, txino iyene ohikana makattamiyo oninveda muttu wi alogena. Weyo onele omulibiha oganvuruwana.​—Tiago 1:19.

17. Txini emukamiyedhile mbali dhahi a muzombwe?

¹⁷ Mbali dhahi wa muzombwe onkuweliwa Henri wahikukumuwa vaddiddi mudhidhi ottiyile amudhaye omulabela Yehova. Mmodhaya ddi babe wali munddimuwa wa mmulogoni. Nameddelela milogo wawona wi Henri wahikubanya noona wahimoba wi adhowe amwe kafé vamodha. Iyene wahinvuruwana Henri nofwaseya alogaga dhetene dhamusosa. Henri wanonelamo wi akala iyene afuna wi attu a murala waye amwiyelele Yehova yanfuneya iyene emele txitti mwebaribarini. Elobo yina emulibihile wengesa Masalmo 46, Sofoniya 3:17, na Marko 10:29, 30.

18. (a) Txini elebile mwene Salamao sabwa ya olibihana? (b) Nikokomezo gani nivahile murumiwi Paulo?

¹⁸ Txini ensunza iyo na yotagiha ya Marthe na Henri? Muttu-muttu wa iyo onowodha walibiha vina wakamihedha abali na arogora antamela nipangarhazo. Mwene Salomau wahileba: ‘Oziva gani wa nzu—nivahana na mudhidhiyá. Wañgana wohagalala onottabiha murima; mpaganyo waderetu onovaha guru.’ (Gano 15:23, 30, koona yowenjedhedha.) Weyo onomuziwa muttu onkubanya obe onyimuwile? Kito ogamukosela elobo yohirutxa ninga omwengesele Mwang’aneli obe elobo-txilobo eli mu site mwehu? Paulo wahiloga wi wiba jibo dhomwene vamodha enonikamihedha okala deretu. Iyene ohileba: “Muwaralihanege, muvahagane malago na zelu yotene. Na murima wotamalela mmwibelege Mulugu jibo, masalmo na mébelo mena ambudduwa mmurimani.”​—Kolosi 3:16; Merelo 16:25.

19. Ekaleleni yofuneya olibihana venjene, nanda txini enfwanyela iyo okosa?

¹⁹ Vowi labo na Yehova nili vakuvi, jamakamaka olibihana muttu na mukwaye. (Ahebreu 10:25) Ninowagalala nigakosa, ninga mulogeli Paulo: “Nona libihanina murima, mukamiyedhagane ninga mulemelelinyu wira.”​—1 Tesalónika 5:11.