NIPADDUWO 16
Izaki Ohimugumela Muyana Waderetu
WEYO onomuziwa bani muyana oddu oli va nladdanihoni nthi? Nzina naye ddi Rebeka. Nanda mulobwana oddu oninfarela ddi Izaki. Muyana oddu onfuna akale mwadhiye. Eji yapadduwile dhavi?
Babi wa Izaki Abramu wanfuna omugumelela mwana waye muyana waderetu. Iyene kanfunana Izaki omutela muyana wa o Kana, sabwani athu aba annawebedha amilugu ahili a ebaribari. Noona Abramu wahimutxemerha mudhari waye nanda wahiloga dhahi: ‘Ddinfuna wila weyo wiyelele okule onkala amudhi aga o Hara nanda omugumelele mwana waga Izaki muyana.’
Mohigoneela mudhari wa Abramu wahathukula akamelo kumi nanda bakosa oleddo wolapa. Mwafiyeliye vakukuvi na mburo obule wakala amudhi a Abramu, iyene wahiimela vatxelani. Yali txuguwo othamagela egudduguddu, mudhidhi onda ayana a musidadi oruga manje vatxelani. Dhaene mudhari wa Abramu wahiloga mu nlobeloni wa Yehova: ‘Muyana odduwene onddivaha manje a omwa vamodha na akameloya akale odduwene omusakulilinyu wila akale mwadhi Izaki.’
Mohigoneela Rebeka wahidha wila aruge manje. Mudhari oddule mwakumbirheliye manje a omwa, iyene wahinvaha. Mumaleliye iyene wahirugela manje owakwanela akamelo abale otene aapiwe nthona. Aba aali mabasa oorutxa sabwani akamelo anomwa manje menjene vaddiddi.
Rebeka mumaleliye okosa ejene, mudhari wa Abramu wahinvuza nzina na babi waye. Iyene wahimukumbirha vina akala egahiwodheya iyene okala omathiyu obule vatakulu vawa. Iyene wahiloga dhahi: ‘Babi waga ddi Betueli, nanda ohikala mburo wila nyuwo mukale na iyo.’ Mudhari wa Abramu wahiziwa wila Betueli wali mwana wa mbali wa Abramu Naori. Noona iyene wahikokora nanda bamutamaalela Yehova sabwa ya omusogorhela mpaka wa amudhi a Abramu.
Omathiyu obule mudhari wa Abramu wahimpanga Betueli na murogori wa Rebeka Labani sabwa yadheeliye. Oheeli aahirumeela wila Rebeka agahifanyeela odhowa na iyene wila ateliwe na Izaki. Rebeka walogile eni mwavuzeliwiye? Iyene wahiloga: ‘Indde,’ iyene wanfuna odhowa. Noona mmangwananimwa s’ohigoneela aahawela akamelo nanda aahiroma oleddo wolapa wowiyelela o Kana.
Mwafiyelani, yali egudduguddu. Rebeka wahimoona mulobwana bageedda mmunddani. Oddu wali Izaki. Iyene wahiziveliwa sabwa ya omoona Rebeka. Mai waye Saara wahimala okwa vyaka tharu bahi mundduni, nanda iyene walivi wokubanyene sabwa ya ejene. Mbwenye ovanene Izaki wahidha omukwela vaddiddi Rebeka, nanda iyene wahikala wili na osanzaya.