NIPADDUWO 40
Moize Ohibubudda Mwarha
YAKA na yaka ehivira—vyaka 10, vyaka 20, vyaka 30, vyaka 39! Nanda Aizraeli alivi mwiddeddereni. Mbwenye vyaka esi dhotene Yehova ohikoya nlogo naye. Iyene ohajiha mana. Na mutana iyene ohasogorhela na ntxikwa na murabo, nanda na mathiyu ohasogorhela na ntxikwa na motho. Otene mwari mwa vyaka esi dhabalo dhawa kadhuluvalile nanda manyalo awa kapile.
Ovanene bu mweri woroma wa yaka 40 oromana mubudduwelani mu Ejipito. Wili Aizraeli ahisama va Kades. Pa veneva vaalani mwarumeliwe anamareza 12 wila eeddelele elabo ya Kana othamagela vyaka 40 mundduni. Miriamu murogori wa Moize ohikwa va Kades. Nanda ninga mwapadduwelani mundduni, apa vahikala makathamiho.
Athu kanwodha ofanya manje. Noona awene ahimulogela thogorogo Moize: ‘Egahikala deretu iyo kookwa. Weyo oniburutxelini mu Ejipito bunidhana vamburoni obu wowopiya ohimmela elobo? Kavali thaga, nne figu, nne uva, kavali roma. Apa kavali nne ngafuna manje a omwa.’
Moize na Arau mwadhowelani olobela o tabernakulu, Yehova ohimpanga Moize: ‘Kagumaniha nlogo vamodhavi. Ogamala vamentoni va awene otene kalogela mwarha obule oli apale. Manje owakwana anela obudduwa mmwarhani mpu wila athu vamodha na dhinama dhawa dhotene amwe.’
Noona Moize ohigumaniha nlogona, nanda ohiloga dhahi: ‘Kavuruwanani, nyuwo muhinimukuluvela Mulugu! Arau na miyo nuburutxeleni manje mmwarhani mpu?’ Mumaleliye Moize ohibubudda mwarhaya na mukongozo waye dila biili, nanda ngwarha enddimuwa ya manje ehibudduwa mmwarhani mpu. Vahikala manje a omwa owawakwanela athu otene vina dhinamadha.
Mbwenye Yehova ohiludduwa na Moize vina Arau. Weyo onoziwa sabwaya? Sabwani Moize na Arau alogile wila awene bafuna oburutxa manje mmwarhani. Mbwenye wakosile eji ddi Yehova txibarene. Nanda sabwa ya Moize na Arau okoodda ologa ebaribari mwaha wa eji, Yehova ohiloga wila onfuna aasothothe. Iyene ohiloga wila: ‘Nyuwo kamunasogorhele nlogo naga ovolowa mu Kana.’
Mohigoneela Aizraeli ahibudduwa va Kades. Muvireli mudhidhi muñgonovi awene ahifiya va Mwangoni Hori. Veneva, omutompini wa mwango, Arau ohikwa. Mudhidhi wa okwa waye iyene wana vyaka 123 dha obaaliwa. Aizraeli anokubanya vaddiddi, noona mwari mwa masiku 30 nlogo notene nihimulila Arau. Eliazari mwana waye ohidha okala namakutha munddimuwa wa nlogo na Izraeli.
Olebeliwa 20:1-13, 22-29; Deuteronomo 29:5.