NIPADDUWO 43
Josue Ohidha Okala Musogorheli
MOIZE onfuna avolowe mu Kana vamodha na Aizraeli. Noona iyene ohikumbirha: ‘Yehova, kaddithiyeni ddabuwe Mwinje Jordano, nanda ddoone elaboya yaderetu.’ Mbwenye Yehova ohiloga dhahi: ‘Bahi! Kuromole eji viina!’ Weyo onoziwa sabwa yalogeli Yehova ejene?
Sabwa ya ejile yapadduwile Moize mwabubuddeliye mwarha. Kobuwela, iyene na Arau kaamuthithimihile Yehova. Awene kaapangile nlogo wila wali Yehova waburutxile manje mmwarhani. Sabwa ya ejene Yehova wahiloga wila iyene kagaathiyile awene ovolowa mwilaboni ya Kana.
Noona muvireli myeri dhiñgonovi mukweli Arau, Yehova ohimpanga Moize: ‘Kamuthukule Josue, nanda omwimetxe vamentoni va namakutha Eliazari vina va nlogo. Nanda venevo vamentoni va awene otene, kaapange athu otene wila Josue ddi musogorheli muswa.’ Moize ohikosa txibarene ejile elogile Yehova, ninga munooneliwe va nladdanihoni nthi.
Mumaleliye Yehova ohimpanga Josue: ‘Kakala wa guru, nanda kuwove. Weyo onela wasogorhela Aizraeli ovolowa mwilaboni ya Kana ejene yaroromelihimi awene, nanda ddinela okala na weyo.’
Vasogorhova Yehova ohimpanga Moize wila awele omutompini wa Mwango Nebo mwilaboni ya Moabe. Ovenyedha wenewale omutompini Moize ohiwodha wañgana kobela ejile ya Mwinje Jordano nanda boona elabo yokoddela ya Kana. Yehova ohiloga dhahi: ‘Eji ji elabo yaroromelihimi wavaha ana a Abramu, Izaki na Yakobi. Ddihuthiya woona elabo eji, mbwenye kaddinothiye ovolowamo.’
Wenewale omutompini wa Mwango Nebo Moize ohikwa. Iyene wana vyaka 120 dha obaaliwa. Iyene walivi wa guru, nanda mento aye aalivi aderetwene. Athu anokubanya vaddiddi vina anolila sabwani Moize ohikwa. Mbwenye awene anosanzaya sabwa ya okaana Josue ninga musogorheli wawa muswa.
Olebeliwa 27:12-23; Deuteronomo 3:23-29; 31:1-8, 14-23; 32:45-52; 34:1-12.