NIPADDUWO 53
Nlibelo Na Jefte
WAHIROMAGA olibela nanda musogorhomwa orutxa osorihawa? Mulobwana oli va nladdanihoni nthi wahikosaga, nanda ji sabwa ya ejene enkubanyeliye vaddiddi. Mulobwanaya ddi namathonga woliba murima wa Izraeli watxemerhiwa Jefte.
Jefte okalilewo mudhidhi wakoodda Aizraeli omwebedha viina Yehova. Wili awene anokosa ejile eli yabure. Noona Yehova ohithiya nlogo na Amoni wavoreya awene. Eji ehakosiha Aizraeli okuwa wa Yehova: ‘Iyo nihuthegelani nyuwo. Ninowuthiddani myeddo, munivune!’
Athuya anokubanyedha sabwa ya dhilobo dhabure dhikosilani. Awene ahilagiha wila anokubanyedha modheela omwebedhaga wili Yehova. Noona wili Yehova ohakamiha awene.
Nlogo nihimusakula Jefte wila arabe koddo na akudda Amoni abale abure. Jefte onofuna vaddiddi wila Yehova amukamihe mu koddonimwa. Noona iyene ohimulibelela Yehova: ‘Akala nyuwo munoddithiya wapemberha akudda Amoni, muthu woroma onabudduwe vatakulu vaga wila addakelele ddigeyelaga okule opemberhilemi ddinela wuperhekelani nyuwo.’
Yehova ohivuruwana olibela wa Jefte, nanda ohimukamiha opemberha. Jefte mwiyeleliye mmudhi, weyo onomuziwa bani woromaya obudduwile wila amwakelele? Ddi mwana waye wa muyana, oddwene oli mwana waye mmodha bahi. ‘Mmamiyo, mwanaga!’ Jefte onokuwa. ‘Ohidditotela okubanya onddimuwa vaddiddi. Mbwenye ddihilibela wa Yehova, nanda kaddineyihe nlibelo nthi.’
Mwana oddule wa Jefte muziweliye nlibelo naye, voromava iyene vina ohikubanya. Sabwani eji entapulela wila iyene onela omuthiya babi waye vina amarho aye. Mbwenye ovenya veneva iyene onela olabihedha egumi yaye yotene bagamulaba Yehova mu tabernakulu yaye o Silo. Noona iyene ohimpanga babi waye dhahi: ‘Akala nyuwo mwahikosa nlibelo wa Yehova, munofanyeela osoriha nlibelo nthi.’
Dhaene mwana wa Jefte ohidhowa o Silo, nanda ohilabihedha egumi yaye yotene bagamulaba Yehova mu tabernakulu yaye. Masiku manai a kadda yaka ayana a Izraeli andowa omoona iyene wenewale, nanda awene ankaana mudhidhi wosanzaya vamodha. Nlogo nannimukwela mwana wa Jefte sabwani iyene mudhari waderetu wa Yehova.
Anamathonga 10:6-18; 11:1-40.