Iyene Wahimwagalaliha Babi Waye na Yehova

Onomoona mwanamuyanaya vafotoni?— Iyene mwana wa muttu wakuweliwa Jefte. Bibilia kannaddela nzina naye, mbwenye iyo nihiziwa wi iyene wahimwagalaliha babe na Yehova. Ndowe nisunze modheela iyene vina babi waye, Jefte.

Jefte wali mulobwana waderetu nanda wahilabihedha mudhidhi mwinjene amusunzihaga mwanaye mikalelo dha Yehova. Iyene wali mulobwana wa guru vina wali musogorheli waderetu. Mbwenye ana Izrayeli ahimukumbirha iyene wi akale musogorheli mukoddoni na amwiddani awa.

Jefte wamulobelela Mulugu wi amukamihedhe opemberha. Jefte wahilibela wi kopemberha, iyene agahinvaha Yehova muttu woroma agabudduwile vatakulu vaye mudhidhi ogeyelile iyene. Muttu oddo agahikala vina agahilaba mutabernakulu mwa Mulugu mwigumini yaye yotene. Tabernakulu wali musasa wadhowa attu omwebedha Mulugu nsaka nttile. Indde, Jefte wahipemberha koddo! Weyo onomuziwa waromile obudduwa vatakulu vaye mufiyedhiye?—

Indde, mwana Jefte! Iyene wali mwana mmodha bahi, ovano Jefte agahimuttiya odhowa. Ejo yahimuribiha murima vaddiddi. Mbwenye kobuwela, iyene wahikosa nlagano. Momaguva, mwanaye ohiloga: ‘Babani, nyuwo muhilibela wa Yehova, noona munofanyeela wakwaniha ejo.’

Mwana Jefte wahikubanya vina. Mutabernakulu, iyene kagateliwe vina kagaana aima. Mbwenye iyene ohiveda vaddiddi ovirihamo yolibela ya babe vina omwagalaliha Yehova. Eji yali yamakamaka wa iyene opitta oteliwa obe okaana aima. Noona iyene wahittiya numba yaye nanda balabihedha egumi yaye yotene mutabernakulu.

Weyo onubuwela wi ekosile iyene ehimwagalaliha babe na Yehova?— Indde, iyene wahavaha wagalala! Akala weyo onomwiwelela vina onomukwela Yehova, weyo podi okala ninga mwana Jefte. Weyo vina onele wahagalaliha vaddiddi ababi awo vamodha na Yehova.