Paraizu Wa Elabo Ya Vati

Yehova onela oburutxavo kakamwe dhabure dhotene dhikosile Satana. Yehova ohimala omuthoma Yezu ninga Mwene wa elabo yotene ya vati. Mutxiddo mwa olamula waye, elabo ya vati enela okala paraizu.—Danieli 7:13, 14; Lukas 23:43.

Yehova ohiroromeliha dhilobo esi:

• WINJIVA WA DHOJA: “Mathaka txibarene anela ovaha dhobaaladha; Mulugu, Mulugu wehu, onela onireeliha.” “Vanodha okala milima dhinji velaboni ya vati; vadhulu va myango vanela okala winjiva wotepuwa.”—Salmo 67:6; 72:16.

• KUNAKALE VIINA KODDO: “Mudhe, moone mabasa a Yehova, mukalelo onkosiye dhilobo dhotikiniha velaboni ya vati. Onogomiha koddo mpaka okomoni wa elabo ya vati.”—Salmo 46:8, 9.

• KUNAKALE VIINA ATHU ABURE: “Sabwani anamakosa dhabure anela ogwaddiwa . . . Mwari mwa mudhidhi muñgonovi, muthu wabure kanda okalawo viina; nanda onela ofwaseyela mburo waye, nanda iyene kanda okalawo viina.”—Salmo 37:9, 10.

• 

  KUNAKALE VIINA MAREDDA, OKUBANYA, OBE OKWA: “Nsaka nthile mento a aliba ohoona anela okunuwa, vina maru a aliba ohiwa anela ofuguwa. Nsaka nthile muliba otopinya onela olupa ninga muhegu, nanda nlumi na muliba ohiloga ninela okuwa na othaba.”—Izaia 35:5, 6.

  “Nanda Mulugu mwinyene onela okala na awene. Nanda onela okuputha mmentoni mwawa mintori dhotene, kunakale viina okwa, nne vina olila, nne okuwa, nne wiwa opa. Dhilobo dhawale dhihivira.”—Ovuhulela 21:3, 4.

Mothiyana na Satana vamodha na adomonyo, Yehova txipo kanloga othambi. Dhilobo dhotene dhiroromelihile iyene dhinofanyeela okoseya. (Lukas 1:36, 37) Yehova onowukwela nanda onfuna wila weyo okale mParaizu oddule onfuniye omukosa. Noona kaakumbirhe Anamoona a Yehova wila osunze dhilobo dhiina dha ebaribari yotikiniha enfanyeya mu Nzu na Mulugu. Weyo ogathiddihedha mabasa ebaribari mwigumini yawo, onela ofuruleya mu odharini wa othambi, masele, vina ohiziwa elobo. Na mudhidhi, onela ofuruleya vina mu odharini wa yothega vamodha na okwa. Ninga mwalogeli Yezu wila: “Munela oziwa ebaribari, nanda ebari-bari enela wufurulani.”—Joau 8:32.