Relijiau Yebaribari Enela Wukaliha Deretu na Mukalakala!

1. ‘Niganfiyedha Mulugu’ enapadduwe txini?

YEHOVA onowakwela abale animulaba. Ogamwebedhaga Yehova, iyene onela wururya ovanene vina musogorho. Bibilia onloga dhahi: “Kanfiyedheni Mulugu, nanda iyene onela wufiyedhani nyuwo.”—Tiago 4:8.

2. Niwodhe dhavi onfiyedha Mulugu, nanda eji enapakele dhavi malobelo ehu?

² Wila onfiyedhe Mulugu, weyo onofanyeela osunza vina othiddihedha mabasa Nzu naye. Ogalobelaga mowiwanana na efunelo ya Yehova, iyene onela ovuruwana malobelo awo vina onowakula. Murumiwi wa Mukristu Joau ohileba dhahi: “Nthi thi nikuluvelo ninihuna [mwa Mulugu]: nawila, peno elobo gani enimukumbirhihu mowiwanana na efunelo yaye, iyene ononivuruwana. Mowenjedhedha, nigaziwa wila iyene ononivuruwana mowiwanana na esile dhinimukumbirhihu, nihiziwa wila ninela okaana dhilobo esile dhikumbirhihu, vowila nimukumbirhile iyene.”—1 Joau 5:14, 15.

3-7. Niwodhe dhavi ogumela zelu ya Mulugu, nanda zelu eji enwodha onikamiha dhavi?

³ Eji egaalivi, oganfiyedha Mulugu, iyene onela wuvaha zelu ya wakwaniha dhilobo dha egumi dha siku na siku. Bibilia onloga dhahi: “Akala muthu muthuvi mwa nyuwo onojombeliwa zelu, adidele omukumbirha Mulugu.”—Tiago 1:5.

⁴ Zelu ya Mulugu enwodha wukamiha dhavi? Voroma, eji enowodha wukamiha oziwa dhilobo dhinimusilidha Yehova. Jowodheya vina weyo osunza sabwa dhilobo esi dhikalelani dhabure vina ejile enfanyeeliwe okosa wila orabele okosa dhilobo esi. Eziwelo eji enela wubarela ofanyiwa makathamiho menjene anasoosa athu otene. Motagiha, wiwelela malago a Mulugu mwaha wa ofuneya wa okoddela mweddelo onowabarela adhari a Mulugu okaana yari yohifuna, maredda ooraveya mugonihanani na matelo ootuwa osanzaya obe oofudheya.

⁵ Elobo yina enwodha wuvaha zelu ya Mulugu txini? Eji enowodha wukamiha ojavo deretu egumi. Enowodha wukamiha ogana na zelu mu dhilobo dhothiddihedheya, ninga mukalelo wa olabihedha kobiri dhawo. Onela owodha ofanya dhilobo dhopureyamo nanda okoodda esile dhihina thima engoneela.

⁶ Zelu ya Mulugu enowodha wukamiha vina muwandanani mwawo na athu ena. Jowodheya weyo okaana egumi ya murala wosanzaya vaddiddi. Jowodheya weyo okosa omarho woogoneela vina watxibarene na athu ena, jowodheya vina weyo orihiwa masiki na athu abale ahinimulaba Mulugu.

⁷ Mowenjedhedha, zelu ya Mulugu enela woogolela mubuwelo wawo mwaha wa egumi. Eji enela wukamiha opemberha makathamiho na osivuwa mwigumini. Vina, onela okaana mubuwelo wopimeleleya vina waderetu mwaha wa musogorho. Mubuwelo obu waderetu onela wukamihedha okaana dhubuwelo dhaderetu na egumi yaderetu.—Vimarya 14:30; Izaia 48:17.

8. Ogamulabaga Mulugu, txini enakooddiwe wova?

⁸ Ogamulabaga Mulugu webaribari, onela ofuruleya mwa dhowova dhinasoosa abale ahinimulaba. Vowila weyo ohiziwa wila abale akwile kana egumi omasiye, weyo kunawove abale akwile. Sabwa ya okaana nikuluvelo mwa nlibelo na Mulugu na wavenyiha mukwani abale akwile, weyo kunoove okwa. Nanda sabwa ya oziwa wila Mulugu ddi wowodha-wodha, weyo kunoove olowiwa.—Joau 8:32.

Aligani Anela Okaana Elabo ya Vati

9-11. Onakalemo Mparaizu bani, nanda onakoodde okalamo bani?

⁹ Oganfiyedha Mulugu, weyo kunoove musogorho. Ninga moonelihu, Bibilia wahithaga ovuhula makathamiho menjene anoonihu ovanene Velaboni ya vati. Yehova onnipanga wila dhilobo esi soovira; ovanene, Omwene wa Mulugu onela osaddula Elabo eji ya vati ekale paraizu.—Lukas 21:10, 11, 31; 23:43.

¹⁰ Anakalewo mParaizu babale aninfiyedha Yehova vina animulaba bahi. Bibilia onloga dhahi: “Mwari mwa mudhidhi muñgonovi, muthu wabure kanda okalawo vina; nanda onela ofwaseyela mburo waye, nanda iyene kanda okalawo vina. Mbwenye akurumuwi anela okaana elabo ya vati vina anela ojavo na winjiva wa murenddele.”—Salmo 37:10, 11.

¹¹ Abale ankoodda wiwelela malamulo a Mulugu na onyindda anela oyelela egumi yawa na mukalakala. (2 Tesalónika 1:8, 9) Awene kanaakalewo vina. Anela okwa na mukalakala vamodha na Satana na adomonyo aye. (Ovuhulela 20:10, 14) Mbwenye abale anfiyedha omuziwa Yehova vina animulaba anela ohagalala mothabwa Mparaizu Velaboni ya vati.

Musogorho Motikiniha!

12. Bibilia onloga eni mwaha wa musogorho?

¹² Yehova ohakoyela abale animukwela dhilobo dhotikiniha! Koona ejile enloga Nzu naye mwaha wa egumi Mparaizu Velaboni ya vati:

• Winjiva wa dhoja: “Vanodha okala milima vaddiddi [obe, dhoja] velaboni ya vati; vadhulu va myango vanela okala winjiva wotepuwa.”—Salmo 72:16.

• Numba dhaderetu: “Anela omaga numba nanda agonemo.”—Izaia 65:21.

• Mabasa oziva: “Asakuliwi aga anela ojavo mowakwanela mabasa a mada awa. Kanaalabelege yovi.”—Izaia 65:22, 23.

• Kamunakale maredda: “Kavo namakalamo onaloge: ‘Ddili muredda.’”—Izaia 33:24.

• Kamunakale oragala wa maningo: “Nsaka nthile mento a aliba ohona anela okunuwa vina maru a aliba ohiwa anela ofuguwa. Nsaka nthile muliba otopinya onela olupa ninga muhegu nanda nlumi na muliba ohiloga ninela okuwa na othaba.”—Izaia 35:5, 6.

• Kamunakale wiwa opa, nne okubanya, nne okwa: “[Mulugu] onela okuputha mmentoni mwawa mintori dhotene, kunakale vina okwa, ne vina olila, ne okuwa, ne opa. Dhilobo dhawale dhihivira.”—Ovuhulela 21:4.

• Kamunakale koddo: “[Mulugu] onogomiha koddo mpaka okomoni wa elabo ya vati.”—Salmo 46:9.

• Egumi ya mukalakala: “Aligani anela okaana elabo ya vati vina anela okalamo na mukalakala.”—Salmo 37:29.

13. Womariha onwodha osaddula Elabo eji ya vati bikala paraizu bani, nanda sabwa yani?

¹³ Athu txipo kagawodhile okosa dhilobo esi, mbwenye Yehova ohikana ewodhelo ya okosa dhotene esile dhinlogiye wila onela okosa. Kuli elobo enwodha omukathamiha okosa esile dhinfuniye okosa. Bibilia onloga dhahi: “Kuli nzu ninimurutxa Mulugu.”—Lukas 1:37.

14. Mukalelo gani onawodhiwena ofanya dila ya wigumini ya mukalakala?

¹⁴ Modhela Anamona aye, Yehova onowavaha athu a mpaddi wotene mudhidhi wa ‘ovolowa vamusuwoni muñgono’ vina wedda mu dila endowiha wigumini ya mukalakala. Kakala vari va athu oosanzaya anrumeela niwobelo nthi. Kalabihedha relijiau yebaribari nanda kakaana nruryo na Yehova na mukalakala!—Mateus 7:13, 14.