Kapitulu Biili
Nimutamaale Yehova Mulugu Mmodha Webaribari
1. Mulugu mmodha webaribari bani?
BIBILIA onloga wila masiki vakalilaniwo athu enjene anooniwa ninga amilugu, “oliwo Mulugu mmodha bahi, Babi.” (1 Korinto 8:5, 6) “Mulugu [oddu] mmodha” ddi Yehova, Mpaddutxi wa dhilobo dhetedhene. (Olibiha 6:4; Ovuhulela 4:11) Yezu wamwaddana iyene mwalogeliye “Babaga oli Babinyu vina.” (Joau 20:17) Iyene wahimurumeelela Mizé, oddwene wathagile ologa dhahi: “Nabuya bahi ddi Mulugu; kawo mwina onimpitha iyene.” (Olibiha 4:35) Yehova munddimuwa vaddiddi opitha etagano etaganovi yowebedhiwa, ninga amilugu oosemiwa, athu anrhemeziwa ninga amilugu, obe mwiddani waye Satana Ddiabo, “mulugu wa vatapano.” (2 Korinto 4:3, 4) Mothiyana na aba otene, Yehova ddi “Mulugu mmodha webaribari” ninga mwalogeli Yezu.—Joau 17:3.
2. Venevo vansunzihu mwaha wa Mulugu, egumi yehu enfanyeela opakeleya dhavi?
2 Athu ana ntamaalelo abene ansunza mwaha wa mikalelo dhohagalaliha dha Mulugu, vina esile dhinikoseliye na esile dhinfuniye onikosela, anoroma omukwela iyene. Venevo vanunuwa okwela wawa na Yehova, awene anothukuleleya omutamaala iyene. Na mukalelo gani? Mukalelo mmodha bwa wapanga athu ena mwaha wa Mulugu. Roma 10:10 onloga dhahi: “Ole onvuwiha na mulomo waye . . . onovuneya.” Mukalelo mwina bwa omutagiha iyene mwa mazu vina merelo. Éfeso 5:1 onloga dhahi: “Tamelani othukula mweddelo wa Mulugu, vowi mulí anaye anakweliye.” Wila nikose eji na mukalelo wowakwanela, ninofanyeela oziwa mukalelo oli Yehova txibarene.
3. Mikalelo dha makamaka dha Mulugu sivi?
3 Mbibiliani motene, muhikala mazu menjene abene anlagiha mikalelo dhaderetu vaddiddi dha Mulugu. Mikalelo dhaye minai dha makamaka si esi: Oziwa, wakwana, guru, na okwela. “Vano Mulugu ddinziwa.” (Job 12:13) “Mabasa aye bawakwana.” (Olibiha 32:4) “Guru dhaye kadhimpimeya.” (Izaiya 40:26) “Mulugu ddi okwela.” (1 Joau 4:8) Mwa dhaene, mwa mikalelo minai dha makamaka dha Mulugu, mukalelo gani oli munddimuwaya, obwene ontonyihedhetxa ejile eli Mulugu opitha mukalelo mwina?
“Mulugu Ddi Okwela”
4. Mukalelo gani omukosihile Mulugu othandda erimu vamodha na dhilobo dhotene dhinkalawo?
4 Katanaalela ejile yamukosihile Yehova othandda erimu vina dhothanddiwa dha omuyani dha zelu na athu. Wali oziwa waye obe guru dhaye? Nne, sabwani masiki Mulugu valabihedhiye mikalelo esi, kayo esene dhamukosihile othandda dhilobo esi. Nanda wakwana waye kawammageleli wavaha athu ena mvaho wa egumi. Othiya eji, okwela onddimuwa wa Mulugu wahimuthukulela wavaha athu ena ohagalala wa okalawo na zelu. Okwela wahimukosiha Mulugu wimetxa efunelo yaye wila nlogo na athu nowiwelela nikalegewo na mukalakala mParaizu. (Wita 1:28; 2:15) Okwela wahimukosiha osasanyedha marhe a oburutxavo othongeliwa okwa, okwene wakoneliwe nlogo na athu sabwa ya othega wa Adamu.
5. Mowiwanana na Bibilia, Yehova ddi mulagiho wa mukalelo gani, nanda sabwa yani?
5 Dhaene, mwa mikalelo dhotene dha Mulugu, munddimuwaya ku okwela waye. Ji ejene eliye txibarene, obe ekalelo yaye. Masiki oziwa waye, vina wakwana waye, guru yaye vakalilani dha makamaka, Bibilia txipo kanalogege wila Yehova ddi mmodha mwa mikalelo dhene esi. Mbwenye oddu onologa wene yawila iyene ddi okwela. Indde, Yehova ddi mulagiho wa okwela. Oku okwela oneeddihiwa na magano, kuneeddihiwa na mewelo a maningo. Okwela wa Mulugu onlamuleliwa na magano a ebaribari a wakwana. Obu bu mukalelo munddimuwa vaddiddi wa okwela, ninga munlagihedhiwani na Yehova mwinyene. Okwela oku, bu mulagiho wa nzivelo nowakwanela nanda dila dhotene onofarihedhiwa na merelo abene anooniha okwelawa.
6. Txini enniwodhiha omutagiha Mulugu, masiki iyene vakaliliye munddimuwa vaddiddi opitha iyo?
6 Bu mukalelo obu wotikiniha, okwela, onnikamiha omutagiha Mulugu. Ninga athu, oohakwana, anvirigana, txino iyo podi wubuwela wila txipo kaninwodha omutagiha Mulugu na weeddeleya deretu. Mbwenye yotagiha yina ya okwela onddimuwa wa Yehova ji eji: Iyene onoziwa ogomeliwa wehu nanda iyene kannilogosa wakwana. Iyene onoziwa wila ovanene iyo kaninfiyedha wakwana. (Masalmo 51:5) Noona Masalmo 130:3, 4 agalogaga dhahi: “Nabuya, mugalaza dhothega dhehu, on’halavo bani? Mwa nyuwo punfwanyiwa oleveleliwa.” Indde, Yehova ddili “Mulugu wanthebwa wathagaraga, wovilela, wapama-pama.” (Obudduwa 34:6) “Nyuwo Nabuya muli wapama muli wamurima.” (Masalmo 86:5) Jolibiha vaddiddi! Vina joridhiha murima vaddiddi omulaba Mulugu oddu wotikiniha vina okweliwa na iyene vamodha na weeddihiwa na thagaraga yaye!
7. Okwela wa Yehova onooneya dhavi mmabasani aye a dhothanddiwa?
7 Okwela wa Yehova podi vina wooneya mmabasani aye a dhothanddiwa. Katanaalela dhilobo dhinjidhene dhaderetu esene dhivahile Yehova wila nijevo, ninga myango dhokoddela, kokola, mathadda, vina bara. Iyene ohinivaha dhoja na muthengo wothiyana thiyana wotikiniha wila niwe oziva vina dhinikalihewo. Yehova vina ohivaha muthengo mwinjene wothiyana thiyana wa marhuwa ookoddela vina oonukela, ninga vina dhinama dhotikiniha. Iyene ohikosa dhilobo esene dhigaavahile athu ohagalala, masiki vakooddiliye omageleliwa okosa dhilobo dhohagalaliha. Ja ebaribari wila banigakala mwilaboni eji yabure na mukalelo wehu wa ovanene wohakwana, kaninwodha ojavo mowakwanela dhothanddiwa dhaye. (Roma 8:22) Mbwenye ovanene katanaalela ejile enfuna onikosela Yehova mParaizu! Munasalmo ononivaha nikuluvelo nthi: “Nyuwo munotapula nlada nenyu, munowavaha aliwo dhetene [esile] dhinunlelani.”—Masalmo 145:16.
8. Yotagiha ekaliletxe ya okwela wa Yehova na iyo jivi?
8 Yotagiha ekaliletxe ya okwela wa Yehova na nlogo na athu jivi? Bibilia ontapulela dhahi: “Mulugu oakwela athu vaddiddi ofiyedha walevela Nammodha waye, wi animuroromela ahirimele, athidde egumi yohimala.” (Joau 3:16) Yehova wakoseli eji sabwa ya oderetu wa muthu? Roma 5:8 onowakula: “Kristu ovilevela opeliwa iyo, oku banalivi athegi. Eji jinoniha wi Mulugu ononikwela.” Indde, Mulugu wahimuruma velaboni ya vati Mwana waye wowakwana wila aperheke egumi yaye ninga mukutho wa yobolo wila anobole mwa okoneliwa dabi na okwa. (Mateu 20:28) Eji yahifugula dila wila athu animukwela Mulugu agumele egumi ya mukalakala. Oderetuya bwawila, okwela wa Mulugu onowafiyedha otene anfuna okosa efunelo yaye, sabwani Bibilia ononipanga dhahi: “Mulugu kanimuthiyaniha muthu. Iyene onimukwela muthu ddi muthu onimurumela, oneddana enimfuneyena, ahañganaga nlogo mundheye.”—Merelo 10:34, 35.
9. Ninfanyeela opakeleya dhavi na sabwa yawila Yehova ohiniperhekela Mwana waye wila anobolele?
9 Sabwa yawila Yehova ohimperheka Mwana waye wila anobolele, dhaene bagafugula dila ya ogumelana egumi ya mukalakala, eji enfanyeela opakela dhavi mukalelo onlabihedhihu egumi yehu ovanene? Eji enofanyeela wunuwiha okwela wehu onimukaanelihu Mulugu webaribari, Yehova. Mudhidhi wakakene, eji enofanyeela onifuniha onvuruwana Yezu, oddwene onimwimelela Mulugu. “Kristu oakwela etene . . . wi aliwo ahivikalelewo anya, amukalelewo ole wakwele.” (2 Korinto 5:15) Johagalaliha vaddiddi ofara tharho dha Yezu, sabwani iyene wali wotagiheya mwa otagiha okwela wa Yehova vina thagaraga! Eji enolagiheya modheela ejile yaapangile Yezu athu ooviyeviha: “Nyuwo motene mulemile, mukukumuwile mudhe vali miyo, ddinowulibihani. Mpwathele muthorho waga, sunzaní dhinira miyo, ddinna murima wofwasa, wokurumuwa. Dhahene munofwanya osanzaya. Kanga yaga kinwoma, muthorho waga kunlemela.”—Mateu 11:28-30.
Wakwela Athu Ena
10. Mikalelo dhinawodhihuna wakwela Akristu akwihu sivi?
10 Niwodhe dhavi wakwela Akristu akwihu ninga munnikwela Yehova na Yezu? Koona mikalelo dhinji dhinawodhihuna okosa eji: “Onkwela onovilela, onoakoddelela murima athu. Onkwela, kanna nrima, kanpanela, kanvithukulela. Onkwela, onoariha akwaye, kankumbela vaye, kannyanyuwa, kankoya ntxiga. Onkwela, kanziveliwana dhopuja, onothaba na dhebaribari. Onkwela, onoziwa wavunela etene, onoaroromela etene, onovilela dhetene, onokuluvelavi dhosogorho. Okwela kunamale-wene.”—1 Korinto 13:4-8; 1 Joau 3:14-18; 4:7-12.
11. Bani ena anfanyeelihu wakwela, nanda na mukalelo gani?
11 Bani ena anfanyeelihu wakwela, nanda na mukalelo gani? Yezu ologile dhahi: “Dhowani, mwasunzihe athu a malogo otene, akale anamasunza aga; mwabatize na nzina na Baba, na Mwana, na Muya Wokoddela. Mwasunzihe ovirihamo dhetene dhulamulileni miyo.” (Mateu 28:19, 20) Eji enotaganyiheya na walaleya athu abale ahinathi okala Akristu akwihu, bili yaderetu ya elabo eswa ya paraizu ya Mulugu. Yezu wahilagiha mowooneya deretu wila kaninfanyeela wakwela Akristu akwihu bahi, sabwani iyene ologile dhahi: “Nyuwo mugàkwelaga anukwelani bahi, munathuveliwe nni na Mulugu? Avuti vina kanirelana dhapama anyavi? Nyuwo mugàlejela amudhinyuvi, munapitha vavi athu ena? Amalabo kanlejelana vina?”—Mateu 5:46, 47; 24:14; Galásia 6:10.
‘Weedda Mu Nzina Na Yehova’
12. Nzina na Mulugu ninfanyeelela eni othiddihedhiwa mabasa momwaddana iyene bahi?
12 Elobo yina ya makamaka ya omutamaala Mulugu webaribari, ku oziwa nzina naye nimodha bahi Yehova, olabihedhaga, vina wasunzihaga athu ena. Munasalmo wahiloga efunelo eji ya mmirimani mwaye: “Aziwe wi nzina nenyu muli Nabuya [“Yehova,” Tradução do Novo Mundo] ddi nyuwo bahi. Nyuwo bahi muli Namadhulu-dhulu mwilaboni mwetemwene.” (Masalmo 83:19) Nzina nthi Yehova nintapulela wila “Iyene Onotota Okala.” Iyene Munddimuwa oddwene onimetxa dhofuna nanda mudhidhi wotene onosoriha dhofuna esi. Nanda Mulugu mmodha bahi webaribari ddinfanyeela okaana nzina nthi, sabwani athu txipo kana ebaribari yawila esile dhinkosani dhinela weeddeleya deretu. (Tiago 4:13, 14) Ddi Yehova yeka onfanyeela ologa wila nzu naye ‘ninela wakwaniha’ ejile erumeliye. (Izaiya 55:11) Athu enjene anohagalala agoona dila yoroma nzina na Mulugu mBibiliani mwawa vina agasunza ejile entapulelani. (Obudduwa 6:3) Mbwenye awene anapuremo bahi eziwelo eji modheela “weddagavi na Nabuya [Yehova] Mulugu wehu.”—Mikeya 4:5.
13. Txini eli mwari mwa oziwa nzina na Yehova vina weedda mu nzina naye?
13 Mwaha wa nzina na Mulugu, Masalmo 91:14 onloga dhahi: “Ddinomukoya vowi oziwa nzina naga.” Eji enokwaranya okalela oziwavi nzina nthi Yehova, sabwani oziwa nzina nthi kayo omukuluvela iyene. Oziwa nzina na Mulugu ontapulela ononelamo wila Yehova iyene, Mulugu wa mukalelo gani, oriha onddimuwa waye, wiwelela malamulo aye, omukuluvela iyene mwa dhilobo dhotene. (Gano dh’olelana 3:5, 6) Na mukalelo wakakene, weedda mu nzina na Yehova ontapulela oviperheka wa iyene vina omwimelela ninga mmodha mwa anamebedha aye, banigalabihedha txibarene egumi yehu mowiwanana na ofuna wa Mulugu. (Luka 10:27) Weyo onokosa ejene?
14. Wila nimulabe Yehova mpaka mudhidhi wohimala, elobo gani yina enfuneya yohikala sabwa ya omageleliwa?
14 Wila nimulabe Yehova mpaka mudhidhi wohimala, kaninfanyeela omulaba bahi sabwa ya omageleliwa. Murumiwi Paulo, wahimulibiha Timóteo, oddwene wamulaba Yehova mwari mwa vyaka dhinjidhene: “Ovilemelihedhe omukwela Mulugu” [‘Kavisunzihe na oviperheka wa Mulugu ninga yofanya yawo,’ NM]. (1 Timóteo 4:7) Oviperheka onda mmirimani mudhaalile ntamaalelo na muthu oddule oviperhekelihu. ‘Oviperheka wa Mulugu’ onlagiha nrhemezo nddimuwa wa Yehova mwinyene. Oviperheka oku onolagiha ofiyedhana wa okwela na iyene sabwa ya nriho nddimuwa ninimukaanelihu iyene vamodha na dila dhaye. Eji enonikosiha ofuna wila athu otene arihege vaddiddi nzina naye. Ninofanyeela wunuwiha oviperheka wa Mulugu mwigumini yehu, nigafuna weedda mu nzina na Yehova, Mulugu mmodha bahi webaribari, na mukalakala.—Masalmo 37:4; 2 Pedro 3:11.
15. Niwodhe dhavi omukosela Mulugu webedha wohigaweya?
15 Wila nimulabe Mulugu na mukalelo worumeeleya, ninofanyeela omwebedha iyene bahi vowila iyene ddi ‘Mulugu ohinwodha omvilela ontamela ovurhana na miyo.’ (Obudduwa 20:5) Iyo kaninwodha omukwela Mulugu nanda mudhidhi wakakene okwelaga elabo eji yabure, ejene ena muluguya Satana. (Tiago 4:4; 1 Joau 2:15-17) Yehova onoziwa txibarene mukalelo ontamela kadda muthu wa iyo okala. (Jeremiya 17:10) Akala iyo ninokwela txibarene dhilobo dholigana, iyene onowoona ejene, vina onela onikamiha wakwaniha dhoweha dhehu dha siku na siku. Modheela onikamiha na muya waye wokoddela obwene ona ewodhelo, iyene onela oniwodhiha opemberha obure obwene wakwaneliwetxe mwilaboni mpu. (2 Korinto 4:7) Iyene vina onela onikamiha othiddeelavi njeedhelo nehu noliba na egumi ya mukalakala mparaizu velaboni ya vati. Nthi njeedhelo noñganimela vaddiddi! Ninofanyeela otamaalela vaddiddivene ejene, vina omulabaga Yehova Mulugu webaribari na oviperheka, oddwene onwodhiha ejene.
16. Weyo onfanyeela ofuna okosa eni vamodha na athu ena matxikwi na matxikwi?
16 Athu matxikwi na matxikwi ozugunuwa elabo yotene ya vati ahirumeela na ohagalala niwobelo na munasalmo oddwene olebile dhahi: “Ndhoweni nimutamale Nabuya, nivuwihe vamodha nzina naye.” (Masalmo 34:4) Yehova onowuwobelela okala mwari mwa muthithi obwene onunuwa mmalogoni otene abene animutamala Yehova.
Osakulela
• Yehova, iyene muthu wa mukalelo gani? Nimpuramo dhavi sabwa ya ononelamo deretu mikalelo dhaye dhaderetu vaddiddi?
• Niwodhe dhavi wakamiha athu ena osunza ebaribari mwaha wa Mulugu?
• Txini eli mwari mwa oziwa nzina na Yehova vina weeddaga mu nzina naye?
[Mafoto vanikukuni 14]
Sabwa ya, okwela waye onddimuwa, Yehova ‘onela otapula nlada naye, bavaha aliwo dhetedhene dhinunlelani’