Kulalihe Okwela Wawo
“Obure onere othabwa mpaka olaliha okwela wa athu enjene.”—MATEU 24:12.
1, 2. (a) Mazu a Yezu va Mateu 24:12 anapatta makamaka ani? (b) Nivuru na Merelo a arumiwi ninlagiha dhavi wila Akristu oroma anlibiha okwela wawa? (Koona foto eli omaromo.)
YEZU valiye velaboni ya vati, wahittaga ologa egakamihedhi attu ozinddiyela wi nili masaka a “ogoma wa elabo.” Mwa dhilobo dhattagiliye, wahiloga wi: “Obure onere othabwa mpaka olaliha okwela wa athu enjene.” (Mateu 24:3, 12) Vyaka zana dhoroma Ayuda annivira nlogo na Mulugu, oku okwela wawa wahobana.
2 Eji egalivi, Akristu eena ahikaana moonelo wottiyana. Awene andowa “olaleya muthaka onthabiha wowi Yezu ddi Muthikitheliwi” vina annimukwela Mulugu, abali awa vina abale ahaziwa ebaribari. Mwa Akristu aba, omukwela wawa Mulugu wali wolibene. (Merelo 2:44-47; 5:42) Yokubanyiha jawi wahikala Akristu attiyile okwela wawa wobana. Koddi ninziwa dhavi esodha?
3. Txini yobanihile okwela wa Akristu akala mu Éfeso?
3 Vamaromo Yezu wahawaddela Akristu akala o Éfeso eraga: “Ddabuno kunna ekalelo y’okwela ninga mwawale.” (Ovuhulela 2:4) Txino Akristu a Éfeso, ela okwekwettiwa n’attu awaddamele makamaka abale afunetxa dh’ovittittimiha. (Éfeso 2:2, 3) Attu akala mu Éfeso azuzumela dhorela opitta dhilobo dhina. Enjiya anjiwa murima na mararuwo opitta wiwelela malamulo a Mulugu. Anziveliwa ozuzumela mavego opitta omukwela Yehova vina abali awa.
4. (a) Okwela wehu masaka abano onobana dhavi? (b) Dhipaddi gani ttaru dhinfenyeelihu olibihamo okwela wehu?
4 Mazu a Yezu aloga wila okwela ogahilala, anowooneya ovanene. Attu enjene ovanene ahobanela omukwela wawa Mulugu. Ottiya omukuluvela Mulugu onwodha ogomiha makattamiho abo, attuyá anakuluvela alamuleli a elabo. Sabwa ya ejuwene okwela wawa onottabwavi olala. Ninga mpadduwilani mu Éfeso, okwela wa emeleli enjene a Yehova onolala. Ndowe noone dhipaddi ttaru dhinfanyeelihu olibihamo okwela wehu: (1) omukwela Yehova, (2) okwela ebaribari ya Bibilia vina (3) wakwela abali ehu.
OMUKWELA YEHOVA
5. Ninimukwelela eni Yehova?
5 Bani onamukwele iyo? Yezu ologa: “‘Omukwele Nabuya, Mulugu wawo, na murima wawo wotene, na guru dhawo dhotene, na zelu dhawo dhotene.’ Nthi thi [nlamulo] ninddimuwaná, thoroma.” (Mateu 22:37, 38) Omukwela wehu Mulugu ononikamihedha wiwelela malago aye, ovilela vina orabela okosa dhilobo dhabure. (Kengesa Masalmo 97:10.) Mbwenye Satana na elabo yaye onfuna obanihe vina agomihe omukwela wehu Mulugu.
6. Txini enapadduwela abale anttiya omukwela Yehova?
6 Monelo wa elabo sabwa ya okwela kwabure vaddiddi. Ottiya omukwela Mulugu, attu enjene “anamakumbela vawa.” (2 Timóteo 3:2) Awene anzuzumela “monlelo abure a mwili, ojiwa murima na dhetene dhinona mento, ovithukulelana muhaku.” (1 Joau 2:16) Murumiwi Paulo ologa empadduwa nigaroma ovittukulela nanya. Iyene bela: “Ofwara dhinfuna mwili, ongomelana wukwani.” Sabwaya jani? Sabwani abale anzuzumela esuwene anokala amwiddani a Mulugu. (Roma 8:6, 7) Attu anzuzumela kobiri, obe mararuwo, omamalelowa anonyimuwa.—1 Korinto 6:18; 1 Timóteo 6:9, 10.
7. Merelo gani awopiya anapatta akristu nsaka nttino?
7 Attu ampambiha wi Mulugu okalawo vina abale anila dhilobo dhipadduwile woka anowarumeeliha attu wila Mulugu kawo. Awene anologa wila oli zimorha ddinrumeela wi okalawo Muttanddi. Ottiya eji, attu enjene anowariha aziwetxi ottiya omuttittimiha Muttanddi. (Roma 1:25) Dhubuwelo ninga esi dhinowapatta Akristu. Dhinowobaniha mandano awa na Mulugu vina dhinolaliha omukwelawá.—Ahebreu 3:12.
8. (a) Makattamiho gani anobaniha nlogo na Yehova ovanene? (b) Nipangarhazo nili va Masalmo 136 ninilibiha dhavi?
8 Vowi ninkala mwilaboni enlamuleliwa na Satana, dhihikalawo dhilobo dhinjene dhinnobaniha. (1 Joau 5:19) Mbwenye nigavittiya onyimuwa vaddiddi, nroromelo nehu ninele wobana vina omukwela wehu Mulugu onolala. Txino sabwa ya wuluvala ninogumanana dhiredda gwé obe oyelega. Ninonyimuwa sabwa y’ohiwodha okosa mabasa akosa iyo wale. Akala dhilobo dhina kadhineedda deretu ninga mwajedhelihu, ejo enonunda guru. Makattamiho enjive-muninjivelani, kanidduwale wila Yehova oli vakuvi vehu. Kobuwela mazu aba olibiha vina opangarhaza ali va Masalmo 136:23: “Wannubuwela vapidiwa iyo segedho: onikwela waye kwa mukala-kala.” Nikaane ebaribari yawi Yehova onele ovuruwana ‘okumbirha wehu nikamihedho’ vina onele onakula.—Masalmo 116:1; 136:24-26.
9. Txini yampangarhaza Paulo ofiyedha olibiha omarho waye na Mulugu?
9 Murumiwi Paulo wanubuwela kakamwe nikamihedho nakela iyene wa Yehova, nanda ejo yannimulibiha. Iyene oleba: “Nabuya ddinddikoya, kaddinova elo. Txini enawodhe athu oddírana?” (Ahebreu 13:6) Paulo wankuluvela nikamihedho na Yehova wila awodhe okwaranya dhamukattamiha mwigumini mwaye. Masiki vafwanyiwiye makattamiho orutxa, iyene txipo kattiyile omukuluvela Yehova. Valiye mukambura, wahalebela karta Akristu akwaye wila aalibihe mmilogoni mwalani. (Éfeso 4:1; Filipi 1:7; Filémoni 1) Makattamiho enjive-venjivelani, iyene wanlibihavi omukwela waye Yehova. Wannimuroromela “Babi onneddela thagaraga, Babi onnipangarhaza mudhidhi wotene.” (2 Korinto 1:3, 4) Ninawodhe dhavi omutagiha Paulo?
Kalagiha wila onomukwela Mulugu (Koona ddima 10)
10. Ninawodhe dhavi olibiha omukwela wehu Yehova?
10 Paulo wahiloga elobo modha yokosa, wila omukwela wehu Mulugu okale wolibene, eraga: “Lobelagani muhilemágana.” Nomala wahenjedhedha dhahi: “Didelaní mulobelani.” (1 Tesalónika 5:17; Roma 12:12) Olobela onnikamihedha dhavi onfiyedha Mulugu? Nalobelaga ninloga na Yehova. Okosa ejuwene enonikamihedha okaana mandano oliba na iyene. (Masalmo 86:3) Nigamwaddelaga Babi wehu wodhulu dhetene dhinnikattamiha, ejo enolibiha onfiyedha wehu. (Masalmo 65:2) Omukwela wehu ogaliba ninele woona wila onowakula malobelo ankosihu. Nikaane ebaribari yawi “Nabuya onoawaddamela etene animwithana.” (Masalmo 145:18) Ororomela vina okuluvela wehu nipangarhazo na Yehova, ononikamihedha okwaranya makattamiho ankaanihu ovanene vina anda musogorho.
OKWELA EBARIBARI YA BIBILIA
11, 12. Ninawodhe dhavi wunuwiha okwela wehu ebaribari ya Bibilia?
11 Akristu ali otene anokwela ebaribari. Ebaribariya enfwanyeya Mmazuni a Mulugu. Yezu wahiloga dhahi na Babe: “Nzu nenyu tha ebaribari.” (Joau 17:17) Wila nikwele ebaribari ya Bibilia japama oziwa ejile eli mBibilianimwa. (Kolosi 1:10) Mbwenye vakala elobo yina. Kobuwela elogile namaleba wa Masalmo 119 ennikamihedha ononelamo ejile enfuniwana iyo wila nikose. (Kengesa Masalmo 119:97-100.) Japama otanaalela esile dhinengesihu mBibiliani malabo otene. Otanaalela dhopurelamo dha ottiddihedha mabasa ebaribari ya Bibilia, onele onikukusela okwela ebaribariyá.
12 Munasalmo ologa dhahi: “Ozivela gani mwano mwaga mazu enyu, dhinothapirha opitha wiyi!” (Masalmo 119:103) Manivuru andela mBibiliani ansasanyiwa na nikuru na Yehova ali ninga yoja yoziva. Nigaja yoja yoziva, ninokosa mudhidhi mwinjene nilandaga mada. Moligana, nisakule mudhidhi wila nisunze mazuya. Nigakosa dhawene, ninele woona wila ‘mazu oziva a ebaribari’ a esile dhinengesihu, anele onikukusela wakamihedha attu eena.
13. Txini emukamihedhile Jeremiya okwela mazu a Mulugu? Ejoya ennipatta dhavi?
13 Namavuhulela Jeremiya wankwela ebaribari ya Mazu a Mulugu. Iyene ologa: “Miyo ddinomedha mazu vanloginyu; mazuyá anoddizivela, anothabiha murimaga, vowi ddili wenyu nyuwo Nabuya mwinya wa elabo yotene.” (Jeremiya 15:16) Jeremiya wantanaalela mowakwana mazu a Mulugu vina wankwela-wene. Iyene wantamaalela okala mwimeleli wa Yehova vina olaleya muttaka waye. Nigakaana okwela wa ebaribari ya Bibilia, ninele woona wila gari enna iyo y’okala Anamoona a Yehova vina olaleya Omwene waye masaka abano omariha, elobo yapama.
Kalagiha wila onokwela ebaribari ya Bibilia (Koona ddima 14)
14. Txini enakosihu wila nunuwihe okwela wehu ebaribari ya Bibilia?
14 Ekalawo elobo yina enanikamihedhe wunuwiha okwela wehu ebaribari? Odhowa omatugumanoni wehu, wenewo onsunzihu dila dha Yehova. Nsunzo ninkosiwa sumana dhetene nilabihedhiwaga revista Mwang’aneli bu mukalelo mwina onlagiha osunzihiwa na Yehova. Wila nipurelemo mowakwana nsunzo ntto, ovisasanyedha kwamakamaka. Ninga motagiha woona malebo etene alebiwe mmutomani onfuna osunziwa. Ovanene attu enjene anowodha wengesa revista Mwang’aneli mwipanoni mwawa y’ovavihana mazu, sabwa nttina nikalawo na dhilogelo dhinjene mu jw.org, vina mu JW Library. Manivuru ali mu dhipanoni eso anokamihedha ofwanya maleboya alogiwe momaguva. Mbwenye yapama ja osakula mutoma mmodha wila nisunze vina nipepese mowakwana maleboya alimo, nigakosa ejuwene okwela wehu ebaribari onele wunuwa.—Kengesa Masalmo 1:2.
WAKWELA ABALI EHU
15, 16. (a) Mowiwanana na Joau 13:34, 35 nikokomezo gani ninivahile Yezu? (b) Omukwela wehu Mulugu na Bibilia oniwanana dhavi na wakwela abali ehu?
15 Omattiyu waye womariha velaboni ya vati, Yezu wahiloga na arumiwi aye: “Ddinouvahani nlamulo niswa: Mukwelanege. N’ekalelo yukwelilenina miyo, nyuwo vina mukwelanege. Mugakwelanaga, athu etene anoziwa wi—muli anamasunza aga.”—Joau 13:34, 35.
16 Wakwela abali ehu oniwanana na omukwela wehu Yehova. Akala kannimukwela Mulugu, kaninawodhe wakwela abali ehu. Yakakene enopadduwa, akala kannakwela abali ehu kaninawodhe omukwela Mulugu. Murumiwi Joau oleba: “Txibarene ohinimukwela mukwaye onimoniye, kanwodha omukwela Mulugu ohinimoniye.” (1 Joau 4:20) Omukwela wehu Yehova vina abali, onowiwanana na okwela ebaribari ya Bibilia. Sabwa yani? Sabwani akala ninokwela esile dhinengesihu mBibiliani, ninele ovirihamo malamulo anfwanyihu ananittukulele omukwela Mulugu vina abali ehu.—1 Pedro 1:22; 1 Joau 4:21.
Kalagiha wila onowakwela abali na arogora (Koona ddima 17)
17. Ninalagihe dhavi okwela?
17 Kengesa 1 Tesalónika 4:9, 10. Ninalagihe dhavi wila ninowakwela abali a mmulogoni mwehu? Abali obe arogora owunuwelavo anofuna nikamihedho na ovira vani-vawa nadhowaga omatugumanoni. Murogora wa mamukwela txino podi ofuna nikamihedho wila esasanyedhiwe numba yaye. (Tiago 1:27) Abale akumuwile, oobanile obe ondeyile guru sabwa ya makattamiho anofuna nikamihedho vina nipangarhazo nehu. (Gano 12:25; Kolosi 4:11) Japama olagiha wila ninowakwela ‘animulaba Mulugu na iyo’ modhela wawirela oderetu.—Galásia 6:10.
18. Txini enanikamihedhe ogomiha magudulano na abali ehu?
18 Bibilia onloga wila “masaka omariha” a elabo ejino yotabala, attu enjene agaali anamakumbela vawa vina anamajiwa murima na kobiri. (2 Timóteo 3:1, 2) Ninga Akristu, nidhowenavi vasogorho omukwela wehu Yehova, nzu naye vina wakwela abali ehu. Sabwa y’okala attegi, dila dhina ninokaanaga magudulano na abaliya. Noona sabwa ya okwelana, ninele ogomiha makattamihoya n’ohagalala vina momaguva. (Éfeso 4:32; Kolosi 3:14) Noona kanittiye okwela wehu olala! Ndowenavi vasogorho omukwela wehu Yehova, Nzu naye vina abali ehu.