Obatizo Na Wandana Wawo Na Mulugu

1. Seundda dhahi munddimuwa wa Etiopia wakumbirheli eni obatiziwa?

‘MOONE! Manje; txini enddikooddiha obatiziwa?’ Wakosile nivuzo ntti ddi seundda munddimuwa wa Etiopia mu vyaka zana dhoroma. Mukristu watxemerhiwa Filipi wela omulagiha yawila Yezu wali Mesiya oddule waroromelihiwe. Sabwa ya otikina vaddiddi esile dhasunziliye mMaleboni, mukudda Etiopia oddule wahikosa elobo. Iyene wahilagiha yawila wanfuna obatiziwa!​—Merelo 8:26-36.

2. Onfanyeelela eni otanaalela deretu mwaha wa obatiziwa?

² Akala weyo ohimala osunza na ofwaseya makapitulu avirile a nivuru ntti na Munamoona wa Yehova, txino weyo onovivuza dhahi: ‘Txini enddikooddiha obatiziwa?’ Mpaka veneva weyo ohimala osunza mwaha wa yororomeliha ya Bibilia ya egumi ya mukalakala Mparaizu. (Luka 23:43; Ovuhulela 21:3, 4) Vina weyo ohimala osunza mwaha wa mukalelo wa txibarene wa abale akwile vina mwaha wa njeedhelo na ovenya mu okwani. (Kohelét 9:5; Joau 5:28, 29) Txino weyo onotugumana na Anamoona a Yehova mmatugumanoni awa a mulogo vina onowoonaga wamwinya mukalelo onttiddihedhani mabasa relijiau ya ebaribari. (Joau 13:35) Ya makamakaya jawila txino weyo ohiroma wandana na Yehova Mulugu.

3. (a) Nlamulo gani navahile Yezu anamafara aye? (b) Obatiziwa mmanjeni onkosiwa dhavi?

³ Olagihe dhavi yawila weyo onofuna omulaba Mulugu? Yezu wahapanga anamafara aye: ‘Kadhowani, mwakose anamasunza attu a dhilabo dhotene, mwabatizege.’ (Mateu 28:19) Yezu mwinyene wahimetxa yotagiha modheela obatiziwa mmanjeni. Iyene kaawazeliwe manje, vina kaakuttuleliwe manje mang’onovi vamusorho vaye. (Mateu 3:16) Nzu ntti ‘obatizo’ ninda mu nzu na Egrego nintapulela “obwiniha.” Mwa dhahene, obatizo wa Okristu ontapulela obwinihiwa wene kakamwe mmanjeni obe orhowa.

4. Obatiziwa mmanjeni ontonyihedha eni?

⁴ Obatiziwa mmanjeni ntti nigano wa attu otene anfuna wandana na Yehova Mulugu. Obatiziwa vamentoni va anamwinji ontonyihedha wila weyo onofuna omulaba Mulugu. Eji enlagiha wila onoziveliwa okosa efunelo ya Yehova. (Masalmo 40:7, 8) Wila obatiziwe, txibarene ohikala ttarho dhinfanyeeliwe ottukula.

ENOFUNEYA EZIWELO VINA NROROMELO

5. (a) Jivi ttarho yoroma wila obatiziwe? (b) Matugumano a mulogo akaleli eni oofuneya?

⁵ Weyo ohimala ottukula ttarho yoroma. Na mukalelo gani? Modheela omuziwa Yehova Mulugu vina Yezu Kristu, vina txino modheela nsunzo nofwaseyela na Bibilia. (Kengesa Joau 17:3.) Mbwenye ohikala dhilobo dhiina dhinjidhene dhinfanyeeliwe osunza. Akristu anofuna ‘okaana vaddiddi eziwelo yonyaala ya efunelo ya [Mulugu].’ (Kolosi 1:9) Otugumana omatugumanoni a mulogo a Anamoona a Yehova onowukamiha vaddiddi okaana eziwelo eji. Jofuneya odhowaga omatugumanoni aba. (Ahebreu 10:24, 25) Otugumanaga wili-wili onela wukamiha wunuwiha omuziwa Mulugu.

6. Wila obatiziwe, muttengo gani wa eziwelo ya Bibilia onfanyeeliwe okaana?

⁶ Txibarene wila weyo obatiziwe, kili yofuneya oziwa dhilobo dhotene dha mBibiliani. Seundda munddimuwa wa Etiopia wahikaana muna eziwelo, mbwenye iyene wafuna nikamihedho wila anonelemo dhipaddi dhiina dha Malebo. (Merelo 8:30, 31) Na mukalelo wakakene, ohikala dhilobo dhinji dhinfanyeeliwe osunza. Txibarene, weyo txipo kunamaale osunza mwaha wa Mulugu. (Kohelét 3:11) Ohinatti obatiziwa, weyo onofanyeela oziwa, vina onofanyeela orumeela ngafuna masunziho a makamaka a Bibilia. (Ahebreu 5:12) Masunziho aba anotaganyiheya na ebaribari mwaha wa mukalelo wa abale akwile vina ofuneya wa oziwa na orumeela nzina na Mulugu na Omwene waye.

7. Omusunza Bibilia enofanyeela wukosiha eni?

⁷ Eziwelovi bahi kinakwana, sabwani, ‘s’ohikaana nroromelo kinwodheya omuhagalaliha Mulugu deretu.’ (Ahebreu 11:6) Bibilia ononipanga wila nsaka na wale, attu dhahi a mu sidadi ya Korinto mwewelani muselu walaleyiwe na anamafara a Kristu ‘aahiroma ororomela vina obatiziwa.’ (Merelo 18:8) Na mukalelo wakakene, nsunzo na Bibilia ninofanyeela wukaaniha nroromelo vaddiddi yawila ntti tti Nzu nivudheeleliwe na Mulugu. Nsunzo na Bibilia ninofanyeela wukamiha okaana nroromelo mwa dholibela dha Mulugu vina mwa ewodhelo yaye ya ovuna modheela mukutto wa Yezu.​—Josuwé 23:14; Merelo 4:12; 2 Timóteo 3:16, 17.

KAAPANGEGE ATTU EENA EBARIBARI YA BIBILIA

8. Txini enolibihedhe wapangaga attu eena esile dhisunziliwe?

⁸ Nroromelo nigonuwaga mmirimani mwawo, weyo onela woona wila kinwodheya omaalana esile dhisunziliwe. (Jeremiya 20:9) Weyo onela olibiheya vaddiddi wila wapangege attu eena mwaha wa Mulugu na dhifunelo dhaye.​—Kengesa 2 Korinto 4:13.

9, 10. (a) Weyo onfanyeela oroma wapanga ani ebaribari ya Bibilia? (b) Txini enfanyeeliwe okosa akala onofuna okamihedha mabasa a Anamoona a Yehova a olaleya numba na numba?

⁹ Weyo poddi oroma wapanga attu eena ebaribari ya Bibilia modheela ologaga esene na oyesa na amudhi awo, na amarho awo, na amwaddamani awo vina na akwawo a omabasani. Na mudhidhi, weyo onela ofuna okamihedha mabasa a olaleya a Anamoona a Yehova. Mudhidhi obo ogafiya, kakala wotapuwa wila ologe na Munamoona oddwene onimusunza Bibilia na weyo. Akala oddule onimusunza Bibilia na weyo onowoona wila weyo onofanyeela olaleya, enela osasanyedhiwa wila weyo vamodha na namasunziha wawo mugumane na anddimuwa eeli a mmulogoni.

¹⁰ Eji enela owodhiha weyo oziwiwa deretu na anddimuwa eena a mulogo wa Okristu, abene ankumbuza nikuru na Mulugu. (Merelo 20:28; 1 Pedro 5:2, 3) Akala anddimuwa aba a mmulogoni anowoona wila weyo onononelamo vina onorumeela masunziho a makamaka a Bibilia, vina yawila onokalawo mowiwanana na magano a Mulugu, vina yawila onofuna wene txibarene okala Munamoona wa Yehova, awene anela wuziwiha yawila weyo onofanyeela olaleya numba na numba ninga namalaleya wa bili yaderetu ohinatti obatiziwa.

11. Masadduwo gani anfanyeela okosa attu eena ahinatti oroma olaleya numba na numba?

¹¹ Anddimuwa aba a mmulogoni txino poddi woona wila weyo onofanyeela okosa masadduwo mang’onovi mmukaleloni mwawo mwa egumi, vina yawila onofanyeela osaddula meeddelo awo wila olaleyege numba na numba. Txino masadduwo aba poddi otaganyiheya na onyanyala merelo abene akooddiliwe wapanga attu eena. Dhahene, ohinatti okumbirha wila okale namalaleya ohinatti obatiziwa, onofanyeela onyanyala dhottega dhinddimuwa, dhokala ninga oraruwa, olezela vina oja dhilobo dhinnonga maningo vina mubuwelo.​—Kengesa 1 Korinto 6:9, 10; Galásia 5:19-21.

ENOFUNEYA OTXINUWA VINA OSADDUWA

12. Otxinuwa onfuneyela eni?

¹² Onofanyeela ottukula ttarho dhiina ohinatti obatiziwa. Murumiwi Pedro walogile dhahi: ‘Katxinuwani vina kazugunuwani, wila dabi dhenyu dhifudhiwe.’ (Merelo 3:19) Otxinuwa ku okubanya na murima wotene mwaha wa elobo ekosile weyo. Akala muttu wahikaana mweddelo wonyakuwa iyene onofanyeela otxinuwa, mbwenye otxinuwa onofuneya vina masiki akala muttuya wahikaana mweddelo waderetu vang’onovi. Sabwa yani? Sabwani attu otene attegi vina anofuna nlevelelo na Mulugu. (Roma 3:23; 5:12) Weyo ohinatti omusunza Bibilia, weyo kuwaziwa efunelo ya Mulugu. Noona ogawodhile dhavi okalagawo mowiwanana kakamwe na efunelo yaye? Sabwa ya ejene, otxinuwa onofuneya.

13. Osadduwa txini?

¹³ Otxinuwa onofanyeela ofarihedhiwa na osadduwa, obe ‘ozugunuwa.’ Kukalele okubanyavi. Weyo onofanyeela onyanyala mukalelo wawo wa wale wa okalawo nanda ogane kakamwe yawila oromana ovanene mpaka osogorho, onelege okosa ejile eli yaderetu. Otxinuwa na osadduwa, esi ttarho dhinfanyeeliwe ottukula ohinatti obatiziwa.

MUKALELO WA OVIPERHEKA

14. Ttarho gani ya makamaka enfanyeeliwe ottukula ohinatti obatiziwa?

¹⁴ Ohikala ttarho yina ya makamaka enfanyeeliwe ottukula ohinatti obatiziwa. Onofanyeela oviperheka wa Yehova Mulugu.

15, 16. Oviperheka wa Mulugu ontapulela eni, nanda txini enimukosiha muttu okosa ejene?

¹⁵ Oviperheka wa Yehova Mulugu na nlobelo na mwari-mwari, ku olibela wila onelege omwebedha iyene yeka na mukalakala. (Olibiha 6:15) Muttu agafuneli eni okosa ejene? Wila niladdanihe: Mulobwana ohiroma omweeddelela muyana. Venevo vanimuziwiye vaddiddi, vina vanooniye yawila muyanaya ohikaana makalelo aderetu vaddiddi, pa venevo vaninfunitxiye. Na mudhidhi, jojeedhela yawila mulobwana oddule onela omutela. Txibarene otela onela omukaaniha mabasa menjene. Mbwenye okwela onela omukosiha mulobwana ottukula ttarho eji ya makamaka.

¹⁶ Weyo ogamuziwa vina ogamukwela Yehova, onela ofuna omulaba iyene mowakwanela vina omwebedhaga iyene kakamwe. Muttu muttuvi onfuna onfara Mwana Mulugu, Yezu Kristu, onofanyeela ‘ovikoodda mwinya.’ (Marko 8:34) Ninivikoodda nanya modheela okoodda ottiya wila dhifunelo dhehu vina esile dhinfunihu ofanya dhihinikattamihe omwiwelela Mulugu mowakwanela. Ohinatti obatiziwa, okosa efunelo ya Yehova Mulugu enofanyeela okala efunelo yawo ya makamaka mwigumini yawo.​—Kengesa 1 Pedro 4:2.

MUKALELO WA OGONJIHA WOVA OVONYA

17. Attu eena ankooddela eni oviperheka wa Mulugu?

¹⁷ Attu eena anorabela oviperheka wa Yehova sabwani anowova vang’ono ottukula ttarho eji ehinvegiwana. Txino awene anowova wakula vamentoni va Mulugu ninga Akristu ooviperheka. Sabwa ya wova wila txino anela ovonya nanda bamusilidhiha Yehova, awene anoona ninga okoodda oviperheka wa iyene ohikala deretu.

18. Txini enottukulele oviperheka wa Yehova?

¹⁸ Venevo vansunziwe omukwela Yehova, onela ofuna oviperheka wa iyene vina okosa mpaka apale vanwodhiwe wila okalegewo mowiwanana na oviperheka oku. (Kohelét 5:4) Ogamala oviperheka, txibarene weyo onela ofuna ‘weeddaga na mukalelo wofanyeelela vamentoni va Yehova mwiraga dhetene dhinimuzivela.’ (Kolosi 1:10) Sabwa ya weyo omukwela Mulugu, weyo kunobuwele wila okosa efunelo yaye enorutxa. Mohaganyedha weyo onorumeela na murumiwi Joau, oddwene olebile dhahi: ‘Omukwela Mulugu ontapulela eji: niwelele malamulo aye; mwa dhahene, malamulo aye kanlémela.’​—1 Joau 5:3.

19. Sabwa yani weyo kunfanyeela wova oviperheka wa Mulugu?

¹⁹ Wila oviperheke wa Mulugu kili yofuneya weyo okala muttu wowakwana. Yehova onoziwa ogomeliwa wawo nanda iyene txipo kanjeedhela wila weyo onela okosa ejile ehinwodhiwe okosa. (Masalmo 103:14) Iyene onfuna wila weyo weeddeleye deretu. Dhahene iyene onela wulibiha vina onela wukamiha. (Kengesa Izaiya 41:10.) Kakaana ebaribari yawila, akala onomukuluvela Yehova na murima wawo wotene, ‘iyene onela onyaaliha meeddelo awo.’​—Gano 3:5, 6.

KALAGIHA OVIPERHEKA WAWO MODHEELA OBATIZIWA

20. Sabwa yani oviperheka wa Yehova kayo elobo envitiwa?

²⁰ Otanaalela dhilobo dhimalilihu woona poddi wukamiha oviperheka wa Yehova na nlobelo. Muttu wotene onimukwela Mulugu txibarene, anofanyeela vina ‘ologa vamentoni va anamwinji mwaha wa ovuniwa.’ (Roma 10:10) Weyo onkosa dhavi ejene?

21, 22. ‘Ologe [dhavi nroromelo nawo] vamentoni va anamwinji’?

²¹ Kamuziwihe musogorheli wa anddimuwa a mulogo wawo yawila weyo onofuna obatiziwa. Iyene onela osasanyedha wila anddimuwa eeli a mmulogoni akose na weyo mavuzo abene angumanyedha masunziho a makamaka a Bibilia. Akala anddimuwa aba a mmulogoni anorumeela wila weyo onofanyeela obatiziwa, awene anela wupanga wila weyo poddi obatiziwa musogorho.a Mmidhidhini dha obatizo enokosiwaga diskursu ejene enloga mwaha wa mutapulelo wa obatizo. Agamala mulogiya onowawobela otene abale anfuna obatiziwa wila aakule mavuzo meeli ahinrutxa ninga mukalelo wa ‘ologa [nroromelo nawa] vamentoni va anamwinji.’

²² Ku obatizo okwene onuzinddiyeliha vamentoni va anamwinji ninga muttu oddwene omalile oviperheka wa Mulugu nanda yawila ovanene oli Munamoona wa Yehova. Abale ambatiziwa anobwinihiwa kakamwe mmanjeni wila alagihe vamentoni va anamwinji yawila awene ahimala oviperheka wa Yehova.

OBATIZO WAWO ONTAPULELA ENI?

23. Obatiziwa ‘mu nzina na Baba, vina na Mwana, vina na muya wokoddela’ ontapulela eni?

²³ Yezu wahiloga wila anamasunza aye agahibatiziwa ‘mu nzina na Baba, vina na Mwana, vina na muya wokoddela.’ (Mateu 28:19) Eji entapulela wila oddule onfuna obatiziwa onorumeela onddimuwa wa Yehova Mulugu vina wa Yezu Kristu. (Masalmo 83:18; Mateu 28:18) Iyene vina onorumeela nibasa vina olaba wa muya wokoddela, obe guru yolaba ya Mulugu.​—Galásia 5:22, 23; 2 Pedro 1:21.

24, 25. (a) Obatizo ontapulela eni? (b) Nivuzo gani ninfuna wakuliwa?

²⁴ Mwa dhahene, obatizo kayo obwina obwinavi. Eji ezinddiyelo ya elobo ya makamaka vaddiddi. Obwina mmanjeni ontapulela wila weyo ohimala okwa na mukalelo wawo wa wale wa okalawo. Ofemutxiwa mmanjeni ontonyihedha wila ovanene weyo ohikalawo wili wila okosege efunelo ya Mulugu. Kobuwela vina yawila weyo ohimala oviperheka wa Yehova Mulugu, kuviperhekeli ganyo, obe ovuneela muladdu. Kuviperhekeli attu eena, obe mparha wa mabasa a elabo. Oviperheka vina obatizo wawo ku oroma wa omarho wofiyedhana vaddiddi na Mulugu. Ku wandana onddimuwa na iyene.​—Masalmo 25:14.

²⁵ Obatiziwa kuntapulela wila weyo onela ovuniwa. Murumiwi Paulo wahileba dhahi: ‘Mulabelege ovuneya wenyu na wova vina ogurumela.’ (Filipi 2:12) Obatizo ku omaromo bahi. Nivuzona tti ntti: Okalevi dhavi mu okwelani wa Mulugu? Kapitulu yehu yomariha enela wakula.