Timóteo Wahifuna Wakamihedha Attu

Timóteo wali muzombwe waziveliwa wakamihedha attu. Iyene wankosa oleddo mwego mowinjiva akamihedhaga attu. Mwa okosa ejuwene, iyene wahikaana egumi yowagalala vaddiddi. Ogahiziveliwa wiwa yopadduwa eji?—

Timóteo wunuwile sidadi yatxemerhiwa Listra. Valiye nyenye, bibi waye Loide vamodha na mamayaye, Eunise, ahiroma omusunziha mwaha wa Yehova. Mudhidhi wonuwa Timóteo, iyene wahifuna wakamihedha attu eena osunza modheela Yehova.

Timóteo valiye muzombwe, Paulo wahimukumbirha wi adhowe alaleye vamodha na iyene mimburo dhiina. Timóteo wahiloga: ‘Indde!’ Iyene wali womala na wale wi adhowe nanda akamihedhe attu eena.

Timóteo wahikosa oleddo na Paulo o sidadi ya Masedónia yatxemerhiwa Tesalónika. Wi afiye wenewale, awene anfanyeela okosa oleddo onddimuwa vaddiddi na paporo. Omamalelowa vafiyilani, awene awakamihedha attu enji osunza modheela Yehova. Mbwenye attu eena ankala onyonyeya vina afunaga wavoreya. Mwadhahene Paulo na Timóteo ahibudduwa badhowa olaleya mburo mwina.

Muvirile meri dhig’onovi mundduni, Paulo wahimukumbirha Timóteo wi eyelele o Tesalónika vina awoone abali mikalelo dhaalani. Eji yanfanyeela oliba murima wi iyene eyelele sidadi ejile yowopiya! Mbwenye Timóteo wahiyela sabwani iyene wannazuzumela abali a wenewale. Iyene wahiyelela wali Paulo na miselu dhapama. Abali Otesalónika mabasaya ela weedda deretu!

Timóteo wahilaba na Paulo vyaka dhinji. Paulo wahifiyedha oleba wi Timóteo wali muttu wamakamaka wa omuruma mwa odhowa okamihedha milogo mwaha wa wi Timóteo wannimukwela Yehova vina attu.

Weyo onowakwela attu vina onofuna wakamihedha osunza sabwa ya Yehova?— Akala weyo onokosa, weyo onele oziveliwa vina onele okaana egumi yowagalala vaddiddi, ninga mukosele Timóteo!