Paulo na Timóteo

Timóteo wali mbali wa muzombwe wa mulogo w’o Listra. Babe wali Mugrego, maye wali Muyuda. Maye Eunise na bibe Loid aromile omusunziha mazu a Yehova Timóteo bali mwana.

Paulo mukoseliye oleddo waye wanawili nanda afiya o Listra, ohimona Timóteo wila wanfuna-wene wakamihedha abali. Paulo ohimukumbirha Timóteo wila anfware mu oleddoni mwaye. Na mudhidhiya Paulo ohimutxenjerhiha Timóteo okosa mabasa a olaleya muttaka wapama.

Wego ku wego wadhowa Paulo na Timóteo, muya wokoddela wela wasogorhela. Omattiyu dhahi Paulo wahimuroha mulobwana awobaga wi adhowe o Masedónia wi akamihedhe. Nona Paulo, Timóteo, Sila na Luka ahidhowa o Masedónia wi alaleye.

O Masedónia muttette w’o Tesalónika alobwana na ayana enjene ahikala Akristu. Ayuda enagu annakanela aje Paulo na akwaye. Awene amuttida Paulo na akwaye ahadhowana vari va anamattonga ahasumela dhahi: ‘Attu aba amwiddani a governadoro w’o Roma!’ Paulo na Timóteo ali vangovini, nona ahidhowa o Bereya namattiyu-namattiyu.

Attu o’Bereya, Agrego na Ayudaya anfuna-wene orumela miselu dhapama, nona ahidha okala anamasunza. Ayuda o Tesalónika vafunani omutabutxa Paulo, iyene omwalela o Atena. Timóteo na Sila ahala o’Bereya wi alibihe abali. Musogorhomwa, Paulo omuruma Timóteo wi eyelele o Tesalónika, akamihedhe abali owanana makattamiho a ofwarafwariwa. Nomala Paulo ohimuruma Timóteo wi aredhele milogo dhinjene alibihemo attuya.

Paulo ohimpanga Timóteo: ‘Otene anfuna omwebedha Yehova anele ofwarafwariwa.’ Timóteo wahifwarafwariwa vina ofugeliwa mukambura sabwa ya nroromelo naye. Iyene wali wosanzayene sabwa y’okalavi oweddeyana na Yehova.

Paulo ohawaddela akadda Filipi dhahi: ‘Miyo ddinourumelani Timóteo. Ddi iyene onausunziheni entapulela wedda mwibaribarini, vina iyene onele ousunzihani olaleya.’ Paulo wanziwa wila yali yaderetu omukuluvela Timóteo. Ttangwi yowila ahilaba vamodha ninga amarho mwa vyaka dhinjene.