Kakala Namavelela Wologa na Mukwawo Ottiya Okala Womaala
1. Iyo ninasanze dhavi mukalelo wa murumiwi Paulo nigalabaga mmabasani olaleya na akwihu?
1 Murumiwi Paulo mudhidhi wakaliye na akwaye a nroromelo woona ninga gari ‘yolibihana.’ (Rom. 1:12) Weyo ogalabaga mmabasani olaleya na namalaleya mwina, onojavo mudhidhi obu wi omulibihe vina omukamihedhe? Ottiya okala namavelela womaala, sabwani kunloga esile dhinukamihedha okala namalaleya wowarala?
2. Txini enfanyeela iyo okosa wi ninvahe mukwehu nikuluvelo, vina ejo ekaleli eni elobo yamakamaka?
2 Kalibiha Nikuluvelo: Anamalaleya eena kana nikuluvelo, ejo entonyihedheya omentoni wawa vina na dhinloga awene kadhinlagiha ohagalala. Iyo podi wunuwiha nikuluvelo nawa mwa wavaha matamaalelo a mmirimani. Mikalelo dhiina dholagiha nikuluvelo sivi? Nameddelela milogo mmodha dhahi omwaddela mukwaye mohiviteya mwaha wa wova waye vina mukalelo onlobela iyene mudhidhi wotene wi akwaranye dhowobana dhaye. Mbali mwina ofiyedha ologa modheela moonelo obo enimukamihedha iyene olagiha nikuluvelo: “Ejo enroma na emwerumweru. Mudhidhi mwina miyo ddinofanyeela olobela ddikumbirhaga nikamihedho wi ddiwodhe okosa ejuwene.” Koddi ehikalawo elobo eukamihedhe weyo okala wokuluveleya mmabasani a olaleya? Kagawelana ohagalala oku na mukwawo wa mabasa a olaleya.
3. Txini enfanyeela iyo okosa wi nimukamihedhe mukwehu mmabasani mwaye?
3 Kagawelanina Ewodhelo: Weyo wakaanaga mazu oromana txino dhologa dhopadduwa dha vamuruddani, agakalile gari ya oromana makani? Koddi weyo wahiromaga wona dhopurelamo dhaderetu mwa oroma ologa na mazu awo modheela mikalelo dholagiha? Kaloga na mukwawo oli na weyo mmabasani. (Gano 27:17) Ogakosaga oleddo wa wiyelela, jofanyeela wi ologe yofuna yawo mwa esile dhindowa weyo ologa ogeyelelagawo na makoselo gani anawodhena weyo. Ogamala okosa nsunzo na Bibilia, jofanyeela ologa wi otapulele esakulile weyo mutoma obo, nlebo, obe mikalelo dhosunzihana wi ofanye dhofuna dha namasunza.
4. Sabwani enfanyeelela iyo okamihedha efunelo ya anamalaleya akwihu?
4 Anamalaleya a vyaka zana dhoroma kazuzumela wakamihedha bahi abale ahewelela. Awene anoona ttima ya olibihana muttu na mukwaye. (Merelo a Arumiwi 11:23; 15:32) Murumiwi Paulo wahimukamihedha muzombwe Timóteo vina wahimulibiha wi esile dhisunziliye agawelane na attu eena. (2 Tim. 2:2) Iyo nigahidduwale okosa eli yaderetu na mukwehu banili mmabasani, ninele wenjedha wagalala waye na ewodhelo vina venevo ninele omuhagalaliha Babi wehu oli wirimu.—Aheb. 13:15, 16.