Nunuwihaga Ewodhelo Yehu Mmabasani a Omwene—Nikosaga Nttikitti na Abale Alagihile Efunelo

‘Kavag’anele wamwinyeene vina na esile dhinsunziha weyo.’ (1 Tim. 4:16) Malago aba ovudheleliwa a murumiwi Paulo amwaddelaga Timóteo antapulela wi, akala iyo nili aswa obe na eziwelo, iyo ninofanyeela ovilibihedha na odhowa vasogorho. Wi nikamihedhiwe okosa ejuwene, masasanyedho maswa ana musorho “Nunuwihaga Ewodhelo Yehu Mmabasani a Omwene” enele oburutxiwa mwari mwa Mabasa Ehu a Omwene. Kadda musorho onele olagiha mukalelo mmodha wamakamaka vina onele ovaha dhubuwelo dhinanikamihedhe olabana. Mwari mwa mweri, attu otene anolibihiwa wi akale txenjewa na ewodhelo ejo. Mweriya ogamala, enele okalawo epaddi Vamatugumanoni a Mabasa enanivahe gari ya wakula makalelo apurilemo iyo mwa okala txenjewa na mabasaya aba. Mweri obuno iyo ninolibihiwa wi nikose nttikitti na abale alagihile efunelo.

Ekaleleni Elobo Yamakamaka: Vowi niwodhe wakwanihedha mabasa attomiwe iyo, ninofanyeela okosa elobo yina ottiya olaleyavi. Iyo ninofanyeelela wawiyelela abale alagihile efunelo vina naasunzihe, nihelelaga manje beu yebaribari yalilehu. (Mt. 28:19, 20; 1 Kor. 3:6-9) Okosa ejo enovedda onfanya muttuya dila yanawili, ologa odheela dhofuna dhaye, vina olibiha makani avirile. Noona, akala ninowafanya attu anlagiha efunelo, jofanyeela okosa muttikitto wa mubutxedho.

Ninakose Dhavi:

• Kakaana nikuluvelo wi weyo ohikaana epano ya nttikitti mpastani mwawo wi walebelemo abale alagihile efunelo. Ottiye nokoddelanene njangarha nawo na muttikitto, nosasanyedheyanene, vina nohivira nsaka. Ogamala okosa oleddo wa wiyelela olebele munjagarhani mwawo.

• Olebele miselu dha mwinya wa vatakulu. Nzina naye bani, vina muttitto, ninga mutonyihedho numero na muttitto obe mutonyihedho wa e-mail? Txini ewodhile woona weyo wa iyene vina anamudhi aye egakalile yopurelamo?

• Olebe mutxiddo odheela makaniya alogile nyuwo. Malebo gani engesile nyuwo? Elobo gani elogiliye odheela esile dhinrumeela iyene? Nivuru gani nittiyile weyo? Olebele mudhidhiya, labona sumanaya, vina sikuna nineyele weyo.

• Olebe masasanyedho anfuna weyo okosa dila yina. Yosakula yawo jivi enfuniwe otanaalela? Weyo walogile wi ogeyelile mudhidhi gani?

• Dila dhotene dhiniyelelawo weyo olebelege. Kayo elobo yabure olebela dhilobo dhowinjiva mwa esile dhinfuniwe okosa.

Wehe Ejoya Mwari mwa Mweri:

• Ogakosa muttikitto, wawaddele abale anlaba na weyo esile dhinleba weyo.