Nunuwihaga Ewodhelo Yehu Mmabasani a Omwene—Nikosaga Masasanyedho a Wiyelela

Ekaleleni Yamakamaka: Niganfanya muttu onlagiha efunelo, ninofanyeela omwiyelela wi ninyettihe beu ya ebaribari yalile iyo. (1 Kor. 3:6) Nihinatti ovenyavo, ninofanyeela ottiya nikuluvelo wa mudhidhiya onanfanye iyo nigamwiyelela. Jamakamaka ottiya mavuzo wi nakule mudhidhi oneyele iyo. Ejo enele omulibiha mwanamurala okaana efunelo ya onijedha labo nineyelehu, vina akala nivuzona ninowakuliwa mwari mwa nivuru nimuttiyedhe iyo, iyene onele oziveliwa vaddiddi wengesawa. Okosa nivuzo wi wakule labo nina enele wukamihedha okosa wiyelela waderetu sabwani makaniya ahimala osasanyedhiwa obe osakuliwa, vina mwanamurala onoziwa ejile enjeedhiye wakuliwa. Nigadhowaga omoona dila yanawili, ninofanyeela omutapulela yawila nidheeli wakula nivuzo nittiyile iyo mudhidhi ovirile mwa venevo okose elebo yina eli yofanyeelela.

Ninakose Dhavi:

• Ogasasanyedhaga dhologa dhawo dha numba na numba, kasasanyedha mavuzo anakule weyo mudhidhi wa wiyelela. Mavuzoya anofanyeela ofanyeya mwari mwa manivuru ampaka weyo labonene ntto, obe nivuzo ninakuliwe mwari mwa nivuru nehu na osunzana, ninawodhe weyo odhana vina wakula ogeyela.

• Ogamarihaga makani awo na muttu olagihile efunelo, kamwaddele efunelo yawo ya ologa na iyene mudhidhi mwina vina ogamala kamulagihe mavuzo asasanyedhile weyo. Mirudda dhina attuya anozuzuma vaddiddi na dhokosa nanda anottigiriga ovaha efunelo ya wawiyelela dila yina. Mwari mwa mikalelo ninga esuwene, weyo onofanyeela onvuza: “Mudhidhi obu wufanyile miyo bwaderetu wi ddufanye veneva labo niina? [Omuttiye wi akule.] Sumana endawo, miyo ddigahiziveliwa ovira veneva wi momaguva dduwakule nivuzo ntti . . . Akala weyo onele okaana mabasa mudhidhi onadhe miyo, kaddaddele wi ddidhe labo niina.”

• Akala weyo onomwaddela mwanamurala mudhidhi oneyele weyo, wakwanihedhe yolibela yawo. (Mt. 5:37) Ogamarihaga oleddo wawo wa wiyelela, kavaha mutoma oneyele weyo wakula labo niina.

Wehe Ejoya Mwari mwa Mweri:

• Ogavisasanyedhaga wi walaleye, kasasanyedha mavuzo anadhowe weyo wakule mudhidhi mwina. Kakosa ejuwene na anamalaleya anlaba na weyo.