Nsaka na Wubuwela Okwa wa Yezu, Weyo Onele Otagiha Ovivelela wa Yehova vina wa Yezu?
1. Anamoona a Yehova anivivelelelani alabaga na guru enddimuwa nsaka na wubuwela okwa wa Yezu?
1 Yehova onozuzumela wakwanihedha dhogana dhaye. Alogaga modheela mareliho meena a Omwene wa Mulugu, Izaiya 9:6 onologa: ‘Onira esidhá, ku okwela onddimuwa wa Yehova na elabo yotene.’ Na mikalelo dhakene mwari mwa mabasa aye, mwana Mulugu bali velaboni yavati wahitonyihedha ozuzumela mabasa a webedha webaribari. (Joau 2:13-17; 4:34) Vyaka dhetene mudhidhi wa wubuwela okwa wa Yezu, Anamalaleya enjene orugunuwa elabo yotene anokosa guru yavawoka wi atagihe ovivelela wa Yehova vamodha na Yezu azuzumelaga mabasa a olaleya. Weyo onele olaba vamodha nawene?
2. Oromana labo na 7 mweri wa Março ovivelela onanikamihedhe okosa eni?
2 Ogawa wa Niwobo na Wubuwela Okwa wa Yezu: Mwawuno opakiwa wa niwobo na wubuwela okwa wa Yezu ninaromiwe Sabuddu labo 7 na mweri wa Março. Kavisasanyedhe ovanene wi ozuzumele mabasa a olaleya. Milogo dhotene dhinele olaba na mukalelo wa wagalala vina egawodheya dhinele ovapana wila dhilaleye mirudda dhinjene. Kakosa guru wi owodhe wawoba akwawo omabasani, oskola, anamasunza awo a Bibilia, amudhawo vina abale anawiyelela weyo wi wasunzihe, modheela wavaha niwobo obe modheela omulabihedha jw.org.
3. Ninonuwihe dhavi mabasa ehu a olaleya mweri wa Março na Abril?
3 Okala Pionero Wokamihedha: Ovivelela onele onikamihedha wunuwiha mabasa ehu. Mohaganyedha anamalaleya enjene anele okaana efunelo yolaba ninga apionero okamihedha mweri wa Março na Abril, vina abale anfuna okala apionero anokaana gari ya operheka mawora 30. Mudhidhi wa webedha wa ntakulu nawo obe wa nsunzo na omwinya, katanaalelani na nlobelo mukalelo onakose nyuwo ejuwene. (Gano 15:22) Ogalabaga na guru mmabasani mpo, onele walibiha eena ozuzumela mabasaya. Ogakosa masanyedho omwinya wi wenjedhedhe mabasa awo, venevo onomutagiha Yezu mwa ozuzumela mabasa apama.—Mk. 6:31-34
4. Nigatagiha ovivelela wa Yehova na Yezu ninapurelemo eni?
4 Omutagiha wawo Yehova na mwanaye mudhidhi wa wubuwela okwa wa Yezu elobo enawuvahe mareliho menjene. Attu enjeene a mmuruddani anele olaleyiwa. Ninele okaana dhotagiha dhowagaliha dhinda twangwi ya omwebedha Yehova vina okala anamavaha. (Mer. 20:35) Elobo yamakamaka, jawi ninele omwagalaliha Yehova na mwanaye.