Nunuwihaga Ewodhelo Yehu Mmabasani a Omwene—Abale Anavaha Iyo Marevista Myeri Dhotedhene

Ekalelini Yamakamaka: Attu enjene anziveliwa wengesa marevista ehu kanfuna omusunza Bibilia na iyo. Txino awene anoziveliwa relijiau yawa, obe anubuwela yawila kana mudhidhi wa osunza. Mwadhahene, agengesaga marevista ehu, mudhidhi wotene txino awene anodha okaana efunelo enddimuwa mwa Nzu na Mulugu. (1 Ped. 2:2) Mutoma mmodha onodha oddiginya murima wawa, obe mikalelo dhawa dhinodha otxinjeya. Wili-wili nigadhowaga wawoona s’ohigonelavo, ejo enodha wakosiha awene okala amarho ehu vina enonikamihedha oziwa dhilobo dhinfuna awene na esile dhinadhugudha. Mohaganyedha, venevo vanowodheya ofuguliwa nsunzo na Bibilia.

Ninakose Dhavi:

• Meri dhotedhene, kakosa masasanyedho a odhowana mitoma dhiswa dha marevista A Sentinela na Despertai! Txino enofanyeela weyo omoona mudhidhi mwina mwari mwa mweri, wi oziwe efunelo yaye ya wengesa mitoma dha marevista aninvaha weyo obe wi onvahedhe marevista anlabihedhiwa mwerene obo. Kakosa masasanyedho aderetu.​—Koona Mabasa Ehu a Omwene; a mweri wa Janeiro yaka ya 2014 nikuku 3.

• Ovisasanyedhe wiyelela wotene. Ottiya omuttiyedhavi bahi marevistaya, katamela ologa na iyene vina kakosa omarho na mwanamuralaya dhawene panawodhiwe wunuwiha efunelo yaye.

• Kakala txenjewa wi opure gari ya oroma nsunzo. Akala muttu onimwiyelela weyo onowuvuza txini enloga Bibilia modheela mutoma wooni iyene, odhowena nivuru nosunzana nina nakulo na nivuzona, venevo bamutanaalele mwetene. Ohinatti odhowa, omuttiyedhe nivuzo nina ninadhe weyo wakula labo ninamwiyeleliwe. Akala weyo ohikaana elemeelelo ya ologa makani mang’ovi omulabihedhaga Bibilia obe nivuru nehu nosunzana, venevo oneeddiha nsunzo na Bibilia. Wahiromaga onvaha mwanamurala brochura Miselu Dhapama vina buroma omulagiha nsunzo na Bibilia mudhidhi mung’onovi? Wahiromaga olagiha vidiyu Ninimusunzelani Bibilia? vina vidiyu Txini Enkosiwa Vansunzoni na Bibilia? Masiki akala muttuya kalagihile efunelo ya osunza mundduni, mikalelo dhinodha osadduwa. Kigakalile yaderetu mwa weyo weha dila yina?

Otagihe Dhahi Mweri Obuno

• Walebele abale anavaha weyo marevista myeri dhotedhene. Wavahe marevista maswa, vina wawaddele yawila onele odhana meena mweri ondawo.