Opakela Marevista—Mukalelo Wolabihedheya wi Oromena Nsunzo na Bibilia
1. Sabwaya jani nikuru na Yehova mwari mwa mudhidhi mwinji ninowalibihaga anamalaleya wi akaane mapakelo a marevista?
1 Attu enjene kanfuna omusunza Bibilia na iyo, mbwenye aweneya anopurelamo vaddiddi sabwa ya wengesa marevista ehu. Noona, nikuru na Yehova mwari mwa vyaka dhinji ninowalibihaga anamalaleya wi akaane mapakelo a marevista. Attu agengesaga marevista ehu mudhidhi mwinji, awene dila dhinji anokaanaga efunelo ya Mazu a Mulugu. (1 Ped. 2:2) Na mudhidhiya, dhilobo dhengesile awene podi watxenjerhiha, afiyedhaga orumeela nsunzo na Bibilia.
2. Ninakamihedhe dhavi abale anakosela iyo oleddo wi akaane efunelo yoliba?
2 ‘Onyettihe’ Beu ya Ebaribari: Ottiya okala odhowanavi marevista nanda buwiyela bahi, omutaganyihe mwanamuralaya mmakanini vina otamele okaana mandano na iyene. Ejo enele oukamihedha otanalela mikalelo dhaye, efunelo, vina mebedhelo aye, enawukamihedhe ologa na ononelamo. (Gano 16:23) Kavisasanyedhe kadda oleddo. Egawodheya, kaloga momaguva mutoma mmodha vamodha na nlebo niniwanana na mutomaya wa marevista, onyettihaga beu ji beu ya murima waye. (1 Kor. 3:6) Kaleba labona vamodha na mudhidhi wa kadda oleddo, nivuru nittiyile weyo, vamodha na malebo vina mitoma dhilogile nyuwo.
3. Na midhidhi gani dhinfanyeelihu wiyela wi nikose oleddo wa abale anavaha iyo marevista?
3 Nigeyelilewo na mikalelo gani? Weyo onofanyeela wiyelelawo dila modha wa kadda mweri wi odhowena marevista meena maswa wa abale anakosela weyo oleddo. Mwadhahene, masiki okaanaga makattamiho txino na efunelo ya muttuya, weyo podi osakula waweddelela mudhidhi wotene. Motagiha, sumana modha obe biili ogamala ottiya marevista, weyo podi wiyelelawo wi ologe, “Miyo ddihifiya wi ddiloge momaguva mwaha wa marevista attiyile miyo.” Eji enele onoza efunelo ya muttuya wi engese mutoma mmodha yeka. Akala iyene omala wengesa, weyo onofanyeela onvuza enubuweliye modheela mutomaya vina otxokotxele momaguva. Obe akala muttuya onopurelamo wengesa manivuru ehu, weyo podi omukosela oleddo vina bunvaha tratado, brochura, obe nivuru ninlabihedha iyo mwari mwa mweri olihu.
4. Mwari mwa mudhidhi, txini enfanyeelihu okosa wi nikaane ebaribari wi abale anavaha iyo marevista akaane efunelo ya omusunza Bibilia?
4 Kujeedhele wi mwanamuralaya aukumbirhe nsunzo. Karoma weyo. Masiki iyene bakooddile omusunza Bibilia masaka a mundduni, mwari mwa ovira mudhidhi weyo podi omulagiha mutoma “Perguntas Bíblicas Respondidas” dha revista A Sentinela vina woone akala iyene ohikaana efunelo ya otanaalela vamodha na weyo. Txino weyo podi oroma nsunzo mudhidhene obo. Mwadhahene, akala weyo kunwodha oroma nsunzo, weyo podi odhowavi bugamudhowelana marevista wi owodhe wunuwiha efunelo yaye.