Niwobo Nohipipiriha

1. Ogawa niwobo na mutugumano wa ttattamwa onroma mudhidhi gani?

¹ Kowiliwa wubuwela wavaha anamudhi vamodha na akwawo yoja yoziva eganongeli weyo kobiri gwe vina okosavo guru txino ogakala wemwerumweru ogawobaga aweneya. Na mukalelo wakakene guru dhinji dhihilabihedhiwa wi esasanyedhiwe yoja yomuyani enatonyihedhiwé omatugumanoni ehu a ttattamwa. Sumana ttaru labona ntto na matugumano nihinatti, Yehova ononivaha gari enddimuwa ya wawoba attu eena wi oone matugumanoya abo. Txini enanikamihedhe wawoba attu na wagalala?

2. Txini enanilibihe ogawa niwobo na guru?

² Ninele olibiheya olaba vaddiddi nigagawaga niwobo nigobuwela na murima wa ntamaalelo dhopurelamo dholibiha dhinnivaha Yehova omatugumanoni wehu a ttattamwa. (Iza. 65:13, 14) Ninofanyeela wubuwela wi niwobo ntto wa kadda yaka onodhana dhopureleyamo dha deretu. (Koona kasha “Eji Enodhana Dhopurelamo.”) Attu eena anawobihu anele woona matugumanoya vamodha na iyo mbwenye eena kandhawo. Kaninang’ana mukalelo onakula attu eena mbwenye guru dhinkosihu mudhidhi obo wa ogawa niwobo dhinodhana nttittimiho wa Yehova vina dhinolagiha ofewa mada waye.​—Masal. 145:3, 7; Ovuh. 22:17.

3. Niwobo ninagawiwe na mukalelo gani?

³ Nikuru na anddimuwa a mulogo ninele osakula mukalelo onfunani olabihedha wi nigawiwe niwobo, txino anddimuwa anele otanaalela akala ninofanyeela ottiya niwobo vatakulu vahili muttu obe poddi olabihedhiwa onamoona wa vattaddo mmuruddanimwa. Omamalelo wa sumana marevista anele opakiwa vamodha na niwobo egawodheya. Niwobo ntti nigamala ogawiwa, kito wagalala gani onakaanihu mwa oziwa wi nihigawa na wagalala vina wi attu enjeene egawodheya anele opurelamo vamodha na iyo yoja yomuyani enivahile Yehova!

[Kasha vanikukuni 4]

Weyo onaloge dhavi?

Ogamala olejela kaloga dhahi: “Iyo nili mmuruddani mpu ninkosa epaddi ya mabasa ankosiwa orugunuwa elabo yotene ya ogawa niwobo na muttupo munddimuwa wa makamaka onakosiwe. Labona, mudhidhiya vina mburoya omala olebiwa vaniwoboniva.”

[Kasha vanikukuni 4]

Eji Enodhana Dhopurelamo

• Vyaka dha mundduni murogora dhahi agawaga niwobo, iyene wannivivuza akala guru dhetene dhakosiye dhigahikaana dhopurelamo. Iyene wahubuwela, ‘Koddi attuya anele orumeela vina afiyedhe woona mutugumano wa ttattamwa vamodha na iyo?’ Omembesi wa Sabuddu omutugumanoni wa ttattamwa, iyene wahimoona mulobwana wakosa epaddi ya kapela Indu wagilatile vakuvi vaye, venevo murogoraya oddule wahiloga nzina naye. Ejoya yahooniha wi mulobwana oddule wahidha omutugumanoni sabwani wahivahiwa niwobo. Iyene wahikaana mavuzo gwe mbwenye murogora wahiwodha wakula mavuzoya. Mulobwana oddule wahiloga wi wahagalala sabwa ya woona porograma ejile vina wahiziveliwa mwa woona mukalelo waderetu wowabala vina ekalelo ya anamewaya. Mwa venevo labonene nttile, murogora oddule wahiroma ologa makani na atelani eena agilatile epaddi yina vakuvi vaye. Awene vina ahivahiwa niwobo vina ahidha omutugumanoni wa ttattamwa na mukukutta. Awene ahiziveliwa na mutugumano obule noona ahigana woona dila yanawili Ddiminguna. Murogora wahoona wi porograma yehu yogawa niwobo yaka na yaka jamakamaka.

• Mutugumano wa ttattamwa ovirile muteli na mwadhiye anlaba ninga apionero a mudhidhi wotene awene ahiloga na atelani a akalaba. Atelani abale a akalaba ahiloga wi wali oromawene odha omutugumanoni. Atelani abale a apionero ahavuza: “Bani wuwobileni?” Awene ahakula “Vafile iyo vatakulu nahifanya niwobo vamusuwo vehu.” Awene ahengesa niwobo nttile vina ahittikitta mundduni mwa niwobona. Attu eena mwawoonelani atelani abale a akalaba ahakuwela wi ajena vamodha poso nawa. Awene ahiziveliwa vaddiddi porograma vina ahigana wiyela dila yina mmangwananimwa. Ahikosiwa masasanyedho wi akoseliwe oleddo atelani abale wi yunuwihiwe efunelo yawa.