Nifare Yotagiha ya Anamavuhulela—Habakuk
1. Ninfanyelelani oviladdaniha na namavuhulela Habakuk?
1 Vowila mikalelo dha elabo ejino yabure dhinottabwavi, txino iyo podi wubuwela ninga namavuhulela Habakuk, wanvuzile dhahi Yehova: “Munddonihedhetxa nni dhabure? [Nanda] Oku nyuwo mukalelaga wañganavi?” (Hab. 1:3; 2 Tim. 3:1, 13) Otanalela miselu dha Habakuk na maladdaniho a nroromelo enele onikamihedha nijedhaga siku na ottonga wa Yehova.—2 Ped. 3:7.
2. Ninalagihe dhavi wila nihikaana nroromelo ovanene?
2 Okalawo na Nroromelo: Ottiya okalaga otxutxeyavi sabwa ya dhopadduwa dha mwilaboni, Habakuk wahilibavi omuyani. (Hab. 2:1) Yehova wahimulibiha namavuhulela wila mazu Aye agahakwanela na mudhidhiya sabwani “muthu onimuroromela Mulugu onokalawo.” (Hab. 2:2-4) Mazu aba antapulela eni mwa Akristu ankala malabo omariha ovanene? Kanizuzumeletxe mudhidhi onafiye siku nomariha, mbwenye jamakamaka oziwa wila sikuna ninele ofiya-wene. Nroromelo ninele onilibiha okala ovyang’anela oku banigeka vamburoni voroma mabasa a olaleya.—Aheb. 10:38, 39.
3. Ninfanyelelani ottaba nigamwebedhaga Yehova?
3 Nittabe mwa Yehova: Gog wa Magóg agabuddugela nlogo na Yehova, nroromelo nehu ninele wehiwa. (Ezek. 38:2, 10-12) Masiki akala ninele opemberha, ohiwanana onele otota makattamiho. Vina oja onele orameya. Dhorela dhinele oyeleliwa, oku magano a okalawo bagarameya. Ninakose dhavi makattamihoya aba agafumbuwa? Masiki Habakuk oonagavi makattamiho, wanimujedha Yehova na ottaba. (Hab. 3:16-19) “Oziveliwa wa Nabuya” onele onikamihedha ovilela makattamiho a musogorho.—Nem. 8:10; Aheb. 12:2.
4. Ninakaane dhavi ottaba ovanene vina musogorho?
4 Attu anavuneye labo na ottonga wa Yehova anele weedda mu dila enttukulela wigumini. (Hab. 2:14) Abale anavenyihiwe mu okwani anele osunza mwaha wa Yehova. Ovano ninofanyela olabihedha gari yehu wi nilogege mwaha wa Yehova na mabasa aye otikiniha!—Masal. 34:1; 71:17.